14
Judah Kumpi Amaziah
(2 Khangtaanghthu 25:1-24)
1 Israel te Kumpipa Jehoahaz ii tapa Jehoash ii maan zawk a kum nii na ciang, Joash ii tapa Amaziah sia Judah te kumpipa suak hi,
2 ama kum 25 pha a, ama in Jerusalem panin kum 29 sung uk hi. A nu sia Jerusalem pan a Jehoaddin hi.
3 Ama in Topa ii diksak bangin ngamta a, ahihang ama sia a taanghpupi David bang hi ngawlin, a pa Joash ii ngamtat bangin ngamta zaw hi.
4 Ama in doai biakna munte baltham ngawl a, tuaciang mihingte in sangaw biakpiakna le ngimnamtui halna te tua munah zom to suak uh hi.
5 Amaziah in a thuneina a kip po ciang, a pa kumpipa a that uliante thatsak hi.
6 Ahihang ama in tuate ii tate thatlum ngawl a, Moses Thukham sungah Topa ii thupiak ahi: “A tate ii a vawt khialnate hu in nute pate kithisak ngawl tu a, pate nute ii a vawt khialnate hu in tate kithisak ngawl tu hi; mihing khat sia ama ii khialna hang bekin kithisak tu hi,” a cite zui hi. Ref 14:6 Thkna 24:16
7 Amaziah in Edom ngalkapte 10,000 sia Ci Kuam sungah that hi; ama in Sela khuapi sia kidona sungah suan a, Joktheel ci in a min phuak a, tu dong ma tua min pua lai hi.
8 Tuaciang Amaziah in Israel te Kumpipa Jehoash tungah kamtaite paisakin kido natu thato hi.
9 Ahihang Kumpipa Jehoash in hi bang zo kikna thaak kik hi: “Khatvei lai in lingkung khat Lebanon Mual tungah a om sia in cedar kung khat ii munah: ‘Na tanu sia ka tapa ii zi tu hong pia ta'n,’ ci hi. Ngamsa khat hong pai in lingkung sia tuanhcil hi.
10 Tu in Amaziah awng, nang in Edom te na zaw hu in kisathei ni hi. Na minthanna taw lungkim in a, inn ah om po in. Nang le na mite lalna bek hong pia tu ngimna banghangin piangsak nuam ni ziam?” ci hi.
11 Ahihang Amaziah in ngai nuam ngawl hi, tua ahikom Kumpipa Jehoash in a mite taw kuanin Judah ngam Beth Shemesh ah kido uh hi.
12 Amaziah ii ngalkap honte in lel a, a ngalkap te theampo amate inn tek ah tai uh hi.
13 Jehoash in Amaziah sia manin thongtaaksak hi, Jerusalem ah paisuak in a khuapi ii luphung sia Ephraim Kongpi pan A Kiing Kongpi dong metre 200 dektak kikaal sung teng baltham hi.
14 Ama in ngunn le khamh a mu theampo, biakinn vanh theampo le kumpi inn sungah sumngum te la in Samaria ah ciapui hi. Ama in mihing pawlkhat zongh a kitan kik tu in ciapui hi.
15 Jehoash ii a sep a vawt dangte theampo, kumpipa Amaziah taw a kidona sungah a hannate huamin, Israel te ii Kumpipate Taanghthu sungah kikhum hi.
16 Jehoash thi a, ama sia Samaria khua kumpi thaan ah kiphum hi, tuaciang a tapa Jeroboam II in ama ii kumpi za laih hi.
Judah Kumpipa Amaziah Thina
(2 Khangtaanghthu 25:25-28)
17 Israel Kumpipa Jehoash ii thi zawk kum sawm le kum nga dong Judah te kumpipa Amaziah nungta hi.
18 Amaziah ii a sep a vawt dangte theampo sia Judah te Kumpipate ii Taanghthu sungah kikhum hi.
19 Amaziah suamlup natu in Jerusalem ah sawmna khat om hi, tua ahikom ama sia Laschish khuapi ah tai hi, ahihang a ngalte in tua munah zuizen in thatlum uh hi.
20 A luang sia siphu khat tungah suanh in Jerusalem ah ciapui uh hi, David khuapi kumpi thaan ah ama kiphum hi.
21 Judah mite in a tapa kum sawm le kum luk a pha Uzziah sia kumpilukhu khusakin kumpi suaksak hi.
22 A pa thi zawkciang Uzziah in Elath khua suan kikin sa kik hi.
Israel Kumpipa Jeroboam II
23 Judah te kumpipa Joash ii tapa Amaziah maan zawk a kum sawm le kum nga kum in Jehoash ii tapa Jeroboam sia Israel te ii kumpipa suak hi, tuaciang ama in Samaria pan kum 41 sung uk hi.
24 Ama in, Israel sia mawna sungah a then, ama mai ah a seam masa Nebat ii tapa Kumpipa Jeroboam ii a ngitlo ngamtatna teng zui in Topa tungah maw hi.
25 Ama in Israel te ii neisa ngamkhen theampo, saksang pan Hammath Mualciangh, thangsang pan Tuipi Thi dong zo kik hi. Hisia in Jonah Gath Hepher khua pan a kamsaangpa Amittai ii tapa Oonah tungah Topa, Israel te ii Pathian ii a kamciamsa sia ahi hi. Ref 14:25 Jon 1:1
26 Topa in Israel te ii a cizathuai mama thuakna sia mu hi; tuaciang amate a hu tu kuama om ngawl hi.
27 Ahihang Israel te a bo cimit tu sia Topa ii tupna hi ngawl hi. Tua ahikom ama in amate sia Kumpipa Jeroboam II tungtawnin suatak hi.
28 Jeroboam II ii a sep a vawt dangte theampo, ngal sung a hanna le Damascus le Hamath khuate, Israel te atu a laak kikna theampo sia Israel Kumpipate Taanghthu sungah kikhum hi.
29 Jeroboam thi a, kumpi thaan ah kiphumin, tuaciang a tapa Zechariah in a kumpi za lua hi.