14
Tuiphumpa John Thina
(Mark 6:14-29; Luke 9:7-9)
1 Tua hun laitakin Galilee ngamukpa Herod in Jesus thu za hi.
2 A uliante munah, “Ama sia Tuiphumpa John hong nungta kik hi nanak tu hi, ci hi. Tua hu in, nalamdang lakna vawt theina vaang nei hi tu hi,” ci hi.
3 Banghang ziam cile Herod in John a kimat natu thupia zo a, thong sungah khum hi. Hi bangin a vawt na sia Herod in a suapuipa Philip zi Herodias a teenpui hang ahi hi.Ref 14:3-4 Lk 3:19-20
4 Tuiphumpa John in Herod munah, “Herodias sia na teenpui tu hi ngawl hi,” ci ngei zo hi.Ref 14:4 Thiam 18:16; 20:21
5 Herod in ama thatlum nuam ahihang, Jew mite kiita hi, banghang ziam cile Jew mite in John sia kamsaang khat hi ci in ngaisun uh hi.
6 Herod suani in a kikhawmte mai ah Herodias tanu laam hi. Herod lungkim mama a;
7 “Nong nget pawpo kong pia tu hi, ci in ka kiciam hi!” ci in kamciam pia hi.
8 A nu sawl bangin, “Hi sungah tu ma in, kuangdal khat sungah John ii lutang hong pia ta'n!” ci hi.
9 Kumpipa sia khuangai hi, ahihang leangnate mai ah, kamciam a piaksa ahikom a nget bangin, a kivawt natu thupia hi.
10 Tua ahikom thong inn sungah John ii ngawng tansak hi.
11 A lutang sia kuangdal tungah koi in, ngaknu nu kipia a, ama in a nu pia sawn hi.
12 John nungzuite hong pai a, a luang pua in phum uh hi; tua zawkciang amate pai in Jesus munah son hi.
Jesus in Mihing Tulnga Vaak
(Mark 6:30-44; Luke 9:10-17; John 6:1-14)
13 Jesus in John thute a zaak ciangin, ngunkuang khat sungah to in, a ngamkhingna mun khat ah ama nguakin pai hi. Mipite in tua thu za ahikom a khuapi uh nusia in leilam panin ama zui uh hi.
14 Jesus in a ngunkuang tung pan tuak a, mihonpite a mu ciangin, tua mite hesuakhuai sa in ciinate damsak hi.
15 Tua nitakin a nungzuite in ama kungah hong pai uh a, “Tu in ni zongh niam mama zo hi. Hi mun sia ngamkhing mun ahi hi. Mihonpite paisak in a, khuano sungah amate le amate neak tu an leisak lete pha hi,” ci uh hi.
16 “Amate paisak kul bo, amate neak tu an note in pia vun,” ci hi.
17 “Hi sungah ih nei theampo kingawm in anluum nga le ngasa nii hi,” ci in zo uh hi.
18 “Tua ahile tuate keima kungah hong paipui tavun,” Jesus in ci hi.
19 Ama in mipite sia lopa tung a to siat natu in thupia hi; tua zawkciangin anluum nga le ngasa nii te la in, van ento a, Pathian munah lungdamko hi. Ama in anluumte baltham in nungzuite pia a, nungzuite in mipite pia sawn uh hi.
20 mi sim in ne in kham tek uh hi. Tua zawkciangin nungzuite in, a kham vaal uh khum sawm le khum nii dim in seng uh hi.
21 Numei le patang simngawl, pasal an ne sia tulnga bang pha uh hi.
Jesus Tui tungah Lampai
(Mark 6:45-52; John 6:15-21)
22 Mipite a inn tek ah cia in a sawl zawkciang, tuili ngal ah paikhol tu in, Jesus in a nungzuite ngunkuang sungah tosak hi.
23 Mipite a ciasak siat zawkciang, ama nguakin mual tungah thungen tu in kaato hi. Nitak khuaniam hun dongin Jesus in tua munah ama nguakin om hi;
24 tua hun laitakin ngunkuang sia tuili sungah khuala ma theng zo a, vui va ahikom ngunkuang sia tuihual in lok zazaan hi.
25 Zingsang nai thum le nai luk kilaklaw in, Jesus in tui tung nungzuite sangah hong pai hi.
26 Tui tungah a pai a mu ciangin, amate patau mama uh hi. “Thithaa hi tu hi!” ci in lau in ciik au uh hi.
27 Jesus in amate tungah thakhatin, “Na thin uh kiliansak vun! Lau heak vun! Keima khi hi,” ci in paupui hi.
28 Tuasia ciangin Peter in, “Topa na hi takpi le nangma kungah tui tungah kong pai thei natu in thu hong pia ta'n,” ci hi.
29 “Hong pai ta'n!” Jesus in ci hi. Tua ahikom Peter sia ngunkuang sung pan pusuak a, tui tung Jesus kungah lampai tu in kipan hi.
30 Ahihang vui va ngawp sia a mu ciangin lau in tui sungah taaksuk tu in kithoai hi. “Topa hong hun ta'n!” ci in au hi.
31 Thakhatin Jesus in ama zamh in, “Upna no pa awng, banghangin muang la ni ziam?” ci hi.
32 Amate nii sia ngunkuang sungah hong thengin vui zongh thim hi.
33 Tuasia ciangin ngunkuang sung a om nungzuite in Jesus bia uh hi. “Pathian Tapa takpi ma na hi hi!” ci in au uh hi.
Gennesaret ah Jesus in Ciina Damsak
(Mark 6:53-56)
34 Amate sia tuili kaantan in Gennesaret vaalbo ah kaa uh hi,
35 Tua munah mihonte in Jesus ahi hunlam he uh hi. Tua ahikom kiimkot ngamte ah ciinate vaitha in, Jesus kungah paipui uh hi.
36 A puanmong beak ahizong ciinate a thamsak natu in, ama tungah ngen uh hi. Tuaciang a puanmong a tham theampo damsak hi.