13
Vun natnate taw Kisai Thukhamte
1 Topa in Moses le Aaron tungah hi thukhamte pia hi.
2 Mihing khat pawpo in a vun tungah, a lauhuai vun natna dong a suak thei tu meima khat ahibuale uilut khat ahibuale a tum thei meima khat a nei le, ama sia Aaron suan thiampite kungah kipaipui tu hi.
3 Thiampipa in a meima etsak tu a, a meima sung multe kaangin a meima kiimkot sangin a sa a dum zaw le tua meima sia a lauhuai vun natna hi a, thiampipa in tua pa a nin in thangsak tu hi.
4 Ahizong tua meima kaangin, a kiimkot zongh dum zaw ngawl a, a multe zongh a kaang buale thiampipa in tua pa ni sali sung koituam tu hi.
5 Thiampipa in ni sali ni in en kik tu a, a meimate beak ngawlin, kibang lai in, a ngaisun le a dang ni sali sung ma koituam lai tu hi.
6 Thiampipa in ni sali ni in en kik tu a, a meima thipin tuasia a beak buale ama sia biakna taw kisai in thiangtho hi ci in thangsak tu hi; tuasia meima thawthong bek hi. Tua pa in a puante sawp tu a, biakna taw kisai in a thiang hi tu hi.
7 Ahizong thiampipa in en a, thiang hi ci in a thansak zawkciang a meima a beak le thiampipa kungah kilak kik hamtang tu hi.
8 Thiampipa in en kik tu a, a meima a beak le ama sia a thiang ngawlin thangsak tu hi. Tua in a lauhuai vun natna ahi hi.
9 Mihing khat pawpo in a lauhuai vun natna a nei le tua pa thiampipa kungah kipaipui tu a,
10 thiampipa in en tu hi. A vun tungah meima kaang khat om in, a multe kaang a, a nai a dim le,
11 tua meima sia a dam thei ngawl vun natna ahi hi. Thiampipa in tua pa a thiangtho ngawlin thangsak tu a, a thiang ngawl a kimusa hi zo ahikom koituam kul ngawl hi.
12 Tua vun natna beakin a lu pan a peang dong a theng le,
13 thiampipa in en kik tu hi. A pumpi tung bup beak zo in a mu le thiampipa in biakna taw kisai in a thiang in thangsak tu hi. A vun theampo hong kaang ahile ama sia biakna taw kisai in a thiang ahi hi.
14 Ahizong a meima balh a kimu po ciang ama sia a thiang ngawl ahi hi.
15 Thiampipa in en kik tu a, a meima a balhin a mu le a thiang ngawlin thangsak tu hi. A meima balh sia vun natna cinopna hi a, tua pa sia a thiang ngawl ahi hi.
16 Ahizong a meima damin a kaan kik ciang, thiampipa kungah tua pa pai tu a,
17 thiampipa in en kik tu hi, tua meima a kaang zo le, a ma biakna taw kisai in a thiang hi a, thiampipa in a thiangin thangsak tu hi.
18 Uilut vei khat a dam zawkciang,
19 a ma santak kang in ahibuale a san le a kang kithua in, hong tum le thiampipa tungah kilak tu hi.
20 Thiampipa in en tu a, tua a tum sia, a kiim a vunte sang dum zaw in a sungah a multe a kaang le, thiampipa in ama sia a thiang ngawlin thangsak tu hi. Tuasia in uilut pan a kipan a lauhuai vun natna ahi hi.
21 Ahizong thiampipa in en in a sung a, a multe kaang ngawlin, a kiim a vunte sangin a dum zaw tuan bua a, ahizong daang pian in a mu le thiampipa in ama ni sali sung koituam tu hi.
22 A meima a beak le thiampipa in ama a thiang ngawlin thangsak tu a; ama sia vun natna vei ahi hi.
23 Ahizong a meima a ngei bangma hi in a beak tuan buale uilut mapawn hi lel a, thiampipa in ama biakna taw kisai a thiangin thangsak tu hi.
24 Mihing khat pawpo mei in kaanghin, a sa kaang in ahibuale a san le a kaang a kithua le,
25 thiampipa in en tu hi. A meima sung multe kaangin, a kiim a vunte sangin a dum zaw le, mei kakna pan a kipan a lauhuai vun natna hi a, thiampipa in tua pa a thiang ngawlin thangsak tu hi.
26 Ahizong a meima santak multe kaang ngawlin, a kiim vunte sangin dumzaw tuan ngawl a, ahizong a daang pian le thiampipa in ama ni sali sung koituam tu hi.
27 Ni sali ni in thiampipa in ama en kik tu a, a meima a beak le vun natna ahikom thiampipa in a thiang ngawlin thangsak tu hi.
28 Ahizong a meima beak ngawlin, kilamdang tuan ngawl a, a daang pian bek ahile a lauhuai vun natna hi ngawl hi. Mei kakna mapawn khat bek ahikom thiampipa in biakna taw kisai in a thiangin thangsak tu hi.
29 Pa ahizong numei ahizong a lu tung ahibuale a kha ah meima a nei ciang,
30 thiampipa in en tu hi. A kiim a, a vunte sangin dum zaw in, a sung a multe engin a mal a no le, tua in a lauhuai vun natna hi a, thiampipa in a thiang ngawlin thangsak tu hi.
31 Thiampipa in a et ciang a kiim a, a vunte sangin a meima dum zaw tuan ngawlin, ahizong ama sung a multe mul dang taw a kibang buale, thiampipa in ama ni sali sung koituam tu hi.
32 Thiampipa in ni sali ni in a meima en kik tu a, beak zaw ngawl, a sungah mul eng om ngawlin, a kiim a vunte sangin a dum zaw tuan buale,
33 tua pa in a meima kiim simngawl teng, a sam le a mul meet tu hi. Thiampipa in ama ni sali sung koituam tu hi.
34 Ni sali ni in thiampipa in a meima en kik tu a, a meima beak ngawlin a kiim a vunte sang a dum zaw tuan buale thiampipa in ama biakna taw kisai a thiangin thangsak hi tu hi. Tua pa in a puante sawp tu a, ama a thiangtho tu hi.
35 Ahizong a thiang in a thansak zawkciang a meima a beak le,
36 thiampipa in en kik tu hi. A meima a beak le, a mul engte et kul nawn ngawl a; tua pa a thiang ngawl ahi hi.
37 Ahizong thiampipa in a meima beak ngawlin, a sung a multe ciidam in po a, a meima a damin a ngaisun le thiampipa in ama biakna taw kisai a thiangin thangsak tu hi.
38 Pa ahizong numei ahizong a vun tungah a kaangpawlte a om le,
39 thiampipa in en tu hi. Tua munte a kaang philphel ahile, vun mealhem natu bekin a piang hi a; tua pa biakna taw kisai in a thiang ahi hi.
40-41 Mihing khat a nung sam ahizong, a maisam ahizong a pul hangin tua in ninsak ngawl hi.
42 Ahizong a lu kolhna ah a san le a kaang a kithua meima a piang le, tua in a lauhuai vun natna ahi hi.
43 Thiampipa in en tu a, a san le a kaang kithua meima a om le,
44 a lu tungah a lauhuai vun natna vei ahikom thiampipa in ama a thiang ngawlin thangsak tu hi.
45 A lauhuai vun natna a veipa in puan ek silh tu a, a sam pot ngawlin, a mai nuaisang teng seal a, “A thiang ngawl, a thiang ngawl ka hi hi!” ci in au tu hi.
46 Tua natna a vei hun sung a thiang ngawl hi a, midangte taw a kikhualana ngiaphual pua sangah teang tu hi.
Cipawl Natna taw kisai Thukhamte
47 Samul ahibuale puanneal puansilh tungah,
48 puanneal puanbek, ahibuale samul puan, ahibuale savun, ahibuale savun taw kivawt khat pawpo tungah a pawl a om ciang, note 13:47-48\xk mildew: Hebrew kam in “a kiitakhuai vun natna” le “cipawl natna” kibang hi.Thubu dangte sungah “phak natna” kici hi.\x*
49 a hing ahibuale a sanin a beak le thiampipa tung lak tu hi.
50 Thiampipa in en tu a, tua puan ni sali sung koituam tu hi.
51 Thiampipa in ni sali ni ciang en kik tu a, tua a pawl sia a beak le, tua puan a nin ahi hi.
52 Thiampipa in hal tu hi, banghang ziam cile a beak thei ahikom mei taw haltum tu ahi hi.
53 Ahizong ama in a ettel ciang, a pawl sia puan tungah kizel ngawlin a mu le,
54 ama in tua puan a sawp natu le a dang ni sali sung a koituam natu in thupia tu hi.
55 Tuaciang ama in en tu a, tua a pawl na ii a pianzia a kilaih buale a kizel bua zong nin veve hi; a pawl te omna mun a nung ahizong a mai ahizong mei taw hal tu hi.
56 Ahizong thiampipa in a et ciang a pawl teng a bo zo le, tua puan ahibuale savun sia tua san tak teng eaukeak tu hi.
57 Tua zawkciang a pawl te hong piangkik in a kizel kik le a neipa in tua sia hal tu hi.
58 Ama in tua na sia silthiang in a pawlte a bo le, ama in tuasia silthiang kik tu a, biakna taw kisai in a thiang hi tu hi.
59 Hisia in samul ahibuale puanneal ahibuale samul puan, savun taw kivawt na khat pawpo tungah a om a pawlte taw kisai zui tu thukham ahi hi; hisia in biakna taw kisai a thiang le a thiang ngawl khensatna daan ahi hi.