MATTHEW
Teptee bang Lungdamna Thu
Matthew thubu sia belcing takin a kingual ahi hi. Jesus suana panin kipan a, a ki baptize na le ze et a thuaknate ki at a, a zom in Galilee ngam ah thuhilna le ciinate a damsakna thute ki at hi. Tua zawkciang hi Lungdamna Thu in, Jesus Galilee ngam pan Jerusalem ah a khualhawna, Jesus a nuntak nipi khakbel sung thu, a kithalupna thu le a thaw kikna thute ki at hi.
Hi Lungdamna Thu in “Jesus in a lianbel Sya hi a, Pathian thukham pheen thei natu thunei pa, Pathian ukna ngam huvau a hilpa hi,” ci in lak hi. Ama ii hilnate thu nam nga in kikhawmtua a, (1) Mualtung thuhilna, Vantung ngammite ii nuntakzia, a nasep, a hamphatna le a thetna mun tu thute hi a (a lian 5-7); (2 )Nungzui sawm le nii teng nasep zia tu hilna (a lian 10); (3) Vantung ngam omzia thusonteena (a lian 13); (4) Nungzuina ii a khiakna hilna (a lian 18); le (5) Hun bo kuan thu le hong pai tu Pathian Ukna-ngam thute hilna (a lian 24-25).
1
Jesus Christ ii Taanghpupite
(Luke 3:23-38)
1 Abraham ii suan, David ii tu le ta ahi, Jesus Christ ii taanghpupite ii min tepteena lai sia hi bang hi a,
Abraham pan David kumpipa dong, a taanghpupite ii minte a nuai a bang ahi hi.
2 Abraham ta Isaac, Isaac ta Jacob, Jacob ta Judah le a suapuite ahi hi.
3 Judah in a zi Tamar taw Perez le Zerah hing a, Perez ta Hezron, Hezron ta Ram,
4 Ram ta Amminadab, Amminadab ta Nahshon, Nahshon ta Salmon,
5 Salmon ta Boaz hi. Boaz ii nu sia Rahab ahi hi. Boaz in a zi Ruth taw Obed hing a Obed ta Jesse hi.
6 Jesse ta sia David Kumpipa ahi hi. David pan Babylon khua ah Israel mite salin a kimat hun dong, a nuai a bangin taanghpupite khang kiciamtee hi. David in Uriah zi taw Solomon hing a,
7 Solomon ta Rehoboam, Rehoboam ta Abijah, Abijah ta Asa,
8 Asa ta Jehoshaphat, Jehoshaphat ta Jehoram, Jehoram ta Uzziah
9 Uzziah ta Jotham, Jotham ta Ahaz, Ahaz ta Hezekiah,
10 Hezekiah ta Manasseh, Manasseh ta Amon,
11 Amon ta Josiah, Josiah ta Jehoiachin le a suapuite ahi uh hi.Ref 1:11 2 Kum 24:14–15; 2 Khang 36:10; Jer 27:20
12 Babylon ah salin a kiciapui pan kipan Jesus khang dong a nuai a bangin taanghpupite khang kiciamtee hi. Jehoiachin ta Shealtiel, Shealtiel ta Zerubbabel,
13 Zerubbabel ta Abiud, Abiud ta Eliakim, Eliakim ta Azor,
14 Azor ta Zadok, Zadok ta Achim, Achim ta Eliud,
15 Eliud ta Eleazar, Eleazar ta Matthan, Matthan ta Jacob,
16 Jacob ta Joseph hi a, Christ kici Jesus Nu Mary pasal ahi hi.
17 Tua ahikom Abraham khang panin David khang dong khang sawm le khang li hi a, David khang pan Babylon ah salin a kipaipui uh dong khang sawm le khang li, Babylon te mat hun pan Messiah sua dong khang sawm le khang li ahi hi.
Jesus Christ Suana
(Luke 2:1-7)
18 Jesus Christ suana sia hi bang ahi hi. A nu Mary sia Joseph taw teang tu in a kidongh sa ahi hi. Ahihang a kiteen uh ma in, ama Thaa Thiangtho taw naungil om hi.Ref 1:18 Lk 1:27
19 Joseph sia thumaan a ngamta tawntung pa khat hi a, ahizong ngual mai ah Mary maimawlsak nuam ngawl ahikom amate nii bek vaihawm in kikhen sawm hi.
20 Tuabangin a ngaisut laitakin, Vantunglalang khat a mang sungah hong kilak a “David ii suan Joseph awng, Mary sia na zi tu in teenpui kiita heak in. Banghang ziam cile ama sia Thaa Thiangtho in ngaisak hi.
21 Ama in tapa khat hong hing tu a, a min Jesus ci in na phuak tu hi — banghang ziam cile ama in a mite mawna pan a hun tu hi,” ci hi.Ref 1:21 Lk 1:31
22 “Tu in hite theampo a pianna sia Topa kamsaangpa sonkhol teng a taangtun natu ahi hi.
23 Ngaknu thiangtho khat naungil om tu a, tapa khat hing tu hi, a min Immanuel kiphuak tu hi.” Tua in “Eite taw Pathian omkhawm hi,” a cinopna hi. Ref 1:23 Is 7:14 (LXX)
24 Joseph khanglo in vantunglalang ii sawl bangma in Mary teenpui hi.
25 Ahihang taciil nau a sua dong a zi ompui ngawl hi. Tuaciang Joseph in nau min Jesus ci in phuak hi.Ref 1:25 Lk 2:21