21
Judah Kumpipa Manasseh
(2 Khangtaanghthu 33:1-20)
1 Manasseh sia Judah kumpipa a sua hunin ama kum sawm le kum nii pha hi, tuaciang ama in Jerusalem panin kum 55 sung uk hi. A nu sia Hephzibah hi.
2 Topa ii mite mai sang hong nawk ciang a kinotkeak minamte ii a thasiathuai ngamtatna te zui in Manasseh in Topa tungah maw hi. Ref 21:2 Jer 15:4
3 A pa Hezekiah ii a suksiatcip sa doai biate ii biakpiakna munte ama in sa kik hi; Israel kumpipa Ahab ii vawt bang keak ma in ama in Baal biak natu biaknataute sa in, Asherah numeipathian ii milim vawt hi. Manasseh in aksite zongh bia hi.
4 Ama in Topa ii ama a kibiak natu mun hi a ci Biakinnpi sungah doai sepna taute sa hi. Ref 21:4 2 Sa 7:13
5 Biakinnpi ii leitualte nii sungah aksite a biak natu biaknatau te vawt hi.
6 A tapa sia meihal biakpiakna in pia hi. Ama in aisaan le mitbumna zangh in, tuaciang aisaan theite le thaa sam theite kungah thu veu dongh hi. Ama in Topa tungah nasia takin maw a, a thin uukna piangsak hi.
7 Ama in numeipathian Asherah ii lim sia Biakinnpi sungah koi hi, tua mun sia Topa ii David le a tapa Solomon tungah: “Hi Jerusalem khua ah hi Biakinnpi sung sia kei hong kibiak natu in minam sawm le niite ii ngamsung bup pan ka teal ahi hi.
8 Tuaciang Israel mite theampo in ka thupiakna te theampo ni in, ka naseampa Moses ii amate a piak thukham buppi te a keamcing le amate ii taanghpupite tungah ka piak ngam le lei panin a kinawkeak tu ka oai buatu hi,” a cina mun ahi hi. Ref 21:7-8 1 Kum 9:3-5; 2 Khang 7:12-18
9 Ahihang Judah mite in Topa thu ni ngawl a, Manasseh in a mite mai sang a nawk hun lai a, Topa ii a nawkeak mite sangin mawna nasia zaw a vawt natu ngawngawn in lampui hi.
10 A naseam kamsaangte tungtawnin Topa in,
11 “Kumpipa Manasseh in hi a thasiathuai mama nate Canaan mite vawt bang sangin a nasia zaw lai in vawt hi; tuaciang ama ii milimte taw Judah mite mawna sungah lampui hi.
12 Tua ahikom kei, Israel te Topa, Pathian in Jerusalem le Judah tungah tuasiatna ka piangsak tu a, a za theampo khing liang tu hi.
13 Samaria daan ka piak bang le Israel kumpipa Ahab le a suan a paalte ka vawt bangin Jerusalem daan ka pia tu hi. Jerusalem sia a mite bo dongin ka nawt siat tu a, a kinawt thiang a khup lam a kikoi pakan khat bangin ka vawt tu hi.
14 A nungta lai teng ka nusia tu a, a ngalte khut sungah ka aap tu hi, tuate in amate zothal tu a, a leitang nopzak tu hi.
15 Hi bangin ka vawt tu sia banghang ziam cile ka mite in kei tungah hong maw a, Egypt ngam pan a taanghpupite ii a pusua pan kipan tuni dong ma ka thin hong uuksak tawntung hi,” ci hi.
16 Manasseh in mawna nei ngawl mihing tam mama thatlum a, Jerusalem lampite chisan luang hi; hi teng banah ama in a mite milim biakna ah lampui a, Topa tungah mawsak hi.
17 Manasseh ii sep le vawt a dangte theampo mawna a vawtte theampo kihel in, Judah Kumpipate Taanghthu sungah kikhum hi.
18 Manasseh thi a, kumpi inn huang sung Uzza huan ah kiphum hi, tuaciang a tapa Amon in a kumpi za laih hi.
Judah Kumpipa Amon
(2 Khangtaanghthu 33;21-25)
19 Amon sia Judah te kumpipa a sua hunin kum 22 pha a, Jerusalem panin kum nii sung uk hi. A nu sia Meshullemeth hi a, Jotbah khua pan Haruz ii tanu ahi hi.
20 A pa Manasseh bangma in ama in Topa tungah maw hi;
21 ama in a pa ii ngamtatna teng zui in a pa ii biak milimte bia hi.
22 Ama in a taanghpupite ii Pathian, Topa nial a, Topa ii thupiak ni ngawl hi.
23 Amon ii uliante in ama thasawm in, kumpi inn sungah ama thatlum uh hi.
24 Judah mite in Amon a that teng thatlumin, a tapa Josiah kumpi suaksak hi.
25 Amon ii a sep a vawt dangte theampo Judah Kumpipate Taanghthu sungah kikhum hi.
26 Amon sia Uzza huan sung thaan ah kiphum a, a tapa Josiah in a kumpi za laih hi.