35
Levi te tungah A kipia Khuapite
1 Jericho khua pan Jordan ngun ngalkhat Moab zaangtam ah Topa in Moses tungah, Ref 35:1-8 Jos 21:1-42
2 “Israel te ii a nga a neisate sung pan Levi te teen natu in khuapi pawlkhat le a khuapite kiimkot ah ngan tha natu leitang a piak nanak tu in son in.
3 Hi khuapite Levi te neisa hi tu a, tua munah amate teang tu uh hi. Tua nganthana mun sia a khui le a nganno dangte theampo atu hi tu hi.
4 Nganthana mun sia khuapi luphungte pan a kiimkot metre 450 veu zai tu hi,
5 Tua hile ngantha natu sia khuapi kiimkot teng hi a, a pangh kikim kiing li nei, a pangh khat metre 900 veu zai tu a, a laizang ah khuapi om tu hi.
6 Levi te tungah bukna khuapi luk na pia tu uh a, mi khat pawpo in mihing khat a that tha le a buk natu hi tu hi. Tuasia belapna in a dang khuapi sawmli le nii zongh a nganthana taw kop in amate pia thua vun,
7 a vekpi in sawmli le liat hi.
8 A nam khat sim ii sungah Levi te ii khuapi phaza tu sia, a ngam letna taw kizui in kikhensat tu hi,” ci hi.
Bukna Khuapite
(Thuhil kikna 19:1-13; Joshua 20:1-9)
9 Topa in Moses tungah,
10 Israel mite a sonsawn tu in thupia a: “Jordan Ngun kaanin Canaan ngamsung na tum uh ciang,
11 ngaisut khol ngawlin mi khat in ngual a that tha le ama suatak thei natu in a buk natu khuapite teal tu nu hi.
12 Tua munah mithi pa mealheak a phula nuam sia ii khut sung pan suakta tu hi. Mihing that hi ci in a kimawsak pa sia mipi mai ah thu a kikhensat mateng kithat ngawl tu hi.
13 Khuapi luk,
14 Jordan nisuana sangah thum le Canaan ngam sungah thum teal vun.
15 Hi khuapi luk te sia Israel mite le tawmvei sung ahizong a tawntung ahizong a teang ngamdangmite atu in bukna hi tu hi. Ngaisut khol ngawlin mi khat a that tha pawpo in tua khuapi khat pawpo zuan thei tu hi.
16-18 “Ahihang mihing khat in thik, suang ahibuale moltawng zanghin ngual khat a that le, ama sia mihing that mawna nei a kithatlum tu hi.
19 Thalup a thuak pa ii a mealheak kinai puibel sia in tua mi that pa a thalup tu vaipuak nei hi. Tua mi that pa a mu po ciang ama in that tu hi.
20 “Mihing khat in ngual khat ngaimaw in sawnvawk ahibuale bang khat po taw deangin,
21 ahibuale a khuttum taw thongin a that le ama sia mihing that mawna nei a, kithatlum tu hi. Thalup a thuakpa ii a mealheak kinaipuibel sia in mi that pa a thalup tu vaipuak nei hi. Tua pa a mu ciang ama in that tu hi.
22 “Ahizong sonteena in mihing khat in a ngaimawk ngawl ngual khat po sawnvawk a, ahibuale bang khat po taw deang in that tha hi.
23 Ahibuale a liamsua nuam hi ngawl, a ngal zongh hi ngawl napi khua en ngawlin a suang den khat taw midang khat kha in that tha hi.
24 Tuabang thute ah taangpite in a thi sia ii bee pa, a phula nuam sia pa panpui ngawlin mihing a thisak pa panpui in thukhen tu hi.
25 Taangpite in mihing that mawna nei pa sia, mithi pa beete kung pan ama suatakna a bukna khuapi ah heak kiksak tu hi. Thiampi Lianbelpa ii thi dong tualai a bukna khuapi ah ama teang nanak tu hi.
26 Mihing that mawna nei pa sia a suatakna a bukna khuapi nusia a,
27 tuaciang mithi pa ii beepa in mu in a thatlum le hi phulaakna sia mi that hi ngawl hi.
28 Mihing that mawna nei pa sia a bukna khuapi ah Thiampi Lianbelpa thi dong teang hamtang lai tu a, ahizong tuasia zawkciang cia thei tu hi.
29 Hi ngeinate na teenna mun po ah nangma le na suan na paalte ii zui tu ahi hi.
30 “Mihing that in, a kimawsiat pa sia a mu tetti nii, ahibuale tetti a tamzaw a om ciang bekin mawnei hi ci in kithatlum thei bek tu hi: tetti khat bek sia mi that hi ci in kimawsiat natu in kicing ngawl hi.Ref 35:30 Thkna 17:6,19:15
31 Mihing that pa sia kithatlum tu hi. Ama mawna daan pan a suatak natu in sum taw kitan thei ngawl tu hi.
32 Bukna khuapi ah tai in a buu sa khat sia Thiampi Lianbelpa thi ma in, inn ah a ciakik natu in kitansak heak vun.
33 Na kitansak uh le na teenna ngam le lei a ninsak hi tu nu hi. Mihing thalupna in ngam le lei ninsak a, biakna taw kisai in mihing khat kithalupna mun thiansua natu in mi that sia pa ii a thi tu ngawl buang thudang om ngawl hi.
34 Na teenna ngam le lei ninsak heak vun, banghang ziam cile Keima in Topa ka hi a, Israel mite sungah ka teang hi,” ci hi.