24
1 Jehoiakim sia kumpipa ahi laitakin Babylon kumpipa Nebuchadnezzar in Judah sim hi, tuaciang kum thum sung Jehoiakim sia ama ii ukna nuai ah lutsak hi; tua zawkciang ama in leedo hi. Ref 24:1 Jer 25:1-38; Dan 1:1-2
2 Topa in Babylon te, Syria te, Moab te le Ammon te ii ngalkapte ngalsim tu in Judah ah paisak a, Jehoiakim langpanin Topa in a naseam a kamsaangte tungtawnin ka vawt tu hi a ci bangin Judah lalsak tu in kuan uh hi.
3 Hisia Topa ii thupiakna taw a piang hi a, Kumpipa Manasseh ii mawna teng hu in Judah mite sia ama muna pan a betkeak thei natu a piang ahi hi,
4 tuaciang, a tuan in mawnei ngawlte theampo zongh a thalup hu ahi hi. Topa in Manasseh ii tuabang ahikom in maisak zo ngawl hi.
5 Jehoiakim ii sep le vawt theampo sia Judah Kumpipate Taanghthu sungah kikhum hi.
6 Jehoiakim thi a, a tapa Jehoiachin in a kumpi za laih hi.
7 Egypt kumpipa le a ngalkaphonpi in Egypt pua sia ah kuan kik nawn ngawl uh hi, banghang ziam cile Babylon kumpipa in tu in Egypt te ii ngam theampo, Euphrates ngun pan Egypt saksang ngamngi dong uk hi.
Judah Kumpipa Jehoiachin
(2 Khangtaanghthu 36:9-10)
8 Jehoiachin sia Judah kumpipa a sua hunin kum sawm le kum liat pha a, ama in Jerusalem pan tha thum sung uk hi. A nu sia Nehushta hi a, Jerusalem khua pan Elnathan ii tanu hi.
9 A pa ii ngamtat teng zui in Jehoiachin in Topa tungah maw hi.
10 Ama ii kumpi maan hun sungah Nebuchadnezzar uliante ii a uk Babylon ngalkaphonpi sia Jerusalem sim tu in kuan pui in, tua khuapi uumci uh hi.
11 Tuabang a uumci sungin Nebuchadnezzar ama mama Jerusalem ah pai hi,
12 tuaciang Kumpipa Jehoiachin sia a nu, a tapate, a uliante, le kumpi inn uliante taw Babylon te tungah tum uh hi. Nebuchadnezzar in a kumpi maan a kum liatna hun sungin Jehoiachin sia thong taak tu in Ref 24:12 Jer 22:24-30,24:1-10,29:1-2
13 Babylon ah paipui a, Biakinnpi sung le kumpi inn sungah sum le vanh manpha theampo pua siat hi. Topa ii sonkhol bangma in Nebuchadnezzar in Biakinnpi sungah zak tu Solomon kumpipa ii vawt khamh ankuang ankeaute sutham siat hi.
14 Nebuchadnezzar in Jerusalem mite, kumpipa tapate le lampuite theampo thongtaak tu in ciapui hi, a vekpi kingawm 10,000 pha hi. Ama in khutthiamna nei theampo, thikseakte zongh ciapui hi, Judah ah mizawngbel teng bek nusia hi.
15 Nebuchadnezzar in Jehoiachin sia Babylon ah thongtaak tu in ciapui a, Jehoiachin ii nu, a zite, a uliante le Judah mi lampuite theampo taw zong ciapui hi. Ref 24:15 Eze 17:12
16 Nebuchadnezzar in mihing thupi theampo Babylon ah puak hi, a vekpi in 7,000 pha uh hi, tuaciang a ciapui thikseakte kihel, nasep thiamte 1,000 sia ngalkap seam thei tu cinghtengh vive ahi uh hi.
17 Nebuchadnezzar in Jehoiachin ii pano, Mattaniah sia Judah kumpipa suaksak a, a min Zedekiah ci in khealsak hi. Ref 24:17 Jer 37:1; Eze 17:13
Judah Kumpipa Zedekiah
(2 Khangtaanghthu 36:11-12; Jeremiah 52:1-3a)
18 Judah kumpipa ii kumpipa a sua hunin Zedekiah sia kum 21 pha hi, tuaciang ama in Jerusalem pan kum sawm le kum khat sung uk hi. A nu sia Hamutal hi a, Libnah khua mi Jeremiah ii tanu ahi hi. Ref 24:18 Jer 27:1-22,28:1-17
19 Kumpipa Zedekiah in Topa tungah Kumpipa Jehoiakim maw bang tatakin maw hi.
20 Topa sia Jerusalem le Judah mite tungah thin uuk mama ahikom ama muna pan bengkeak hi. Ref 24:20 Eze 17:15