26
Jesus a Kithasawmna
(Mark 14:1-2; Luke 22:1-2; John 11:45-53)
1 Jesus in hi thu teng hilna a nei zawkciang a nungzuite munah,
2 “Na heak uh bangma, ni nii zawkciang Paisan Poai hong theng tu a, tuaciang Mihing Tapa sia thinglamtee tungah thalup tu in ki aap tu hi,” ci hi.Ref 26:2 Pu 12:1-27
3 Tuaciang, Thiampi Lianbelpa Caiaphas teenna inn ah thiampi liante le upate kisitua uh a,
4 Jesus man ku in a thalup thei natu ngeal uh hi.
5 “Poai hun sungah vawt ngawl tu hi, tuabang hi thong leang, mipite hong ngamlum tu hi,” ci uh hi.
Bethany ah Jesus Sathau Kinoai
(Mark 14:3-9; John 12:1-8)
6 Jesus sia Bethany khua, a lauhuai vun natna a vei Simon a kici pa ii inn ah om hi.
7 Jesus an a neak laitakin numei khat hong pai a, a manham sathau namtui suangngo thawl dim khat hong keng a, Jesus lu tungah buak hi.Ref 26:7 Lk 7:37-38
8 A nungzuite in a mu uh ciangin a thin uuk uh hi. “Banghangin hi bangin pakvawt ziam?”
9 “Hi sathau namtui zuak leang, sum tam mama kinga tu a, mizawngte kipia thei tu hi!” ci uh hi.
10 Jesus in amate thusonnate za ahikom amate munah, “Banghangin hi sia nu thinnuam maw se nu ziam? Ama in kei atu in nasep pha nasep hoi khat hong seam ahi hi.
11 Mihing a zawngte sia note taw hong om tawntung tu ahihang kei sia, note taw hong omkhawm tawntung ngawl tu khi hi.Ref 26:11 Thkna 15:11
12 Ama in ka kivui natu in ka pumpi sia paaknamtui hong noai khol hi.
13 A tatakin kong ci ciang, hi lungdamna thu leitung theampo ah a kihil na mun po ah, ama nasep sia ama a kiphawk natu in, kison tawntung tu hi,” ci hi.
Judas in Jesus Leeheak tu in Thukim
(Mark 14:10-11; Luke 22:3-6)
14 Tua zawkciang nungzui sawm le nii sung pan khat ahi — Judas Iscariot a kici sia — thiampi liante kungah pai in,
15 “Jesus hong leeheak leng bang hong pia tu nu ziam?” ci in dongh hi. Amate in ngunn dangka sawmthum la in a sim zawkciang pia uh hi.Ref 26:15 Zec 11:12
16 Tua hun pan kipan Judas in Jesus a aap thei natu hunpha zong tan hi.
Jesus a Nungzuite taw Paisanpoai An Nekhawm
(Mark 14:12-21; Luke 22:7-14; 21:23; John 13:21-30)
17 Tol saw ngawl anluum poai ni masa ni in nungzuite Jesus kungah hong pai a, “Paisan Poai an koisungah kong vawtsak tu uh ziam?” ci in dongh uh hi.
18 “Khuapi sungah tum tavun a, pasal khat kungah, ‘Syapa in, ka hun hong theng zo hi; ka nungzuite taw Paisan Poai na inn ah vawt tu khu hi,’ ci in son tavun,” ci hi.
19 Nungzuite in Jesus sawl bangin, ngamta uh a, Paisan Poai anneak natu vawtkhol uh hi.
20 Nitak ciangin, Jesus le a nungzui sawm le niite an ne tu in to uh hi.
21 Anneak laitakin Jesus in, “A maan takin ka ci ciang note sung pan khat in kei hong leeheak tu nu hi,” ci hi.
22 Nungzuite a thin uh nuam ngawl a, khat zawkciang khat in, “Topa, kei hong ci nuam na hi bua na ziam?” ci in dongh uh hi.
23 “Ankuang sungah anluum kei taw sawk khawm sia in kei hong leeheak tu hi.Ref 26:23 Ps 41:9
24 Mihing Tapa sia Laithiangtho in thi tu hi a ci bangma in thi tu a, ahihang Mihing Tapa a leeheak sia atu in, bangza in lauhuai ziam? Tua pa atu in pian awl zaw le phazaw hi,” ci in zo hi.
25 A leeheakpa Judas in, “Syapa, kei hong ci nuam na hi bua na ziam?” ci in dongh hi. Jesus in “Nangma ci bangma ahi hi,” ci in zo hi.
Topa ii Zan an
(Mark 14:22-26; Luke 22:14-20; 1 Corinthians 11:23-25)
26 A an neak uh laitakin, Jesus in anluum bek khat la in, lungdamko thungetna a nei zawkciang, baltham in a nungzuite pia hi. “La in ne vun, hisia in ka pumpi ahi hi,” ci hi.
27 Tua zawkciang hai la in, Pathian tungah lungdamko a, amate pia hi. “Na vekpi in ne vun,
28 hi sia in ka chisan hi a, Pathian thuciamna a kipsak, mihing tam mamate mawna a kimaisak natu a bua ka chisan ahi hi.Ref 26:28 Pu 24:8; Jer 31:31-34
29 Kei kong cina pan, ka Pa Ngam sungah note taw sapittui thak ka neak mateng hi sapittui sia ka ne nawn buatu hi,” ci hi.
30 Tua zawkciang amate lasa in, Olive Mual zuanin pai uh hi.
Jesus in Peter ii Nial natu Teng Sonkhol
(Mark 14:27-31; Luke 22:31-34; John 13:36-38)
31 Tuaciangin Jesus in amate munah, “Zan ciang tatak ma in no na vekpi in taikeak in kei hong nusia siat tu nu hi, banghang ziam cile laithiangtho in, ‘Pathian in tuucingpa thatlum tu a, tuute sia kithethaang tu hi,’ ci hi.Ref 26:31 Zec 13:7
32 Ahihang nuntakna sungah hong kiphokto kik ciangin, note mai Galilee ah ka na paikhol tu hi,” ci hi.Ref 26:32 Mt 28:16
33 Peter in Jesus munah, “A dangte theampo in hong nusia zong, kei kong nusia buatu hi!” ci hi.
34 Jesus in Peter munah, “A maan takin kong ci ciang, zan ciang ak khuan ma in thumvei kei nong nial tu hi,” ci hi.
35 Peter in, “Nang taw thi khop tu a kul le zong, tuabangin hong nial ngawl tu khi hi,” ci in zo hi.
Nungzui dangte zongh in, tuabang ma in ci tek uh hi.
Jesus Gethsemane ah Thungen
(Mark 14:32-42; Luke 22:39-46)
36 Tua zawkciang Jesus in a nungzuite taw Gethsemane a kicina mun khat ah pai a, amate munah, “Zia sungah thungen a ka pai lanin hi sungah na to vun,” ci hi.
37 Ama in Peter le Zebedee ii tate nii paipui hi. Heena le thinngimna in ama khunel hi,
38 tuaciangin amate munah, “Ka thinngim mama a thi dektak khi hi. Hi sungah na om vun a, mu heak vun,” ci hi.
39 Ama sia tawm a pai zawkciang, lei ah bokcip in, thungen hi. “Ka Pa awng, ahithei le hi thuakna hai sia kei tung pan hong laaksak ta'n! Ahihang kei dei bang hi ngawlin, nangma deina bang hi tahen,” ci hi.
40 Tua zawkciang, a nungzuite thum kungah heak kik a, amate a mu sa in a om mu hi; tuaciang in Peter munah, “Bangbangin note thum in nai khat sung takpi zongh kei hong ngak zo ngawl nu ziam?
41 Na na ngak kenkon vun a, ze etna sungah na taaksuk ngawl natu in, thu na ngen vun. Thinsung in uukna nei ahihang, pumpi sia thazawm hi,” ci hi.
42 Khatvei ma, Jesus pai in thu ngen hi, “Ka Pa awng, hi hai ka dawn phot ngawl peuma in, hi thuakna hai sia hong kilaaksak ngawl tu ahile nangma deina bang hi tahen,” ci hi.
43 Khatvei ma hong heak kik a, nungzuite sia a mu sa ma in mu leleau hi; amate a mit hak zo mama ngawl uh hi.
44 Jesus in amate khatvei nusia kikin, a kammal zak ngei teng ma pau kikin, a thum veina thungen hi.
45 Tua zawkciang nungzuite kungah heak kik a, “Tu dong mu lai in tawlnga lai nu ziam? En vun! Mimawte khut sungah Mihing Tapa a ki aap tu hun hong theng zo hi.
46 Tho vun, Pai ka tawng. En vun! Kei hong leeheakpa hi sungah om hi!” ci hi.
Jesus Kimatna
(Mark 14:43-50; Luke 22:47-53; John 18:3-12)
47 Jesus sia tuabangin a papau laitak, nungzui sawm le nii sungah khat ahi Judas hong theng hi. Namsau le moltawng a toai, thiampi liante le upate ii a sawl mihon khat, ama in hong tonpui hi.
48 Ngual leeheakpa in mihonte munah lim khat lak zo hi: “Ka nap tu pa sia na dei uh mihingpa hi tu hi. Man vun!” ci hi.
49 Judas in Jesus kungah tangtan in pai a, “Thupha nga ta'n, Syapa,” ci in namh hi.
50 Jesus in zo a, “Na sep tu po seam memeang in, lawm awng!” ci hi.
Tua zawkciang amate hong pai in, Jesus man in lencip uh hi.
51 Jesus taw omkhawm khat in, a namsau dokin Thiampi Lianbelpa ii salpa saat a, a bil saattan hi.
52 Jesus in, “Na namsau thun kik in. Namsau a zamhte sia namsau taw ma in thi tu hi,” ci hi.
53 “Ka Pa munah hu ngen nuam hi leng ama in vantung ngalkap hon sawm le hon nii sangin a tamzaw thakhat thu in, hong puak tu ahi hunlam he ngawl nu ziam?
54 Ahihang tuabang hi thong le, Laithiangtho in hi teng tung tu hi, a ci sia koibangin tung nawn tu ziam?” ci hi.
55 Tua zawkciang mipite tungah Jesus in, “Mihing that taiku bangin hong ngaisun a, namsau le moltawng taw kei man tu in hong kuan na hi uh ziam? Ni simin Biakinn sungah to in hilna ka nei lai in, nong man bua uh hi.Ref 26:55 Lk 19:47; 21:37
56 Ahihang hite theampo sia kamsaangte ii Laithiangtho sung a at teng a taangtun natu ahi hi,” ci hi.
Tuaciangin a nungzuite theampo ama nusia in taikeak uh hi.
Council mai ah Jesus
(Mark 14:53-65; Luke 22:54-55; 63-71; John 18:13-14,19-24)
57 Jesus a mante in Thiampi Lianbelpa Caiaphas inn ah paipui uh a, tua munah Thukham hil Syate le upate kikhawm uh hi.
58 Peter in a khuala thithim na panin Thiampi Lianbelpa leitual dong zui hi. Ama sia leitual ah ngalkapte taw tokhawm in bangbangin thu hong piang ziam ci in encik hi.
59 Thiampi liante le Council bup in Jesus a thalup thei natu in, leilot tetti pawlkhat zon tu in hanciam uh hi,
60 mihing tam mama hong pai uh a, ama huvau leilot thu tam mama son ahitazong, a mat thei natu thu, bangma a mu bua uh hi. A khakbel ciangin, pasal nii hong ding a,
61 “Hisia pa in Pathian ii Biakinn baltham in ni thum sung ka sa kik thei tu ci hi,” ci hi.Ref 26:61 Jn 2:19
62 Thiampi Lianbelpa hong ding a Jesus munah, “Nang tungah maw hong kisuanhte na zo kik natu he ngawl ni ziam?” ci hi.
63 Ahihang Jesus a huthe bua hi. Khatvei ma Thiampi Lianbelpa in ama tungah, “A nungta Pathian min taw nang sia kiciamna hong vawtsak khi hi: Pathian Tapa Messiah na hi ziam, hong son ta'n,” ci hi.
64 “Nangma ci bang ahi hi. Ahihang na vekpi tungah kong ci hi: tu pan kipan Mihing Tapa sia Vaanglianbelpa ii ziatsang ah to a, van a meeikaai tung pan hong pai na mu tu uh hi!” ci hi.Ref 26:64 Dan 7:13
65 Tuasia ciangin Thiampi Lianbelpa in, a puan hong baltham a, “Pathian zawnsakna kampau pa! Tetti dang kul nawn ngawl hi. Pathian min a daisak na sia na zaak tek uh hi.Ref 26:65-66 Thiam 24:16
66 Bangbang ngaisun tu nu ziam?” ci hi.
Amate in, “Ama sia mawnei hi, a thi kul hi,” ci uh hi.
67 Tua zawkciang amate in, a maitang cilphii in, saat uh hi; tuaciangin a beangte in, Ref 26:67 Is 50:6
68 “Messiah awng, hong beang sia akua ziam, hong son thei ka sin in,” ci uh hi.
Peter in Jesus Nial
(Mark 14:66-72; Luke 22:56-62; John 18:15-18; 25-27)
69 Peter sia leitual ah to in a om laitak Thiampi Lianbelpa ii naseam numei khat hong pai a, “Nang zongh Galilee mi Jesus taw a kithawl khat hi ngawl ni ziam?” ci hi.
70 Ahihang amate theampo ii zaakna ah, ama in nial hi, “Na son thu sia he ngawl khi hi,” ci hi.
71 Tuaciangin leitual tumna kongbiang ah pai hi. Naseam numei dang khat ma in mu a, “Ama sia Nazareth khua mi Jesus taw a kithawl khat hi,” ci in mite tungah son hi.
72 Peter in nial leleau a, “Tuasia pa he bong ci in kiciam khi hi,” ci in zo hi.
73 Tua zawkciang tua munah a ding pasal pawlkhat in Peter kung hong zuan a, “Nang zongh ama mite khat ma hi tatak ni hi. Bangpo na ci zong na pau zia in nang sia hong pholaak hi,” ci uh hi.
74 Tuasia ciang Peter in, “Thumaan son khi hi, ci in kiciam ing! thumaan son ngawl ka hile Pathian in daan hong pia tahen! Mihing ziasia pa he ngawl khi hi!” ci hi.
Tua zawk hiat ciangin ak khuang hi.
75 Peter in Jesus ii ama tungah “Ak khuan ma in thumvei hong nial tu ni hi,” ci in a son teng phawk hi. Ama pusuak in nasia takin kap hi.