6
Solomon in Biakinnpi Sa
1 Israel mite ii Egypt a nusiat zawk kum zali le kum sawmliat zawk, Solomon ii maan zawk kum lina, a tha niina, Ziv tha sungah Solomon in Biakinnpi sak kipan hi.
2 A sungsang a sauna metre 27 pha a, metre 9 zai in, metre 13.5 saang hi.
3 A tumna inndoi sia metre 4.5 saangin, a zaina metre 9 hi a, biakinnpi cia ma zai hi.
4 Biakinnpi ii pangte ah a om a hawngvang te sia a sungsang sangin a puasang ciakzaw hi.
5 Biakinnpi ii panghte le a nungsangah inn pepna inndawl thum khat sia a pang puasang nealin sa a, dawl khat simin metre 2.2 veu saang hi.
6 A dawl nuainungbel ii a inndoi khat sim metre 2.2 veu zai a, a dawl laizang sia metre 2.7 zai in, a dawl tungnungbel sia metre 3.1 zai hi. Suatte tungah om biakinn pang sia a nuai suat ah omte sangin pazaw ahiciang a inndoite sia pang sungah suatthal phum kul ngawl a, pang tungah kinga thei hi.
7 Biakinnpi a sak tatak ciang sek, hei, le thik vanhzakte ii ngin a kizaak ngawl tu in, Biakinnpi sak natu suangtumte sia suangkhuk sungah kivawt khol hi.
8 Innpi pepna ii a dawl nuainungbel tumna sia Biakinnpi ii thang sangah om a, tua mun panin a dawl niina le a thumna pai natu kealleite kithung hi.
9 Tuabangin Solomon kumpipa in Biakinnpi a sak man hi. Ama in innciingdap sia cedar thingpheakte le innsunhte taw vawt hi.
10 Dawl thum a pha inn pepna sia metre 2.2 saang a, inndoi simin Biakinnpi pang pua nung sia neal in kisa a, cedar innsunhte taw kipee-awsak hi.
11 Topa in Solomon munah,
12 “Ka thukhamte le ka thupiak te na zui le na pa David tungah sep tu a ka kamciam teng nang atu seam tu khi hi.
13 Tu a na sak hi Biakinnpi sung, Israel ka mite sungah kong teang tu a, tuaciangin amate ka nusia ngei buatu hi,” ci hi.
14 Tuabangin Solomon in Biakinnpi a sak man hi.
Biakinnpi Sungsang Zepna
(2 Khangtaanghthu 3:8-14)
15 Biakinnpi sung sang pangte sia suat tung pan innciingdap dong cedar thing pheakte taw kituam a, tuaciang a suat teng taakthing kizangh hi.
16 A sung sang inndoi khat, Thiangtho belh Mun a kici sia Biakinnpi ii nungsangah kisa hi. Tua sia metre 9 sau in, cedar thingpheak a kilhkhopte taw kidoi a, suat tung panin innciingdap dong phato hi. Ref 6:16 Pu 26:33-34
17 Thiangthobel Mun ii mai ah a om inndoi sia metre 18 sau hi.
18 Cedar thingpheakte sia uum ngate le paak a kikhuak limte taw kizeam hi; a sungsang bup sia cedar thingpheak taw kituam a, tua hu in pangin a kiciang suangte kimu thei ngawl hi.
19 Biakinnpi nungsangah Topa ii Thuciamna Thingkuang koi natu in inn sungnung inndoi khat kisa hi.
20 Hi inn sungsang inndoi sia metre 9 sau a, metre 9 zai in, metre 9 saang hi, a buppi in khamh ciitak taw kituam hi. Biaknatau sia cedar thingpheakte taw kituam hi.
21 Biakinnpi sungsang sia khamh taw kituam a, khamh taw ma a kituam a inndoi sungnung tumna sia khaamtan in khamh kual kipeete kithung hi.
22 Biakinnpi sungsang buppi khamh taw kituam a, Thiangthobel Mun aa biaknatau sia zongh khamh taw kituam hi. Ref 6:22 Pu 30:1-3
23 Meter 4.4 veve a saang Cherub lim nii sia olive thing taw kivawt a, Thiangthobel Mun ah kikoi hi.
24-26 Tuate ngeal a letna le a lim a meal kibang hi. Khatsimin tha nii tek nei hi. Tuaciang a thate khat ciang metre 2.2 sau hi, tua ahikom a kiphal a tha dawn khat pan dawn khat dong metre 4.4 pha hi.
27 Tuate ngeal sia Thiangthobel Mun ah a kicial in kikoi in, a tha kiphalte dawn veve a inndoi laizang santak ah kiphasak a, tuaciang a tha dangte nii in pangte pha uh hi.
28 Cherub te a nii in khamh taw kituam hi. Ref 6:23-28 Pu 25:18-20
29 A inndoipi pangte le a sungnung inndoi pangte sia a khetkuak cherub te ii limte, palm thingkung limte le paak limte taw kizeam siat hi.
30 A suat ngawngawn khamh taw kituam hi.
31 Olive thing taw a kivawt bangkua a kipee nii te sia Thiangthobel Mun tumna ah kikoi hi; a kongbiang tung santak sia a tung zumin a kawn khat hi.
32 Kongkhate sia cherub lim te, palm thingkung limte le paak limte taw kizeam a, khamh taw kituam hi.
33 Inndoipi sung tumna kongkhamung sia siik li nei in olive thing taw kivawt hi.
34 Kongkha kithep thei nii sia taakthing taw kivawt a,
35 cherub limte, palm thingkung lim le paak lim te taw kizeam hi, tuate sia a kibang kim in khamh taw kituam hi.
36 Zum sungnung sia Biakinnpi ii mai ah kisa a, pangte taw ki uum in, tuate atu in suang ngual thuap thum simin cedar thingpim ngual khat veu kician nelh hi.
37 Biakinnpi ii tawdap sia Solomon kumpi maan zawk a kum lina a tha niina Ziv tha sungah kiciang hi.
38 Solomon ii maan zawk a kum sawm le kum khat a tha liatna Bul tha sung ah, a kingeal bang lianin kiman thiang hi. Solomon atu tuasia a sak na in kum sali hai hi.