4
Jesus ii Ze et Thuakna
(Mark 1:12-13; Luke 4:1-13)
1 Tua zawkciang Thaa in Jesus sia Doaimangpa ii ze et tu in ngam sungah paipui hi.Ref 4:1 Heb 2:18; 4:15
2 Sun sawmli le zan sawmli an ne ngawlin a om zawkciang Jesus ngilkial hi.
3 Tuasia ciang Doaimangpa hong pai a, “Pathian Tapa na hi le suang hite anluum suaksak in,” ci hi.
4 Ahihang Jesus in zo a, “Laithiangtho in, ‘Mihingte sia anluum bek taw nungta thei hi ngawl a, Pathian kam sung pan a pusuak kammal khat sim nuntak pui hi,’ ” ci hi.Ref 4:4 Thkna 8:3
5 Tua zawkciang Doaimangpa in Jesus sia Khuapi Thiangtho Jerusalem ah paipui a, Biakinn khuvum a saangbel na ah suanhto hi.
6 “Pathian Tapa na hile nangma le nangma kitaaksuksak in, banghang ziam cile laithiangtho in ci hi,
‘Pathian in a vantunglalangte
nang huvau in sawl tu a,
na peang beak zongh
suang taw a kisutha ngawl natu in,
a khut taw hong domto tu hi.’ ” ci hi. Ref 4:6 Ps 91:11-12
7 Jesus in, “Ahihang laithiangtho in, ‘Na Topa Pathian na ze et heak vun,’ zongh ci si hi,” ci in zo kik hi.Ref 4:7 Thkna 6:16
8 Tuaciang Doaimangpa in mualsaang mama khat ii tungah paipui a, leitung ngam tuatuamte ii letna theampo lak hi.
9 “Khupdin in kei hong bia lete, hi teng theampo nang kong pia tu hi,” ci hi.
10 Tuasia ciang Jesus in, “Satan awng, tai in! Laithiangtho in, ‘Na Topa Pathian bek bia vun a, Ama atu bek sepsak vun!’ ci hi,” a ci hi.Ref 4:10 Thkna 6:13
11 Tuasia ciang, Doaimangpa in Jesus nusia a, vantung mite hong pai in Jesus ou uh hi.
Jesus Galilee ah Nasep Kipan
(Mark 1:14-15; Luke 4:14-15)
12 Jesus in John thong sungah kikhum hi, ci in a zaak ciang, ama Galilee ah pai hi.Ref 4:12 Mt 14:3; Mk 6:17; Lk 3:19-20
13 Ama Nazareth khua ah taam ngawlin, Zebulun le Naphtali ngamsung Galilee tuili hui khuapi Capernaum ah teang tu in pai hi.Ref 4:13 Jn 2:12
14 Hi bang a ngamtat sia, kamsaangpa Isaiah pauna teng a taangtun natu ahi hi.
15 “Zebulun ngam le Naphtali ngam,
Tuipi sung zotna lampi tung,
Jordan ngun lang khat,
Galilee, Gentile te ngam! Ref 4:15-16 Is 9:1-2
16 Khuazing sung a teang mihingte in,
Khuavak taang lian mama khat mu tu hi.
Thina khuazing ngamsung
a teangte tungah khuavak a taang tu hi.”
17 Tua hun pan kipan Jesus in, “Na mawna uh pan kisiik kik vun, banghang ziam cile Vantung ngam hong nai zo hi,” ci in ama thuhilnate hil tu in a kipan hi.Ref 4:17 Mt 3:2
Jesus in Ngasa mante Li Sam
(Mark 1:16-20; Luke 5:1-11)
18 Galilee tuili hui ah a va laitakin, Jesus in ngasa mante ahi unau nii Simon Peter kici le a suapuipa Andrew, tuili sungah ngeen khat taw ngasa manin a om mu hi.
19 Jesus in amate tungah, “Hong zui tavun, mihing mante kong suaksak tu hi,” ci hi.
20 Thakhatin a ngeente nusia uh a, ama zui paih uh hi.
21 Tua mun pan a paisuak uh ciang Zebedee tapate unau James le John mu hi. Amate in a pa taw ngunkuang sungah a ngeente puua in om uh hi. Jesus in amate sam hi.
22 Thakhatin a ngunkuang le a pa nusia in zui uh hi.
Jesus in Hilcian, Thuhil, Damsak
(Luke 6:17-19)
23 Jesus Galilee ngam bup ah vakin, synagogue te ah hilna nei a, Kumpingam Lungdamna Thu thuhilna nei in, natna satna namcin le ciluang natna a neite damsak hi.Ref 4:23 Mt 9:35; Mk 1:39
24 Ama thu sia Syria ngam bup ah kizel ahikom mihingte in ama kungah ciina theampo, natna satna le mealhem theampo: doai veite, butthi theite, langngawte, paipui in — Jesus in damsak siat hi.
25 Galilee ngam khuapi sawmte le Jerusalem, Judea le Jordan ngunngal panin, mihonte in zui uh hi.