6
1 Topa in Moses tungah a nuai a ngeinate pia hi.
2 Mihing khat tungah Israel a mipui khat in sum koi a, a koina pa in pia kik nuam ngawl ahizong, ama na nguksak ahizong, a theam ahizong,
3 a bo vanh khat mu napi leilot a mu bong ci in a kiciam ahile zong, Topa tungah maw ahikom biakpiakna khat a vawt kul hi.
4-5 Hi bang khat pawpo taw mihing khat in a maw a khial ciang thumaan ngawlin a nga vanh pawpo pia kik hamtang tu hi. A khialna a kimu ni in, a neipa tungah a cingin pia kik tu a, zakhat ciang kul taw belap tu hi.
6 Ama in Topa tungah ama ii khialphel biakpiak natu in a mealhem ngawl tuutal ahibuale kealtal khat thiampipa kungah paipui tu hi. A man sia khensat ngeina om bang hi tu hi. Ref 6:1-7 Mi 5:5-8
7 Tua pa mawmai natu in, thiampipa in biakpiakna piaksak tu a, ama khialna kimaisak tu hi.
Sangaw taw Pum bup Meihal Biakpiaknate
8 Topa in Moses tungah,
9 Aaron le a tapate ii meihal biakpiaknate a piak ciang a nuai a ngeinate a zui tu in thupia hi. Meihal biakpiakna sia zankhuateak biaknatau tungah kinusia tu a, tuaciang tua mei sia kuang tansak tu hi.
10 Tuaciang thiampipa in puanneal ngoaipuan tom le puanneal puantual sil a, biaknatau ah vut teng luakin, biaknatau pangh ah sung tu hi.
11 Tuaciang ama in a puan laih tu a, ngiaphual puasang biakna taw kisai a thiangthona munah vutte bua tu hi.
12 Biaknatau ah mei kuang topsak tu a, mitsak ngeingawl tu hi. Zing simin thiampipa in thing thut thua tu a, meihal biakpiakna vawtin, kipawlkhop biakpiakna sathaute hal tu hi.
13 Biaknatau ah mei kuang topsak tu a, mitsak ngeingawl tu hi.
Antang Biakpiaknate
14 A nuai a te sia antang biakpiakna ah zui tu ngeinate ahi hi. Aaron suan thiampipa in biaknatau mai Topa tungah antang biakpiakna pia tu hi.
15 A vekpi in Topa tungah a kipia a hina thu heaksakna in ama in khutdim khat anvui le sathau, a tungah ngimnamtuite buakin, biaknatau ah hal tu hi. Hi biakpiakna ii ngim in Topa lungkimsak hi.
16-17 A taanglai teng thiampite in ne tu hi. Tuate tol kisaw ngawl anluum in ki em tu a, Topa ompuina Puanbuk suumsung a thiangtho munah kine tu hi. Tua sia an taw biakpiaknate a khensak bangin Topa ii thiampite a piaksa hi. Tua in mawphel biakpiakna le khialphel biakpiaknate bangin thiangtho mama hi.
18 Maisang hun theampo atu in Aaron suan le paal peuma in Topa tungah a kipia ante amate nga bangin ne tan thei tu uh hi. Midang khat pawpo tua biakpiakna an a thutha sia, a thianthona vaang in ngim ngasak tu hi.
19 Topa in Moses tungah,
20 Aaron suan thiampi khat thupha piak kipsak natu taw kisai ngeinate pia hi. Thupha piak kipsakna a nga ni in Topa tungah anvui kilogramme khat ni sim antang biakpiakna za taw a kikim zingsangin a lang, nitakin a lang pia tu hi.
21 Tuate sathau taw hel tu a, moh emna taw minsak in, balneen tu a, Topa tungah antang biakpiakna in pia tu hi, a ngim in Topa lungkimsak hi.
22 Maisang hun theampo ah Aaron suan peuma Thiampi Lianbel a sep ciang hi biakpiakna vawt tu hi. Tua antang sia Topa tungah sangaw biakpiakna bangin kihal tum tu hi.
23 Thiampipa ii a piak antang biakpiaknate tawm zongh kine thei ngawl hi; tua teng a kihal siat kul tu hi.
Mawphel Biakpiaknate
24 Topa in Moses tungah Aaron le a tapate in
25 a nuai a ngeinate mawphel biakpiakna a piak ciang a zui tu in thupia hi. Meihal biakpiak natu in sa a kingawna mun, biaknatau saksang ah mawphel biakpiak natu in nganhing kingo tu hi. Tua in a thiangtho mama biakpiakna ahi hi.
26 Sangaw biakpiakna a pia thiampipa in a piak nganhing sate, Topa ompuina Puanbuk suumsung mun thiangthona ah ne tu hi.
27 Mihing khat pawpo ahibuale na khat pawpo in tua nganhing sa a thutha le tuasia ii thianthona vaang in ngim ngasak tu hi. Tua sachi puan khat po tungah a baang tha le tuasia mun thiangtho na ah sawp kul tu hi.
28 Sa huanna leibeal khat pawpo sia kisutham tu a, thikbeal a kizangh le nawt thiang in, tui taw silthiang tu hi.
29 Thiampi innkuanpui pa pawpo in hi biakpiakna sa ne thei tu hi; tua biakpiakna sia thiangtho mama hi.
30 Ahizong Puanbuk sungah sachi kipaipui in, mawmai natu in a zeksa vawtna ah a kizangh le tua sa kine ngawl het tu a; tuasia a kihal kul tu hi.