16
Nalamdang Ngetna
(Mark 8:11 -13; Luke 12:54-56)
1 Pharisee te pawlkhat le Sadducee te pawlkhat Jesus kungah hong paite in ama sia Pathian thukimpui ahile ahi ngawl a tel nopna in, aitaa in, nalamdang lakna khat a vawt tu in ngen uh hi.Ref 16:1 Mt 12:38; Lk 11:16
2 Ahihang Jesus in, “Nitum laitakin ‘Van san ahikom, khua pha vak’ na ci uh hi.
3 Tuaciang zingtuung in ‘Van san a, niim ahikom nguazu vak’ na ci uh hi. Van en in khuahunte sonkhol thei nu hi, ahihang hi hunte taw kisai in limte na khia thei bua uh hi!
4 Hi hun ah mihingte bangza in khansia a Pathian um ngawl ziam? Nalamdang lakna hong ngen na hi uh ziam? Vawt ngawl tu khi hi! Jonah nalamdang lakna khat sia bekma note tungah hong kipia tu hi,” ci hi.Ref 16:4 Mt 12:39; Lk 11:29
Tuaciang, amate nusia in paisan hi.
Pharisee te le Sadducee te ii Tol
(Mark 8:14-21)
5 Nungzuite tuili ngalkhat ah a pai uh ciangin anluum a ken tu mangil uh hi.
6 Jesus in, “Kidawm vun; Pharisee te le Sadducee te ii tol panin kidawm tavun,” ci hi.Ref 16:6 Lk 12:1
7 Amate kikum uh a, “Hi bang a hong ci sia anluum ih ken ngawl hang ahi ka tawm,” ci uh hi.
8 Jesus in amate bang teng kikum ci in he a, “Banghangin anluum na nei ngawl uh teng po kikum nu ziam? Na upna uh bangza no ziam!
9 Tel thei ngawl lalai na hi uh ziam? Anluum nga baltham in mihing tulnga in a neak lai in, khum bangza dimh kana nu ziam?Ref 16:9 Mt 14:17-21
10 Tuaciang anluum sali sia mihing tulli in bangbangin ne kana ziam? Khum bangza dimh kana nu ziam?Ref 16:10 Mt 15:34-38
11 Tua ahile anluum huvau ka sonna hi ngawl ahi hunlam tel thei ngawl nu ziam? Pharisee te le Sadducee te ii tol panin kikeam tavun!” ci hi.
12 Tuaciang nungzuite in anluum sung a tolte pan a kikep tu thuson hi ngawl a, Pharisee te le Sadducee te ii hilna panin kikep natu son ahi hunlam tel uh hi.
Jesus huvau Peter ii Sonthiangna
(Mark 8:27-30; Luke 9:18-21)
13 Jesus in Caesarea Philippi khuahui ngamkhen ah pai a, tua munah, “Mihing Tapa sia ngual in akua ci ziam?” ci in a nungzuite dongh hi.
14 “Pawlkhat in Tuiphumpa John hi hong ci a pawlkhat in Elijah hi hong ci hi, tuaciang a dangte in Jeremiah ahibuale kamsaang dang khat hi vak hong ci uh hi,” ci in zo uh hi.Ref 16:14 Mt 14:1-2; Mk 6:14-15; Lk 9:7-8
15 “Note in kei sia akua hi nong ci uh ziam?,” ci in dongh hi.
16 Simon Peter in zo a, “Nang sia Messiah, a nungta Pathian Tapa na hi hi,” ci hi.Ref 16:16 Jn 6:68-69
17 Jesus in, “John tapa Simon awng, nang sia mihing hampha khat na hi hi! Hi thutak sia mihing chi le sa sung pan nang tung a hong pai ahi bua a, vantung a ka Pa kung pan in, hong kipia thu ahi hi,” ci hi.
18 “Tuaciang, a maan takin kong ci ciang, Peter awng: nang sia suangpi na hi hi, tuaciangin, hi suangpi phungkawng tungah ka pawlpi ka phut tu a, thina ngawngawn zongh in a zo zo buatu hi.
19 Vantung ngam tawtangte nang kong pia tu a, leitung a na khakte vantung ah kikhak tu a, leitung a na honte vantung ah kihon tu hi,” ci hi.Ref 16:19 Mt 18:18; Jn 20:23
20 Tua zawkciang, ama sia Messiah ahi hunlam kuama munah a son ngawl natu in a nungzuite munah thupia hi.
Jesus in A Thuak natu le A Thi natu Sonkhol
(Mark 8:31—9:1; Luke 9:22-27)
21 Tua hun panin kipan a nungzuite munah Jesus in thiang takin son a, “Jerusalem ah ka pai kul tu a, upate, thiampi liante le Thukham hil syate tung panin, nasia takin thuak tu khi hi. Hong kithatlum tu a, ahihang, ni thum zawkciang, nuntakna sungah hong kiphongto kik tu hi,” ci hi.
22 Peter in Jesus sia samtuamin teih hi. “Topa awng, tuabangin na thuak tu sia Pathian in hong khaam tahen! Tuabang peuma in, nang tungah hong piang heak hen!” ci hi.
23 Jesus kingeilee in, Peter munah, “Kei kung panin tai in, Satan awng! Nang sia kei mai hong khaktan na hi hi, banghang ziam cile hi khua ngaisutnate sia Pathian kung panin hong pai hi ngawlin, mihing pianzia sung pan hong pai ahi hi,” ci hi.
24 Tua zawkciang Jesus in a nungzuite munah, “Khat po in kei hong zui nuam le ama le ama kinial in, a thinglamtee pua in, ka nung hong zui tahen.Ref 16:24 Mt 10:38; Lk 14:27
25 Banghang ziam cile, a nuntakna a huu nuam sia in taan tu a, ahihang kei hu a, a nuntakna a taan sia in nuntakna mu tu hi.Ref 16:25 Mt 10:39; Lk 17:33; Jn 12:25
26 Mihing khat in leitung theampo a nga zonghin, ama nuntakna a taan le bang meetna nei tu ziam? Meet ngawl tu hi! Ama nuntakna a nga kiksak natu a piak thei khat zongh om ngawl hi.
27 Banghang ziam cile Mihing Tapa in Pa vaangletna le a vantunglalangte taw hong pai ciangin, ama in mihing khat sim ii a sepna babangin thaman pia tu hi.Ref 16:27 Mt 25:31; Ps 62:12; Rom 2:6
28 A tatak kong ci ciang, hi lai ah a om mihing pawlkhatte ahile, Mihing Tapa Kumpipa in hong pai a mu mateng in a thi buatu hi,” ci hi.