4
Vawtthaak Mawna Khialnate atu Biakpiaknate
1 Topa in Moses tungah,
2 a maw a khial mihing khat in tupkhol ngawlin Topa thupiakte khat pawpo a paltan ciang, a zui tu a nuai a ngeinate Israel mite tungah a son natu in thupia hi.
3 A maw a khial sia Thiampi Lianbelpa hi a, mipite tungah mawna khialna hong then ahile, ama mawna khialna hangin a mealhem ngawl khuital no khat Topa tungah sangaw biakpiakna in pia tu hi.
4 Ama in Puanbuk kongbiang ah khuital paipui tu a, a lu tungah a khut nga in Topa mai ah ngo tu hi.
5 Tuaciang Thiampi Lianbelpa in khuital chi pawlkhat la in, Puanbuk sungah tumpui tu hi.
6 Ama in a khutme, chi sungah pap tu a, a thiangtho puankhai mai ah salivei the tu hi.
7 Tuaciang ama in chi pawlkhat, Puanbuk sung ngimnamtui biaknatau kingte ii a dokna teng noai tu hi, a taanglai chi teng Puanbuk kongbiang ah a om, meihal biakpiakna in a kizangh biaknatau bul ah sung tu hi.
8 Hi khuital tung pan a thau teng theampo, a sungthaute,
9 a nauta le a nauta tuam a thaute, le a thinsa phabel la tu hi.
10 Thiampipa in tua a thau teng la tu a, kipawlkhop biakpiakna in a kingo nganhingte tung pan a thaute a hal bangin meihal biakpiak natu in a kizangh biaknatau tungah hal tu hi.
11 Ahizong ama in a vun, a tak teng, a lu, a peang teng, a ngil le a ngilzangte a kihel a sungkua teng la tu a,
12 ngiaphual puasang ah paipui in vut buakna, biakna a zeksa taw kisai a thiangthona munah thingthut in hal tu hi.
13 Tupkhol ngawlin Israel taangpi bup in Topa thupiakte khat paltan in a maw a khial in ahile,
14 a maw a khial a kiheak po ciang taangpi taangta in khuital khat taw mawphel biakpiakna nei tu hi. Amate in Topa ompuina Puanbuk ah paipui tu a,
15 taangpi lampuite in a khui lu tungah a khutte nga in, tualai ah ngo tu uh hi.
16 Thiampi Lianbelpa in khuital chi tawm Puanbuk sungah paipui tu a tua ii sungah
17 a khutme papin puankhai mai ah salivei the tu hi.
18 Ama in Puanbuk sung ngimnamtui biaknatau king, a dokna tengah chi tawm noai tu a, a taanglai teng Puanbuk kongbiang ah a om, meihal biakpiakna in a kizangh biaknatau bul ah sung tu hi.
19 Tua zawkciang ama in a thau teng la in biaknatau tungah hal tu hi.
20 Ama in mawphel biakpiakna in a kizangh khuital sia taw a vawt bangma in hi khuital zongh taw a kibangin vawt tu a, mipite ii mawna hu in hi bangin sangaw biakpiakna vawt tu hi, tuaciang amate mawna kimaisak tu hi.
21 Tua zawkciang ama in tua khuital ngiaphual pua sangah paipui in, ama mawmai natu biakpiakna khuital a hal bangin hal tu hi. Hisia in taangpite mawna maisak natu biakpiakna khat ahi hi.
22 Ngam uk khat in tupkhol ngawlin Topa thupiakte paltan in mawna a vawt le,
23 a mawna a heak po ciang, a mealhem ngawl kealtal khat taw biakpiakna nei tu hi.
24 Ama in kealtal lu tungah a khut nga tu a, meihal biakpiakna in nganhing a kingawna mun biaknatau saksang ah ngo tu hi. Hisia in mawphel biakpiakna khat ahi hi.
25 Thiampipa in a chi sungah a khutme pap tu a, biaknatau king a kidokna tengah noai in, a taanglai teng biaknatau bul ah sung tu hi.
26 Tua zawkciang ama in kipawlkhop biakpiakna in a kingo nganhing thaute kihal bangma in, biaknatau ah a thau teng hal tu hi. Ngam uk khat ii mawmai natu in hi bangin thiampipa in sangaw biakpiakna nei tu a, ngamukpa mawna kimaisak tu hi.
27 Tupkhol ngawlin nautaang mi khat in Topa thupiakte paltan in, mawna a vawt le, Ref 4:27-31 Mi 15:27-28
28 a mawna a heak po ciang a mealhem ngawl kealnu khat taw biakpiakna nei tu hi.
29 Ama in keallu tungah a khut nga tu a, meihal biakpiak natu nganhing kingawna mun, biaknatau saksang ah ngo tu hi.
30 Nganhing chi sungah thiampipa in a khutme pap tu a, biaknatau king a dokna teng noai in, a taanglai teng biaknatau bul ah sung tu hi.
31 Tua zawkciang ama in kipawlkhop biakpiak natu in a kingo nganthaute laak bangin a thau teng la tu a, Topa a lungkimsak ngimnam ahi natu in biaknatau tungah hal tu hi. Hi bangin thiampipa in tua pa ii mawmai natu in, sangaw biakpiakna neisak tu a, a mawna kimaisak tu hi.
32 Mihing khat in mawphel biakpiakna in tuu khat hong paipui le, a mealhem ngawl a nu khat hi tu hi.
33 Ama in tuu lu tungah a khut nga tu a, meihal biakpiak natu in ngan kingawna mun biaknatau ii saksang ah ngo tu hi.
34 Thiampipa in a chi sungah a khutme pap tu a, biaknatau king ah a om a dokna teng chi noai in, a taanglai teng biaknatau bul ah sung tu hi.
35 Tua zawkciang ama in kipawlkhop biakpiak natu in a kingo tuu thau laak bangin a thau teng la tu a, Topa tungah a kipia an taw biakpiaknate taw biaknatau tungah hal khawm tu hi. Hi bangin thiampipa in tua pa mawmai natu in sangaw biakpiakna nei tu a, ama mawna kimaisak tu hi.