25
A Kum Salina
(Thuhil kikna 15:1-11)
1 Topa in Sinai Mual tungah Moses paupui a,
2 Israel mite tungah a nuai a zui tu ngeinate a piak tu in thupia hi. Topa hong piak tu ngam ah na tum uh ciang a kum sali kum simin lothaw ngawlna taw Topa na upat tu uh hi.
3 Kum luk sung lo na poai tu uh a, na sapitbaakte tan a puuapha in, lo ante na kaikhawm tu uh hi.
4 Ahizong a kum salina sia na leitang ii tawlngak kum hi tu a, Topa tungah a ki aap kum hi tu hi. Tua kumin lo an ciing heak vun a, sapitkung zongh pua heak vun.
5 Na lo sungah a lipo ante zongh la ngawlin na pua ngawl sapitngate zongh lo heak vun. Tua kum sia na leitang ii tawlngak hiithiat kum ahi hi.
6 Tua kumin lo a kithaw ngawl hang tua lo in note, na silate, na naseamte, no taw a teang khawm ngamdangmite, Ref 25:1-7 Pu 23:10-11
7 na ngannote le ngamsate zongh hong vak tu hi. Tua lo pan a piang theampo kine thei tu hi.
Piakkikna Jubilee Kum
8 Kum sali mun salivei simna a kingawm ciang kum 49 ci in sim vun.
9 Tua zawk tha salina, ni sawm ni, Mawsuutna Ni in ngamsung tengah lemle tum tu in mi khat na paisak tu hi.
10 Hi bangin kum sawmngana kum sia na koituam tu a, ngam sungah a teang theampo tungah suatakna thu na thangsak tu uh hi. Tua kum in na zuak sa uh vanhte theampo, a nei sia kungah, ahibuale a suan a paalte kungah kipia kik tu hi, sila in a kizuaksa te zongh a innkuanpuite kungah cia kik tu hi.
11 Lo na tho buatu uh a, a lipo ante zongh na la buatu uh hi, na ho ngawl sapitngate zongh na lo buatu uh hi.
12 Tua kum bup note atu in kum thiangtho hi tu a; lote pan a piang tawm teng bek na ne tu uh hi.
13 Hi kum sungin a kizuaksa na theampo a neite kungah kilee kiksak siat tu hi.
14 Tua hi a, Israel na mipuite tungah na lo na zuak ciang, ahibuale ama tung pan lo na lei ciang a kilawm ngawlin kison heak vun.
15 A man sia Piakkikna Jubilee Kum kik dong hi lo pan kum bangza sung, an bangza piang tu cisia tuatin a man kitan tu hi.
16 A kum a tam le a man tam tu a, ahizong a kum a tawm le a man tawm zaw tu hi, banghang ziam cile a kizuak lo sia pan a piang thei an phaza tungah kibulphu zaw hi.
17 Israel na mipuite theam heak in a, Topa na Pathian ii thu ni in.
A Kum Sali Kum ii Haksatna
18 Hi ngam sungah ngammuang tak na nuntak thei natu in Topa thukhamte le thupiakte theampo zui in.
19 Leitang pan an hong piang tu a, na du theampo nei in, ngammuang takin na nungta tu uh hi.
20 Ahizong mihing khat po in tuabang lothaw ngawl, anlaak ngawl bulin, a kum sali kumin bang ne tu hi ziam, hong ci om thei tu hi.
21 Kum nii sung an na khom thei natu uh in Topa in a kum luk kumin leitang thupha pia tu hi.
22 A kum liat kumin lo na thaw ciang a kum lukna kumin na laak ante na ne lai tu a, tua kumin na thaw ante na laak dong neakkhom tu na nei tu uh hi.
Neisate Piakkikna
23 Na leitang sia a tawntung atu in kizuak thei ngawl tu hi, banghang ziam cile nang neisa hi ngawl hi; Pathian neisa hi a, no sia thaw khuan a nga ngamdangmite taw na kibang uh hi.
24 Leitang a kizuak ciang a neipa ii tat kik thei natu a thuneina sia heak tek kul hi.
25 Israel te khat zawng a, a leitang zuak tu a kul le a mealheak kinaibel sia in tan kik tu hi.
26 A tan kik tu mealheak a nei ngawl khat sia hong hau kikin a tan kik zo zongh suak thei tu hi.
27 Tua thu ah a lei kik thei ni in Piakkikna Jubilee kum dong a leitang pan a nga kik tu za taw tuatin a zuakna pa tungah a man pia in tuasia tan kik tu hi.
28 Ahizong a tat kik natu sum a cin zo buale Piakkikna Jubilee kum kik dong a leipa khut sungah om lai tu hi. Tua kum ciang tuasia a neipa tungah kipia kik tu hi.
29 Mihing khat in kulh taw ki uum khuapi sungah a om inn khat a zuak le, a zuak hun pan kum khat sung teng tan kik thei tu hi.
30 Ahizong tua kum sungin a tan kik zo buale tan kik thei nawn ngawl tu a, a inn sia a leipa le a suan le a paalte neisa hi suak tu hi; Piakkikna Jubilee kum ciang zongh in kipia kik tuan ngawl tu hi.
31 Ahizong uumna a nei ngawl khuanote sungah innte sia lote bangin kingaisun tu a, a neipa in tan kik thei tu hi, Jubilee kum ciang kipia kik tu hi.
32 Ahizong Levi suante in a nasepna khuapite sungah a neisate bang hun po in tat kik thei natu thu nei hi.
33 Hi khuapite khat sung pan inn khat sia Levi khat in zuak a, a tan kik buale Piakkikna Jubilee kum ciang kipia kik nanak tu hi, banghang ziam cile a khuapi sungah Levi te ii innte sia Israel mite sungah a kip a kho in amate ii neisa ahi hi.
34 Levi khuapite kiimkot ah nganthana leitang ahile kizuak ngeingawl tu hi; tuasia a tawntung amate ii neisa ahi hi.
Mizawngte tung Sumpukna
35 Na nai a, a teang Israel mipui khat zawngin ama le ama a kivaak zo buale na nai ah hong teen suak thei natu in na cial naseampa khat bangin sum na puk tu hi. Ref 25:35 Thkna 15:7-8
36 Ama tung pan a meet la heak in a, ahihang Pathian thu ni in na Israel mipuipa na nai ah teangsak in.
37 Ama, sum na pukna tung pan summeet la heak in a, na anzuakte tung pan a meet la heak in. Ref 25:37 Pu 22:25; Thkna 23:19-20
38 Hi thu sia Canaan ngam hong piak natu le noma Pathian ahi natu in Egypt ngam pan hong pusuapuipa Topa na Pathian uh ii thu piak ahi hi.
Silate Suatakna
39 Na nai a, a teang Israel na mipui khat a zawn mama hu in sila khat bangin ama le ama hong kizuak le sila nasepte na seamsak buatu hi. Ref 25:39-46 Pu 21:2-6; Thkna 15:12-18
40 Ama in kuli khat bangin na kungah om tu a, Piakkikna Jubilee kum dong nangma ii na seam tu hi.
41 Tuasia hun ciang ama le a tate in nangma hong nusia tu a, a innkuanpuite le a taanghpupite neisa omna ah cia kik tu uh hi.
42 Israel mite sia Topa ii silate hi a, ama in Egypt pan pusuapui hi; amate sila in kizuak ngawl het tu hi.
43 Na Pathian kiita vun a, amate vawtsia heak vun.
44 Sila na kisamh le na kiim a om minamte tung pan lei vun.
45 Note taw teang khawm ngamdangmite ii tate zongh lei thei tu nu hi. Na ngamsung pan piang tuabang patangte noma neisa suak thei a,
46 amate na tapate ii lua tu in na nusiat thei tu a, na tapate ii a nuntak laiteng a na sepsak tu hi. Ahizong Israel na mipuite peuma na vawtsia buatu uh hi.
47 Sonteena in note taw teang khawm ngamdangmite khat hong hau a, ahihang na Israel mipui khat zawngin tua pa tung ahibuale a innkuanpuite khat tungah sila in ama le ama hong kizuak hi.
48 Ama a kizuak zawk hang kitan kik thei lai hi. A suapuite khat,
49 ahibuale a pano, a suapuiseal, a kinaipui a beete khat pawpo in tan kik thei tu hi; tua ahibuale ama mama in sum a khom a thalaw le kitan in suakta thei tu hi.
50 Ama in a leipa taw kikum tu a, a lei hun a kipan Piakkikna Jubilee kum kik dong a kum simto tu a, naseampa khat a kipia nitha za taw ama suatak natu a man tan tu hi.
51-52 Kum sim kuli naseam khat bangin ngaisun in, a taanglai kumte taw tuatin a lei man baang teng pia kik tu hi.
53 A topa in vawtsia ngawl het tu hi.
54 Hi bang lam khat pawpo taw a kisuaktasak buale ama le a tate sia Piakkikna Jubilee kum kik ciang kisuaktasak nanak tu hi.
55 Israel mi khat sia sila hi top thei ngawl tu hi, banghang ziam cile Israel mite sia Topa silate ahi uh hi. Ama in amate Egypt pan pusuapui hi; ama sia Topa, amate ii Pathian ahi hi.