2
Mizawngte A zawthawk vawt te ii Thuak tu Thu
1 Mutmawklaw liangin thusia a ngealte atu in bangza in lauhuai tu ziam! Amate in zingsangin hunpha a nga pawpo ciang a ngeal sa tatsiatna sia vawt uh hi.
2 Amate in lote a dei uh ciang suttol uh hi; innte a dei uh ciang laksak uh hi. A kuama po ii innkuan, ahibuale neisa bit ngawl hi.
3 Tua ahiciang Topa in, “No tungah tuasiatna puak tu in ngeal khi hi, tuaciang note suakta thei ngawl tu nu hi. Ngimnga in na om uh kimu tu nu hi; tuaciang kiphasak in vak nawn ngawl tu nu hi.
4 Tua hun a tun ciang, mite in no sia tuasiatna huvau sonteena in hong nei tu hi, noma thuakna teng khuangai la in na sa tu uh hi:
Eite ih lalcip dikdek zo hi!
Topa in ih ngam ih lei la zo a,
tuaciang ei hong mante tungah
tuasia kipia zo hi,” ci tu uh hi.
5 Tuabang ahiciang Topa mite tungah leitang a kipiak kik tu hun a thet ciang note kuama atu tel om ngawl tu hi.
6 Mipite in kei tung ah, “Ko, thu hong hil heak in. Tuabang thute hong hil heak in. Pathian in kote hong maimawlsak ngawl tu hi.
7 Israel mite haamsiatna thuak sa nu ziam? Topa in a thin sausak zo nawn ngawl ziam? Tuabang tatak ma in vawt tu ziam? A maan in a seamte ama in dikna taw paupui hi ngawl ziam?” ci in thu hong hil hi.
8 Topa in, “Noma in ka mite sia ngalte bangin sim nu hi. Pasalte ngalphual pan cia a, inn ah ngam muangin om tu kisa hi, ahihang note tualai ah om in a silh lai laktong puasilhte nguksak tu in na ngak uh hi.
9 Ka mite sung pan numeite sia a it a innte pan na hawlkeak tu uh a, a tate tung pan ka thuphate a tawntungin na sut uh hi.
10 Tho vun a, pai vun; hi lai ah ngam muanna om nawn ngawl hi. Na mawnate in hi mun siasak in lalna sung then hi.
11 “Hi mihingte ahile, ‘Sapittui le zu no atu in hong luang tu hi ci in kamsaanna kong son hi’ ci in leilot thu bebek sonin a vak, ngualtheam kamsaang namte, dei uh hi.
12 “Ahihang no Israel mi a taanglai theampo kong kaikhawm tu hi. Tuute a khawk sungah a cia bangin kong khawmtua tu hi. Tuute a dimin a om nganthana mun bangin na ngam sia mihing tam mama taw khatvei kidim kik tu hi,” ci in zo kik hi.
13 Pathian in amate atu in lampi honsak tu a, a saltanna mun pan suatak tu hi. Amate in khuapi kongpite suthamin suakta tu uh hi. A kumpipa ahi, Topa mama in amate pusuapui tu hi.