2
1 Vaanglianbelpa Topa in thiampite tungah, “Hi thupiakna sia note atu hi:
2 Na sep, na vawtna taw keima nong patoai uh kul tu hi. Kong ci bangin nong ngai bua uh le no tungah haamsiatna kong tungsak tu hi. Na kivaak natu a, na saan uh vanhte tungah haamsiatna ka tungsak tu hi. A tatakin ci leang, tuate tungah, haamsiatna tungsak zo khi hi, banghang ziam cile kong thupiakte no in na thupi sim bua uh hi.
3 Na tate daan ka pia tu a, na sangaw biakpiakna nganhingte ii eak sungah na mai kong taat tu hi — tuaciang note eak kholna munah hong kipaipui tu hi.
4 Tua zawkciang Levi suan le paal thiampite taw ka thuciamna a peal ngawl natu in hi thupiakna kong piak hunlam na he tu uh hi. Ref 2:4 Mi 3:11-13
5 “Amate ii hong thasia thei natu in ka thuciamna sungah ka kamciamsa nuntakna le nopsakna ka pia hi. Tua hunlai in amate in kei hong zakta a hong kiita uh hi. Ref 2:5 Mi 25:12
6 Amate in a maante hil a, a maan ngawlte hil ngawl hi. Amate in kei taw hi vadiamin nungta uh a; amate mama in a maan teng a sep dom ngawlin midang tam mamate zongh siatna a vawt ngawl natu in hu uh hi.
7 Pathian a maan bang a heak takpi natu in hilna sia thiampite vaipuak ahi hi. Mite in amate kungah pai in ka deina a sin kul hi, banghang ziam cile amate sia Vaanglianbelpa Topa ii kamtaite ahi uh hi.
8 “Ahihang tu in no thiampite in lampi maan panin na pial zo uh hi. Na hilna in mihing tam mama khialsak hi. No taw ka vawt thuciam sia paltan zo nu hi.
9 Note in ka deina nong ni bua uh a, ka mite na hil uh ciang zong, khat le khat doidan na hi uh ciang, Israel mite in note kong simmawsak kik tu hi.
Mihingte ii Pathian tungah A Thumaan ngawlna
10 Eite theampo in a kibang pa nei kana ngawl hi ziam? A kibang Pathian in eite theampo hong bitphua kana ngawl ziam? Tua ahile eite khat le khat, ih kamciamte banghangin paltan a, ih taanghpupite taw Pathian ii a vawt thuciam sia banghangin zawnsak vawt tu hi ziam?
11 Judah mite in Pathian tungah a kamciamte paltan a Jerusalem le ngamsung bup ah a thasiathuai mama khat vawt uh hi. Amate in Pathian ii a it Biakinnpi sia ninsak uh hi. Pate in ngamdang pathiante a bia numeite teenpui zo hi.
12 A kuama po hi bangin a ngamtate sia Topa in Israel taangpite sung pan heam tahen a, Vaanglianbelpa Topa tungah ih minamte ii a paipui biakpiakna sungah kihel kiksak nawn heak hen.
13 Na ngamtatna dang khat sia hi bang hi. Ama tungah na biakpiaknate hong saang nawn ngawl ahikom kap a tau in, Topa biaknatau sia na thitui taw na khuumsak uh hi.
14 Banghangin hong kisaang nawn ngawl ziam ci in na dongh uh hi. Tua thu in na khanmoi lai a na teenpui na zi tungah na kamciamna paltan zo na hi sia a heak hu ahi hi. Na zi sia na koppui hi a, ama tungah a thumaan pasal ka hi tu hi ci in Pathian mai ah kamciam pia napi na paltan zo hi.
15 Pathian in ama le nang pumkhat thinkhat tu in hong vawt hi kana ngawl ziam? Hi thu ah ama ii tupna bang ziam? Pathian mite tatak ahi tu in tate na nei natu ahi hi. Tua ahikom note kuama in a zi tungah a piak kamciam paltan peuma heak hen.
16 Israel ii Topa Pathian in, “Nupa kikhulna ngaimaw khi hi. Note khat po in a zi tungah tuabang a ngitlo ciang ngaimaw khi hi. Na zi tungah na thumaan tu a, na kamciam na paltan ngawl natu in kidawm in,” ci hi.
Thukhenna Ni hong Nai hi
17 Na kampauna uh taw Topa toisak nu hi. Ahihang, “Ama bangbangin toisak khu ziam?” ci in dongh nu hi. “Vaanglianbelpa Topa in ngamtat siate theampo phasa hi; tuabangte diksa takpi hi,” ci nu hi. Tua ahibuale, “Thutangin ih heen Pathian sia koisungah om hi tu ziam?” ci in dongh nu hi.