15
Pum tung pan A tui Pusuakte
1 Topa in Moses le Aaron tungah,
2 Israel mite atu in a nuai a zui tu ngeinate pia hi. Pasal khat pawpo a zang pan a tui a naai a pusuak le,
3 tawlnga ngawlin a luang ahizong, a kikhak ahizong tua sia thiang ngawl hi.
4 Lupna tungah a to ahibuale a lum le tua lupna thiang ngawl hi.
5 Tua pa lupna a tham pawpo,
6 ahibuale a tona tungah a to pawpo in a puante sawp in kibual nanak tu a, ahizong ama nitak dongin thiang ngawl veve hi.
7 Tua naai a neipa a tham pawpo in a puante sawp in kibual nanak tu a, ahizong ama nitak dongin thiang ngawl veve hi.
8 Tua naai a neipa in biakna taw kisai in a thiang khat pawpo cil a phii le tua pa sia ama puan teng sawp in, kibual nanak tu a, ahizong ama nitak dongin thiang ngawl veve hi.
9 Tua naai a neipa tona siphukungh ahibuale tokhum sia thiang ngawl hi.
10 Hi sia pa tona a tham pawpo nitak dongin thiang ngawl hi. Hi sia pa tona a pua pawpo in ama puante sawp in, kibual nanak tu a, ahizong ama nitak dongin thiang ngawl veve hi.
11 Tua naai a neipa in a khut sil masa ngawlin mihing khat po a tham le ama puan teng sawp in kibual nanak tu a, ahizong ama nitak dongin thiang ngawl veve hi.
12 Hi sia pa ii a tham leibeal pawpo kisutham tu a, ama thamsa thing taw kivawt kuang pawpo kisilthiang hamtang tu hi.
13 Tua naai a neipa a dam zawkciang ni sali sung ngak tu a, tuaciang a puante sawp in cik tuithiang sungah kibual nanak tu a, tuaciang ama biakna taw kisai in thiang tu hi.
14 A ni liat ni in ama in inn vakhu nii ahibuale ngam vakhu nii Topa ompuina Puanbuk kongbiang ah paipui in thiampipa pia tu hi.
15 Thiampipa in mawphel biakpiakna in khat, meihal biakpiakna in a dang khat pia tu hi. Hi bangin tua pa atu a zeksa thiansuana ama in vawt tu hi.
16 Mihing khat sia a bawtui a pusuak le a pum bupin kibual tu a, ahizong ama nitak dongin nin veve hi.
17 Tua bawtui a taakna puan taw ahibuale savun taw kivawt na khat pawpo sia silthiang tu a, ahizong nitak dongin tua na sia nin veve hi.
18 Numei le pa omkhopna a nei zawkciang a nii in kibual nanak tu a, ahizong amate nitak dongin thiang ngawl veve hi.
19 Numei khat tha sim nin a nei ciang ama ni sali sung thiang ngawl hi. Tua nu a tham pawpo nitak dongin thiang ngawl hi.
20 Tua numei ii a nin nei sung a tona ahibuale a lupna sia thiang ngawl hi.
21-23 Ama lupna ahizong a tona ahizong a tham pawpo in ama puante silthiang in kibual tu a, ahizong nitak dongin ama nin veve hi.
24 Pa khat in numei khat a nin nei sungin a omkhoppui le tua pa niinsak a, ni sali sung thiang ngawl hi, tua ciang a lupna pawpo zongh thiang ngawl hi.
25 Numei khat tha sim a nin nei zawkciang ni tam mama sung a chi a luang le, ahibuale numei nin nei ngei hun sangin a chi luan hun a tamzaw le, nin a nei hunsung teng bangma in a chi luan laiteng tua nu sia nin hi.
26 A nin nei hun sungin a lupna le a tona pawpo sia nin hi.
27 Tuate a tham pawpo nin a, a puante sawp in kibual nanak tu a; ahizong ama nitak dongin thiang ngawl veve hi.
28 A chi luan a kan zawkciang ama in ni sali ngak tu a, tuaciang ama biakna taw kisai in thiang tu hi.
29 A ni liat ni in ama in inn vakhu nii ahibuale ngam vakhu nii Topa ompuina Puanbuk kongbiang ah a om thiampipa kungah paipui tu hi.
30 Thiampipa in mawphel biakpiakna in khat le meihal biakpiakna in a dang khat pia tu a, hi bangin ama in tua nu a zeksa kithiansuana vawtsak tu hi.
31 Ngiaphual laizang ah a om Topa ompuina Puanbuk a nitsak ngawl natu in Israel mite tungah a thiantho ngawlna taw kisai in, a kidopna tu thu a son tu in Topa in Moses thupia hi. A ninsak ahile amate kithatlum tu hi.
32 Hiteng sia, a zang pan naai a pusuak pa khat ahibuale a bawtui a luang pa khat,
33 numei khat tha sim a nin nei hunsung ahibuale, biakna taw kisai in a thiang ngawl numei khat taw a khialpa ii zui tu ngeinate ahi hi.