20
Jesus Thuneina huvau Dokna
(Matthew 21:23-27; Mark 11:27-33)
1 Ni khat Jesus in Biakinn sungah mihonpite Lungdamna Thu huvau hilna le thuhilna a nei laitakin, Thiampi liante, Thukham hil syate, le upate hong pai a,
2 ama munah, “Hi bangin na ngamtat thei natu in, bang thu nei ni ziam? Akua in tuabang thunei theina hong pia ziam?” ci uh hi.
3 Jesus in, “Kei zongh thu khat kong dongh tu hi.
4 John ii tuiphum piak theina sia Pathian ii tung panin hong pai ziam maw mihing tung pan hong pai ziam, hong son tavun” ci hi.
5 Amate sung teng kam kinial a, “Bang ci tu hi ziam? Pathian tung pan ci leang, ‘Tua ahile banghangin John um ngawl nu ziam?’ hong ci tu hi.
6 Tuabang ci bua ii, ‘Mihing tung pan’ ci leang le, mihonpite in ei suangtum taw hong deanglum tu hi, banghang ziam cile amate in John sia kamsaang khat hi ci in um uh hi.
7 Tua ahikom, “Koisung pan hong pai ziam ci he ngawl khu hi,” ci in zo hi.
8 Jesus in amate tungah “Tua ahile kei zongh bang thuneina taw hi bangin ngamta khi ziam ci in kong son buatu hi.” ci hi.
Sapit huan A saapthawte taw Thusonteena
(Matthew 21:33-46; Mark 12:1-12)
9 Tua zawkciang Jesus in mihonpite tungah hi thusonteena son hi. “Khatvei lai in, mihing khat in sapitkungte suan in, pawlkhat in saapsak a, khuangei ma inn nusia hi.Ref 20:9 Is 5:1
10 Sapit ngate law hun ciangin a silate khat paisak a, ama tel tu sapitte ngensak hi. Ahizong huan saapte in, a silapa vel a bangma pia ngawlin heak kiksak hi.
11 Tua ahikom sila dangkhat paisak kik hi; ahihang huan saapte in ama zongh vel a, maizum pia in, bangma ngawl taw heak kiksak hi.
12 Tua zawkciangin ama in sila thumna sia paisak hi; huan saapte in tua pa zongh liamsak in huang pua ah vawk hi.
13 Tuasia ciangin huan neipa in, “Bang law tu khi ziam? Ka it ka tapa paisak tong: tua hile amate in na thasia nanak tu hi!” ci hi.
14 Ahihang huan saapte in tua pa a mu ciang, khat le khat kikum a, “Hi sia huan neipa ii tapa hi. Thatlum tawng, tua hile a neisa teng ei aa suak tu hi!” ci uh hi.
15 Tua ahikom sapithuan pua sangah ama not in thatlum uh hi.
Jesus in hi bangin dongh hi, “Tua ci leang sapithuan neipa in huan saapte bang law tu ziam?
16 Ama in hong pai tu a, tua mihingte thatlum in, sapithuan sia ngualdang in saapthawsak tu hi,” ci hi.
Mihonpi in hi thu a zaak uh ciangin, “Tuabang suak thei ngawl tu hi!” ci uh hi.
17 Jesus in amate en a, “Tua ahile hi laithiangtho in bang ci nuam ziam?
Inn sate ii mannung ngawl hi
ci a, a nil suangtum sia
a thupibel suangtum suak hi.Ref 20:17 Ps 118:22
18 Tua suang tungah a puk peuma a bek a bekin kikhen tu a, tuaciang in tua suang sia khat po ii tungah hong taaksuk le tua pa sia leivui bangin zaantham tu hi,” ci hi.
Shia Piakna huvau Dokna
(Matthew 22:15-22; Mark 12:13-17)
19 Thukham hil syate le thiampi liante in tua munah Jesus mat sawm uh hi, banghang ziam cile amate in, ama ii son thusonteena sia amate a cina ahi hunlam he uh hi. Ahizong amate in mihonpite kiita uh hi.
20 A mat thei natu hunpha zong uh hi. Thuneite le Rome ngamuk mangpa tungah Jesus a aap thei natu in, thinsung takpi taw thu dongh nuam bangin a kiheang tu mihing pawlkhat sumnguk pia in paisak a, Jesus aitaa uh hi.
21 Hi thudawpkute in Jesus tungah, “Sya awng na paunate le na hilnate maan hi, ci in ka he uh hi. Milian mino na awlmawk bua a, Pathian ii mihingte atu, a deisak thumaan thute hil hi, ci in kong he uh hi.
22 Tua ahile ei thukham in Rome Kumpilianpa tungah shia piak tu khaam ziam maw khaam ngawl ziam hong son ta'n,” ci hi.
23 Ahihang Jesus in amate thin kukal teng phawk a,
24 “Ngunn dangka khat hong la tavun. Akua lim le min a tungah ki at ziam?” ci hi.
“Kumpilianpa aa hi,” ci uh hi.
25 Jesus in “Pha hi, tua ahile Kumpilianpa ii neisa Kumpilianpa pia tavun a, Pathian neisa Pathian pia tavun,” ci hi.
26 Tua mun mihonpite mai ah a mat thei natu thu mal khat zongh om ngawl ahikom amate thim khipkhep in om a, a zo kik nate lamdang sa uh hi.
Thina pan Thaw kik natu huvau Dokna
(Matthew 22:23-33; Mark 12:18-27)
27 Tuaciangin mithite tho kik nawn ngawl tu hi, a ci Sadducee te Jesus kungah hong pai a, hi bangin ci uh hi:Ref 20:27 Sawl 23:8
28 “Sya awng, Moses in hi thukhamte ei atu in a at hi: ‘Mihing khat in ta nei ngawlin a thi le, tua pa ii suapuipa in, meingongnu teenpui in, mithipa ii ta tatak bangin, a kingaisun thei tu in, ta neipui tu hi,’ ci hi.Ref 20:28 Thkna 25:5
29 Khatvei lai in unau pa sali om hi: a ubel sia in zi nei a, ta nei ngawlin thi hi.
30 Tua zawkciang a niina sia in a numei sia teenpui hi.
31 Tua zawkciangin a thumna sia zongh tuabang ma ahi hi. A unau sali bupin, tuabang ma hi siat hi — ta nei ngawlin thi siat uh hi.
32 A khakbel in numeinu zongh thi hi.
33 Tu in mithite nungta tu in hong thaw kik ciangin numei sia akua ii zi hi tu ziam? Amate sali in teenpui tek hi,” ci uh hi.
34 Jesus in, “Tu hunin numeite le pate kiteang hi,
35 ahihang thina pan tho kikin, a nungta tu a kilawmte, hong pai pheang tu hun sungah kiteenna om nawn ngawl tu hi.
36 Amate vantunglalangte bang hi tu a, a thithei buatu uh hi. Amate Pathian ii tate a suak uh hi, banghang ziam cile amate thina panin tho kik uh hi.
37 A thite nuntakna sungah kitho kiksak tu hi, ci in Moses in thiangtho takin lak hi. Sawlpaang kuang thu huvau a sonna munah Topa sia ama in, Abraham ii Pathian, Isaac ii Pathian, le Jacob ii Pathian,” ci hi.Ref 20:37 Pu 3:6
38 Ama sia a nungtate Pathian hi a, a thisate Pathian hi ngawl hi banghang ziam cile ama atu in mihing theampo nungta hi,” ci in zo hi.
39 Thukham hil syate pawlkhat in, “Na zo kikna pha mama hi, Sya awng!” ci uh hi.
40 Banghang ziam cile amate in bangma a dongh ngam nawn bua uh hi.
Messiah huvau Dokna
(Matthew 22:41-46; Mark 12:35-37)
41 Jesus in, “Bangbangin Messiah sia David ii suan hi tu hi kici thei ziam?
42 Banghang ziam cile David ama mama in Psalm thubu sungah,
“Topa in ka Topa ii tungah:
Hi sung ka ziatsang ah hong to tan
43 na ngalte na peang nuai ah ka koi dong” ci hi.
44 “David in ‘Topa’ ci hi; tua ahile bangbangin Messiah sia David ii suan hi thei tu ziam,” ci hi.Ref 20:42-43 Ps 110:1
Jesus in Thukham hil Syate pan A Kidop natu Hil
(Matthew 23:1-36; Mark 12:38-40)
45 Mihing theampo in ama thu a ngai laitakin, a nungzuite munah,
46 “Thukham hil syate panin kikeam tavun, amate puantual silh in, vak nuam a, vanhzuakna munah ngual ii zatak tu thangai hi; amate in synagogue te sungah a kikhaam kholsa tona ah to tha nuam uh a, anneak poaite ah mun phabelna ah to nuam hi.
47 Amate in meingongte zothaw uh a, a inn a lo suttol in, tuaciang, ngual ii pha a sak tu a deina in, a sau tatak thungen uh hi! Amate ii daan thuak tu sia nasia seseam tu hi!” ci hi.