8
Ezra in Mihingte tungah Thukham Sim
1 A tha sali tha in Israel mite theampo a khua tek ah teang thei hi. Tua tha ni khat ni in amate theampo Jerusalem Tui Kongpi sungsang leitual ah kikhawm uh hi. Amate in Topa ii Moses tungtawn a, Israel a piak Thukham laibu a la tu in thiampipa, Thukham he mipil Ezra sawl uh hi.
2 Tua ahiciang Ezra in mipite ahi — pasal, numei le thutel thei sa patangte kikhopna munah tua laibu paipui hi.
3 Tualai kongpi hui leitual ah ama in Thukham laibu sia zing khuavak pan nisun dong amate tungah simh in pha takpi in ngai tek uh hi.
4 Tua hunsung thuson natu in a vawt thing dawtuam tungah Ezra ding hi. Ama ziatsang ah a ding teng: Mattithiah, Shema, Anaiah, Uriah, Hilkiah le Maaseiah; ama veisang ah a ding teng:Pedaiah, Mishael, Malchijah, Hashum, Hashbaddanah, Zechariah le Meshullam ahi uh hi.
5 Dawtuam saangna ah a ding Ezra sia, amate in mitsuan nginge uh hi. Ezra in laibu a hon po ciang amate ding siat uh hi.
6 Ezra in, “A lian Pathian, Topa pok vun!” ci hi.
Mihing theampo in a khutte laamto in, “Amen! Amen!” ci in zo uh hi. Mipite khupdin in a maitang lei a phak dong kunin bia uh hi.
7 Tua zawkciang amate a omna tek ah ding to in, a nuai a Levi te: Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan le Pelaiah te in amate tungah thukham sonthiang uh hi.
8 Mipite ii a tel thei natu in amate in Pathian Thukham sia pheenin thiang son uh hi.
9 Mipite in Thukham ii tangkalte a zaak uh ciang a thin suu in kap uh hi. Tua ahiciang ngamukmangpa Nehemiah, thiampi le Thukham he mipil Ezra le mipite tungah Thukham a thiangson Levi te in mite theampo tungah, “Tuni sia na Pathian, Topa atu in thiangtho ahikom, khuangai in a kap tu na hi bua uh hi.
10 Tu in cia tavun a, anlim tuilim neakna vawt tavun. Na an le na sapittuite, neak tu a kitaangsamhte hawm tavun. Tuni sia ih Topa atu in thiangtho ahikom hee heak vun. Topa ii hong piak lungdamna in note hong thahatsak tu hi,” ci in son hi.
11 Levi te in mipite dai khipkhepin om sak a, tubang ni thiangtho ni in a hee ngawl natu in son kawkoai uh hi.
12 Amate tungah a kisim thukhamte a telthiang hu in mipite a inn uh ah cia a, lungdam takin an le tui ne in, a nei pawpo ngualdangte hawm uh hi.
Buk Poai
13 A zing ciang in bee le phung lutangte sia thiampite le Levi te taw Thukham hilnate sin tu in Ezra kungah pai uh hi.
14 Topa ii Moses tungtawnin a piak Thukham in Israel mite thaampheang buk te sungah thinnuam takin a teen zii natu a sawlna thu, amate in mu uh hi. Ref 8:14-15 Thiam 23:33-36; 39-43; Thkna 16:13-15
15 Tua ahikom amate in Jerusalem le a dang khuapite, khua theampo ah zui tu in a nuai a bangin thupia uh hi: “Thukham sungah zui tu in a ki at bangin mual tungah pai vun a, buk sak natu in taakthing baak, olive baak, myrtle baak, palm baakte le a dang thingbaakte la vun,” ci hi.
16 Tua ahiciang mipite in thingbaakte saat in amate innkhum tam tung, a leitual, biakinn suumsung le, Tui Kongpi le Ephraim Kongpi hui ah a om taangpi khawlmunte ah bukte sa uh hi.
17 A kimat na pan a cia kik mite theampo in buk sa in tuate sungah teang uh hi. Hisia in Nun ii tapa Joshua hun zawkciang, a kivawt ciil hi a, a kuama po ii thin phawngin lungdam uh hi.
18 Amate in poai hunsung ni masa pan kipan ni tawp ni dong ni simin Pathian ii Thukham khen khat veu sim uh hi. Amate in ni sali sung poaikhaam in, Thukham ii deina bangin ni liat ni in poai khupna vawt uh hi.