8
Shunem pan Nupi nu Heak kik
1 Tu in Elisha in Shunem ah a teang, a tapa a nuntak kiksak nupinu munah, Topa in kum sali sung a ngei tu kialpi khat a ngam sungah a tunsak natu le ama sia leidang khat ah a innkuanpuite taw pai in a teen tu a kulna thu son hi. Ref 8:1 2 Kum 4:8-37
2 Ama in a sawlna mangin a innkuanpuite taw Philistia ah kum sali sung teang hi.
3 Kum sali bo zawkciang ama Israel ngam ah hong heak kik a, kumpipa ii munah a inn le a leitangte ama tungah a kipiak kik natu ngen hi.
4 Ama in kumpipa sia Elisha ii naseampa Gehazi taw kipaupui in om mu hi; kumpipa in Elisha ii a lamdang nasepte he nuam hi.
5 Gehazi in Elisha ii a thisa mi khat a thawsak kikna thu kumpipa tungah a sawson laitakin tua nu in kumpipa tungah thuumna nei hi. Gehazi in, “Kumpipa awng, tua nupi sia le Elisha ii a nuntak kiksak a tapa sia hi sungah om hi,” ci in son hi.
6 Kumpipa ii dokna te a zona in Gehazi ii son teng sia maan hi ci in nupi nu in son hi, tuasia ciang kumpipa in a uliante khat samin, ama ii neisa teng theampo a piak kik natu le kum sali a om ngawl sung theampo a, a lo sung pan a piang ante theampo ii man taw ama ii a neisa teng theampo a piak kik tu in thupia hi.
Elisha le Syria te Kumpipa Benhadad
7 Syria te ii Kumpipa Benhadad ii ciinat hun khat laitakin Elisha sia Damascus khua ah pai hi. Elisha tua munah om ci in kumpipa tungah a kison ciang,
8 ama in a uliante khat ahi Hazael munah, “Kamsaangpa letsong khat na puak ta'n a, kei ka ciidam tu ziam, dam ngawl tu khi ziam Topa hong doksak tahen,” ci hi.
9 Tua ahikom Hazael in Damascus pan a piang vanh phabel teng kalaoh 40 tungah suanhin Elisha kungah pai hi. Hazael in ama taw a kimu ciang ama in, “Na naseampa Kumpipa Benhadad in nang kungah pai in ama ii natna sia dam tu ziam dam nawn ngawl tu ziam ci sia nang kungah pai in dongh tu in hong sawl hi,” ci hi.
10 Elisha in zo a, “ Topa in ama thi tu hi ci in hong lak hi; ahihang ama ii kungah va pai ta'n a, ama dam kik tu hi na ci ta'n,” ci hi.
11 Tuasia zawkciang Elisha in a lauhuai mama mai puak taw Hazael ii om nuam ngawl a sak dong a maitang salh hi. Thakhat thu in Elisha a thitui luang hi.
12 Hazael in, “Banghangin kap ni ziam, topa awng,” ci in dongh hi.
“Israel mite tungah a lipkhaphuai mama na ngamtat tu teng ka heak hu hi,” ci in zo kik hi. Nangma in a kulhpite na haltum tu a, a khangmoi tangval a phabel teng na thatlum tu a, patangnote na vaatlum tu hi, naungil omte ii ngil na khuakeak tu hi,” Elisha in ci hi.
13 “Banghangin tua zata in vaanglian thei tu khi ziam kei sia bangma ka hi bua hi,” Hazael in ci hi.
“ Topa in hong son zo hi, nang sia Syria te ii kumpipa na suak tu hi,” ci in Elisha in zo hi. Ref 8:13 1 Kum 19:15
14 Hazael sia Benhadad kungah heak kikin, ama in, “Elisha in bang hong ci ziam?” ci in dongh hi.
“Ama in nang sia dam kik tatak tu hi, hong ci hi,” Hazael in ci hi.
15 Ahihang a khuavak ni ciang Hazael in puanvan khat tui sungah pap a, tuasia taw kumpipa ii nuntakna sumit hi.
Tuaciang Hazael in Syria Kumpipa Benhadad ii za laih hi.
Judah Kumpipa Jehoram
(2 Khangtaanghthu 21:1-20 )
16 Israel te Kumpipa Ahab ii tapa Joram ii maan zawk a kum ngana ciang Judah te Kumpipa Jehoshaphat ii tapa Jehoram sia kumpipa suak hi,
17 ama ii kum, kum 32 pha a, tuaciang ama in Jerusalem panin kum liat sung uk hi.
18 A zi sia Ahab ii tanu hi a, tuaciang Ahab ii innkuante bangma in ama in Israel kumpipa ii ngamtat siat teng ma zui hi. Ama in Topa tungah maw hi,
19 ahihang Topa in Judah sia a susia nuam bua hi, banghang ziam cile ama in a naseampa David munah, a suan a paalte in a kizom suakin uk tu hi ci in kamciam pia zo hi. Ref 8:19 1 Kum 11:36
20 Jehoram ii maan sungin Edom te in Judah te langpanin leedo uh a, amate le amate a ki uk kumpi ngam hong suak hi. Ref 8:20 Pian 27:40
21 Tua ahikom Jehoram in ama ii siphu ngalleang theampo taw Zair ah kuan a, tua munah Edom ngalkap honte in amate uumci uh hi. Zan lai in ama le a siphu ngalleang ukte in a kikiim uumna phultham thei in, suakta uh a, a ngalkapte sia amate inn tek ah kithethaang uh hi.
22 Edom sia tua hun pan kipan Judah te khutnuai pan amate le amate a ki uk suak hi. Hi hun sung ma in Libnah khuapi zongh in leedo hi.
23 Jehoram ii a sep a vawt dangte theampo Judah Kumpite ii Taanghthu sungah kiciamtee hi.
24 Jehoram thi a, David khuapi sung kumpite thaan ah kiphumin, a tapa Ahaziah in a kumpi za lua hi.
Judah Kumpipa Ahaziah
(2 Khangtaanghthu 22:1-6)
25 Israel te ii kumpipa Ahab ii tapa Joram a maan zawk kum sawm le kum nii na ciang Jehoram ii tapa Ahaziah sia Judah te ii kumpipa suak hi,
26 ama kum 22 pha a, ama in Jerusalem panin kum khat sung uk hi. A nu sia Athalia hi a, kumpipa Ahab ii tanu, Israel kumpipa Omri ii tunu hi.
27 Ahaziah sia a zi hangin Ahab ii mealheak khat a sua bangin, Ahab ii innkuanpuite bangma in ama in Topa tungah maw hi.
28 Kumpipa Ahaziah in Israel te kumpipa Joram taw kipawl khawm in Syria te ii kumpipa Hazael do uh hi. Ngalkap honte sia Gilead ngam Ramoth ah hong kisii uh a, Joram sia ngal kisimna sungah liam hi.
29 Ama in Jezreel khuapi ah heak kikin, a liamna pan a dam kik tu ngak hi, tuaciang Ahaziah in tua munah pai in ve hi.