14
Mipite Phun
1 Mipite lungmang a thinkiam in zankhuateak kap in au hi.
2 Amate in Moses le Aaron langpanin phunsan uh a, “Egypt ah ahibuale hi lai duisung ngawngawn ah thi le ung phazaw hi!
3 Banghangin eite tua ngam ah Topa in hong paipui ziam? Eite ngal sungah hong kithat tu a, ih zite le ih tate kiman tu hi. Egypt ah cia kik leang phazaw ngawl ziam?” ci uh hi.
4 Tua ahiciang amate khat le khat tungah, “Lampui khat tealin Egypt ah cia kik tawng!” kici uh hi.
5 Tua zawkciang Moses le Aaron sia mihonpite mai lei ah kun uh hi.
6 Tuaciang Nun tapa Joshua le Jephunneh tapa Caleb, thudawpkute sung pan nii in khuangaina taw a puante balkeak in,
7 mipite tungah, “Ka ngam vilna uh leitang sia leitang pha mama khat ahi hi.
8 Eite tungah Topa hong lungkim pole ama in tua munah hong paipui tu a, tua ngampha le ngamnuam hong pia tu hi.
9 Topa leedo heak vun a, tualai a teang mihingte kiita heak vun. Eite in olno takin amate ih zo tu hi. Eite taw a omkhawm Topa in amate a dal a pathiante zo zo a; tua ahikom lau heak vun,” ci hi. Ref 14:9 Heb 3:16
10 Taangpi buppi in Joshua le Caleb suang taw denlup tu in tawng uh hi, ahizong Topa ompuina khuavak taang velvol sia Puanbuk tungah thakhat thu in kilangh sia, mipite in mu uh hi.
Mipite atu Moses Thungen
11 Topa in Moses tungah, “Hi mipite in bang tanvei kei hong nial lai tu ziam? Amate sungah nalamdang lakna tam mama vawt zo napi, hong muang ngawlin bang tanvei hong nial tu ziam?
12 A kilaw thei natna puakin amate ka mon tu a, ahizong nang sia amate sangin a lian zaw le a thahat zaw minam khat ii pa in kong vawt tu hi!” ci hi.
13 Ahizong Moses in Topa tungah, “Nangma vaangletna taw hi mipite Egypt pan na pusua pui hi. Na mihingte tungah na nasepnate Egypt te in a zaak uh ciang, amate in
14 hi ngam a teang mite tungah son tu uh hi. Topa, nangma in kote taw nong om a, kote tungah na meei a tawlngak ciang in, thiang sitset a hong kimu na thu le sun in meeikhuam taw, zan in meikhuam taw ka mai uh ah na pai na thute hi mite in za siat zo hi.
15 Tu in na mite theampo thatlum thong lete na minthanna a za sa minamte in
16 a Pathian ii piak tu a, a khapsa ngam ah a mite then zo ngawl ahikom duisung ah thatlum hi hong ci tu uh hi.
17 Tua ahiciang, tu in Topa awng thu kong ngen hi, na vaangletna hong lak ta'n a,
18 ‘Keima Topa sia thin uuk hak a, itna lian le thumaanna a lak, mawna le leedona a maisakpa ka hi hi. Ahizong a pate mawna hangin tate le tute tungah khang thum, khang li dongin daan ka pia tu hi’ ci in nong ciamsate taangtungsak in. Ref 14:18 Pu 20:5-6; 34:6-7, Thkna 5:9-10; 7:9-10
19 Tuaciang tu in Topa awng, a kikheal ngawl a lian, na itna taw kizui in Egypt ngam pan na pusuapui a kipan a mawna na maisak bangin, hi mite mawna na maisak natu in thu kong ngen hi,” ci hi. Ref 14:13-19 Pu 32:11-14
20 Topa in, “Nong nget bangma in amate mawna ka maisak tu hi.
21 Ahizong keima in a nungta takpi Pathian ka hi a ka ompuina in leitung theampo a dim takpi bangin, Ref 14:21-23 Heb 3:18
22 hi mite khat zongh Canaan ngam tum tu in nungta ngawl tu hi cisia kong kamciam hi. Amate in ka ompuina khuavak taang velvol sia le Egypt ngam le duisung ah nalamdang lakna ka vawtte mu zo napi ka thu ni nuam ngawlin hong nial a, pehial pehial in ka thin uai na hong ze et uh hi.
23 A taanghpupite tungah ka khapsa ngam ah amate tum ngeingawl tu hi. Kei hong nial peuma in tua ngam ah tum ngeingawl tu hi.
24 Ahizong ka naseampa Caleb ii khuangaisutna sia a tuam hi a, kei tungah thumaan lai ahikom a ngam vilna leitang ah ka paipui tu a, tuaciang a suan a paalte in Ref 14:24 Jos 14:9-12
25 Amalek te le Canaan te ii tu a, a teenna ngamkuamte lua tu hi. Zing ciang heak kik vun a, Aqaba Tuipidok sang duisung ah pai vun,” ci in zo hi.
A Phun hu in Topa in Mipite Daan pia
26 Topa in Moses le Aaron tungah,
27 “Hi mihing seksolte in bang tanvei kei hong phunsan lai tu ziam? Hong phutsatnate ka zaak tam zo hi!
28 Tu in amate tungah, ‘Keima in a nungta takpi Pathian ka hi bangma, nong nget uh bangin kong pia tu hi, ci in ka kiciam hi. Keima Topa pau zo khi hi.
29 Na thi tu uh a, hi duisung ngampa ah na luangte kithethaang tu uh hi. Kei nong phunsan uh hu in, note kum kul tungsia peuma, tua ngam ah tum ngawl tu nu hi. Ref 14:29 Heb 3:17
30 Teangsak tu in kong kamciamsa ngam ah Joshua le Caleb simngawl note khat zongh na teang buatu uh hi.
31 Na tate kiman tu na ci uh hi, ahihang na nialna ngam ah amate ka paipui tu a, tua ngam sia amate inn le lo suak tu hi.
32 Note sia hi lai duisung ah na thi tu uh hi.
33 Note na thi siat uh dong na thumaan ngawlna uh hangin ngimthuak in na tate uh duisung ah kum sawmli sung vakthap tu hi. Ref 14:33 Sawl 7:36
34 Na ngamvil uh ni phaza, ni khat ciang kum khat, ni sawmli atu kum sawmli sung note in na mawna thaman na thuak dipdeap tu uh hi. Kei in no kong langpan ciang bangbang hi ziam ci sia na he tu uh hi!
35 Kikaikhawm in kei hong langpan no mi seksolte tungah hisia kong tungsak tatak tu hi, ci in ka kiciam hi. Hi lai duisung ah note theampo thi siat tu nu hi. Keima, Topa pau zo khi hi,’ ci in ka zona teng na son in,” ci hi.
36-37 Moses ii ngamvil tu a, a sawl mihingte ii thumaan ngawl a son kikna in mipite ii Topa a phutsatna piangsak hi.Tua hu in, Topa in amate tungah natna tungsakin thi tu uh hi.
38 Thudawpku sawm le niite sung pan Joshua le Caleb bek suakta uh hi.
Ngam laak tu A khatvei Hanciamna
( Thuhil kikna 1:41-46 )
39 Moses in Topa thusonte Israel te tungah a son ciang, amate nasia takin khuangai uh hi.
40 Mualtung ngam la tu in a zing ciang zingtuungin amate kipan a, “Tu in Topa hong sonsa ngam ah pai tu in ih kinging hi. Mimaw mikhial hi hing ci in ih pualaak hi,” ci uh hi.
41 Ahizong Moses in, “Tua ahile banghangin tu ciang Topa thu ni ngawl nu ziam? Zo ngawl tu nu hi!
42 Pai heak vun, note taw Topa omkhawm ngawl a, na ngalte in hong zo tu hi.
43 Amalek te le Canaan te taw na kisim uh ciang ngal sungah na thi tu uh hi; Topa sia note taw omkhawm ngawl tu hi, banghang ziam cile ama nung zui tu na nial zo uh hi,” ci hi.
44 Topa Thuciamna Thingkuang ahizong, Moses ama mama ahizong ngiaphual nusia ngawl napi amate sia mualtung ngam ah kaato ngam veve lai uh hi.
45 Tuasia ciang, tualai ah a teang Amalek te le Canaan te in amate simin zo a, Hormah dong zuizen uh hi.