16
A Thimthel Sumkeampa
1 Jesus in a nungzuite munah, “Khatvei lai in sumhaupa khat in a neisate a zeak tu, naseam khat nei hi. Tua naseampa in sumhaupa ii sum teng zangh tum hi, ci in sumhaupa tungah kison ahiciang,
2 sumhaupa in sam a, ‘Na ngamtatna kong zaak sia bangbang tatak ziam? Ka neisate na zeaknate, a cing takin hong lak ta'n, banghang ziam cile kei ii neisa zeakpa hi thei nawn ngawl tu ni hi’ ci hi.
3 Naseampa in hi bangin ngaisun hi, ‘Ka topa in ka nasep pan hong tawpsak tu hi. Bang law tu khi ziam? Leidum to tu in tha ka nei bua a, khutdaw nget tu le ka maizum hi.
4 Ka nasep ka taan ciangin ka ngualtamhte in amate inn ah hong saan natu bangbang ngamta tu ci he zo ing!’ ci hi.
5 Tua ahikom a topa tungah lei a ba theampo khawmtua hi. A masa phitbelpa munah, ‘Ka topa tungah nang bangza ba ni ziam,’ ci hi.
6 ‘Olive thau pheal zakhat ka ba hi,’ ci in zo kik hi. ‘Hi sungah na sazian om hi, to in, sawmnga ci in at in,’ ci hi.
7 Tua zawkciang khat ii tungah, ‘Nang bangza ba ni ziam? — ’ ‘Zungtaang seau tulkhat,’ ci in zo hi.‘ Hi sungah na sazian om hi, zaliat ci in at in,’ ci hi.
8 Tua hu in, a topa in a thumaan ngawl sumkeampa ii thimthel pilna teng pok hi; banghang ziam cile hi leitung mihing thimthelte sia vai tuatuam sepna ah khuavak sung om mihingte sangin pilzaw pek hi.”
9 Jesus in hi bang ci thua hi. “Kei kong cina pan: leitung haunate taw ngualtamh zong vun, tuaciang, tuasia a bo ciang tawntung inn ah no hong kisaang tu hi.
10 Thu note tungah a thumaante sia thuliante tung zongh ah thumaan tu hi; thunote tungah a thumaan ngawlte sia thuliante tung zongh ah a thumaan buatu hi.
11 Tua ahile leitung haunate tungah na thumaan bua uh ahile hauna tatak ah bangbangin hong kimuang ngam tu ziam?
12 Ngual neisa tungah na thumaan bua uh ahile, no tungah na neisate akua in hong pia nuam tu ziam?
13 “Naseam khat po in to nii ii sila sepsak thei ngawl hi; ama in khat sia ensan tu a, khat it tu hi; khat tungah thumaan tu a, khat sia ngaimaw tu hi. No sia Pathian le sum ii sila, na seam khawm thei buatu hi,” ci hi.Ref 16:13 Mt 6:24
Jesus ii Pauna Tuatuamte
(Matthew 11:12-13; 5:31-32; Mark 10:11-12)
14 Phariseete in hi thute a zaak uh ciangin Jesus sia ciammuina in nei uh hi, banghang ziam cile amate sum deite ahi uh hi.
15 Jesus in, “No sia noma le noma ngual mai ah a kithutangsakte na hi uh hi, ahizong Pathian in na thinsung theampo hong he hi. Banghang ziam cile mihingte ii thupisak nate sia Pathian muna ah man a nei bua hi.
16 Tuiphumpa John hun ciang dongin Moses ii thukhamte le kamsaangte lai atte in thu nei hi; tuasia pan kipan Pathian ngam Lungdamna Thupha kisonin mihing sim in, tuasung ah a tum zawk natu in hanciam tek uh hi.Ref 16:16 Mt 11:12-13
17 Ahizong tua Thukhamte sungah thu theklek no khat a bo tu sangin van le lei a bo tu ol zaw tu hi.Ref 16:17 Mt 5:18
18 A zi a khul pasal khat in numei dang khat taw a teang kik le nupa kipalngul mawna vawt ahi hi. Tuaciangin a kikhul numei khat a teenpui pa in nupa kipalngul mawna vawt ahi hi.Ref 16:18 1 Cor 7:10-11; Mt 5:18
Sumhaupa le Lazarus Thu
19 “Khatvei lai in sumhau khat om a puansilh manham tatakte silh in, ni simin nuamsa mama in nungta hi.
20 Tua laitakin, Lazarus kici mizawngpa khat zongh om a, ama meima taw kidimin, sumhaupa ii bangkua ah kipaipui bul hi,
21 sumhaupa sabuai pan a taakte ne tu in lametna taw tuabangin om hi. Uite ngawngawn in a meimate liasak tu in pai hi.
22 Mizawngpa thi a vantunglalangte in, vantung anneakpoai Abraham kungah to tu in, puato uh hi. Sumhaupa zongh thi in kivui hi,
23 Hell sungah ngim nga mama in, ama in a etto le, a khuala na munah, Abraham le a kungah Lazarus a om mu hi.
24 Tua ahikom ama in biakpui a, ‘Pa Abraham awng! Hong hesuak ta'n. Lazarus ii khutme dawn tui sungah pap in ka leei hong votsak tahen, banghang ziam cile hi mun meikuang sungah ngim nga mama khi hi’ ci hi.
25 Ahizong Abraham in, ‘Na nuntak lai in nang sia na pha theampo hong kipia zo a, Lazarus ahile a sia theampo thuak hi. Tua thu phawk ta'n. Ahihang tu in ahile nang ii natna satna na thuak laitak ama in hi munah nuamsa in om hi.
26 Tua bek dom ngawlin ih kilaklaw ah luamthuk pui khat om a, ko kung panin no kungah kipai thei ngawl a, no kung panin ko kungah kuama hong pai thei ngawl hi,’ ci hi.
27 Sumhaupa in, tua ahile Pa Abraham awng, hesuak hong ngen ing, Lazarus sia ka pa inn ah va paisak ta'n,
28 tua munah suapui nga nei khi hi. Natna ngimna thuakna hi munah amate beak hong pai ngawl natu in pai in sonkhol le ka oai hi,’ ci hi.
29 Abraham in, ‘Na suapuite in Moses le kamsaangte nei hi. Tuate ii hilkholnate ngai tahen,’ ci hi.
30 Sumhaupa in zo kik a, ‘Tuabang bek kicing tham ngawl tu hi, pa Abraham awng! Ahizong a thisate khat tho kikin amate kungah pai le, tuasia ciangin a mawna uh pan kisiik pheang tu uh hi,’ ci hi.
31 Ahizong Abraham in, ‘Amate in Moses le kamsaangte ii thu a ngai nuam bua uh le mithi sa khat hong thaw kik hial hangin a um tuan buatu uh hi,’ ” ci hi.