33
Egypt pan Moab Ngam dong Khualhawna
1 Moses le Aaron lampuina taw Israel te, Egypt ngam pan amate nam tek ii lampuina nuai ah a pusua zawk uh ciang a ngiaphual saatna mun minte sia a nuai a bang ahi hi.
2 Topa thupiakna bangin, Moses in ngiaphual a saat simin a mun min veu ciamtee hi.
3 Paisan Poai masabel a zing ciang, tua kum tha masabel ni sawm le ni nga ni in Israel mite in Egypt ngam nusia uh hi. Topa kepna taw amate Rameses khuapi pan in
4 Topa ii a thalup a tapaciilte phumin a om Egypt mite mu tangin amate in paisan uh hi. Hi bangin a sepna taw Topa in Egypt pathiante sangin vaanglian zaw a hina lak hi.
5 Israel mite Rameses nusia in Sukkoth ah ngiaphual saat uh hi.
6 A ngiaphual kik sia sennealngammong Etham ah saat uh hi.
7 Tua mun pan amate, Baal Zephon nisuana, Pi Hahiroth ah heak kikin Migdol nai ah ngiaphual saat uh hi.
8 Amate Pi Hahiroth nusia in, San Tuipi kaantan in Shur sennealngamsung theng uh hi; ni thum sung a pai zawk uh ciang Marah ah ngiaphual saat uh hi.
9 Tua mun pan Elim ah pai in ngiaphual saat uh hi, banghang ziam cile tualai ah ciktui sawm le nii le palm kung 70 om hi.
10 Amate Elim nusia in, Suez Tuipidok paam ah ngiaphual saat uh hi.
11 A ngiaphual kik sia Sin sennealngam sungah saat uh hi.
12 Tuaciang Dophkah ah ngiaphual saatin,
13 tua zawkciang Alush ah saat uh hi.
14 A ngiaphual kik sia Rephidim hi a, tualai ah amate neak tu tui om ngawl hi.
15-37 Amate in Rephidim pan Hor Mual dong a nuai a mun tengah ngiaphual saat uh hi: Sinai Sennealngam, Kibroth Hattaavah ahibuale Longthakte Thaante, Hazeroth, Rithmah, Rimmon Perez, Libnah, Rissah, Kehelathah, Shepher Mual, Haradah, Makheloth, Tahath, Terah, Mithkah, Hashmonah, Moseroth, Bene Jaakan, Hor Haggidgad, Jotbathah, Abronah, Eziongeber, Zin duisung (Kadesh), le Edom ngammong Hor Mual ahi hi.
38-39 Topa thupiak bangin thiampi Aaron sia Hor Mual ah kaato hi. Israel te Egypt a nusiat zawk kum sawm li, a tha ngana, ni khat ni, ama kum 123 a phak ciang tua munah thi hi. Ref 33:38 Mi 20:22-28, Thkna 10:6; 32:50
40 Canaan thangsang Arad ngam kumpipa in Israel te hong paina thu za hi. Ref 33:40 Mi 21:1
41-49 Hor Mual pan Moab zaangtam dong a nuai a mun tengah Israel te in ngiaphual saat uh hi: Zalmonah, Punon, Oboth, Moab ngamsung a lalsa Abarim, Dibon Gad, Almon Diblathaim, Nibo Mual hui Abarim Mualte le Beth Jeshimoth le Acacia Kuam kilaklaw, Jericho pan Jordan Ngun ngalkhat Moab zaangtam te ahi hi.
Jordan Ngun Kan ma in a Hilnate
50 Jericho pan Jordan ngunngal khat Moab zaangtam ah Topa in Moses tungah,
51 Israel atu in a nuai a hilnate pia hi: “Jordan ngun kaanin Canaan ngam na tum uh ciang,
52 ngam sungah a teangte theampo notkeak nanak tu nu hi. Amate ii suang le leisung sumpiang taw a vawt milim theampo le a biakna mun theampo susia vun.
53 A ngam la in, tua munah teang vun, banghang ziam cile tua sia note kong pia tu hi.
54 Namte le bee le phung tuatuam sungah lai meetang sawkin ngam hawm vun, bee le phung tamte sia ngamzai pia in, bee le phung tawmte sia ngamno pia vun. Ref 33:54 Mi 26:54-56
55 Ahizong ngam sungah a teangte na notkeak bua uh ahile a taanglaite in note mit a tangsak ninnengte bang le na pangh hong sun lingte bangin hong nawngkaisak tu a, amate in note hong do tu uh hi.
56 Amate na notkeak bua uh ahile, amate lalcipsak tu ka sawm bangin note kong lalcipsak tu hi.” ci hi.