4
Solomon ii Uliante
1 Solomon sia Israel ngam bup ii kumpipa hi a,
2 tuaciang hite sia a uliante ahi uh hi:
Thiampi: Zadok ii tapa Azariah
3 Zum thuzeakpite: Shisha tapate Elihoreph le Ahijah
Thu ciamtee pipa: Ahilud tapa Jehoshaphat
4 Ngalkaphonpi ukpa: Jehoiada tapa Benaiah
Thiampite: Zadok le Abiathar
5 Ngamkhen uk mangte a ukpipa: Nathan tapa Azariah
Kumpi thudokpa: Nathan tapa thiampi Zabud
6 Kumpi inn sung naseamte a ukpa: Ahishar
Zawthawk thu taw na a kiseam sakte a ukpa: Abda ii tapa Adoniram ahi hi.
7 Solomon in Israel ngam sungah ngamkhen uk mangte sawm le nii koi hi. Kumpipa le a bangkua ii kum khat bup a neak tu sia tua mangte khat simin a uk sung ngamkhen tek panin tha sim a banin piasak hi.
8 Tua ulian sawm le niite le amate ii ukna ngamkhente sia hi bang ahi hi:
Benhur: Ephraim mualtung ngam teng
9 Bendeker: Makaz, Shaalbim, Beth Shemesh, Elon le Beth Hanan khuapite
10 Benhesed: Arubboth le Socoh khuapite le Hepher ngam theampo
11 Solomon tanu Taphath ii pasal Benabinadab: Dor ngamkhen buppi
12 Ahilud tapa Baana: Taanach le Megiddo khuapite le Jezreel khua thangsang, Beth Shan le Zarethan nai khuate ah a om ngamkhen theampo, Abel Meholah khuapi le Jokmeam khuapi dong
13 Bengeber: Gilead ngam Ramoth khuapi, tuaciang Manasseh ii suan ahi Jair ii bee le phung neisa Gilead ah khuanote le Bashan ngamsung Argob ngamkhen, a vekpi in khua lian sawmluk hi a, luphung taw a ki uum le kongpite taau taw a kikalh te
14 Iddo tapa Ahinadab: Mahanaim ngamkhen
15 Solomon ii tanu dang khat Basemath ii pasal Ahimaaz: Naphtali ngam
16 Hushai tapa Baana: Asher ngamkhen le Bealoth khua
17 Paruah tapa Jehoshaphat: Issachar ngam
18 Ela tapa Shimei: Benjamin ngam
19 Uri tapa Geber: Amor kumpipa Sihon le Bashan kumpipa Og ii a ukna sa Gilead ngamkhen
Hi ngam uk sawm le niite ii tungsia ah ngam bup a uk mang khat om hi.
Solomon ii kumpi maan sung Khantona
20 Judah le Israel mite sia tuipivaal a senmal za in tam hi; amate in ne in, dawnin, lungdam uh hi.
21 Solomon ii kumpi ngam sia Euphrates ngun pan Philistia le Egypt te ngamngi dong ngam theampo kihel hi. Amate in shia pia in, ama nuntak sung tawntung a khutnuai ah om uh hi. Ref 4:21 Pian 15:18; 2 Khang 9:26
22 Solomon ii ni sim a tulmawk ante sia, zungtaang vui neal litre 5,000, an litre 10,000,
23 sangai, saza, sanang le akte bek dom ngawlin, inn ah a kivaak khui sawm, ngam sungah a kitha khui kul le tuu zakhat te ahi uh hi.
24 Solomon in Euphrates Ngun ii nitumna sang ngam theampo, Tiphsah khua omna Euphrates pan nitumna sang Gaza khuapi dong uk hi. Tuaciang Euphrates ii nitumna sang kumpipate theampo sia ama khutnuai hi a, ngamngi kizawng ngamte theampo taw kilem hi.
25 Ama nuntak lai tengin Judah le Israel ngamsung a teang mite ngammuangin, innkuan simin a sapitkungte le a thei kungte taw nuamsa uh hi.
26 Solomon in ngalleang kai siphute atu siphu buk 40,000 le siphu ngalkap 12,000 nei hi. Ref 4:26 1 Kum 10:26; 2 Khang 1:14,9:25
27 Ngamuk mang sawm le niite in Solomon le a kumpi inn sungah an ne theampo atu an sia tha simin a piak tu za tek pia uh hi; amate in a kisamh theampo a tawntungin pia uh hi.
28 Ngamkhen uk mang khat simin a kisamh babang taangpi le taangphawte zongh, ngalsimna siphute le naseam nganhingte an tu sik uh hi.
29 Pathian in Solomon sia a tuampian ciimna le thuthuk mu theina, a kitee thei ngawl heakna lianpi pia hi.
30 Solomon sia Nisuana sang a miciimte ahibuale Egypt miciimte sangin ciim zaw hi.
31 Ama sia mihing a minpiang a ciimbel ahi hi: Ezrah mi Ethan, tuaciang, Mahol ii tate ahi Heman, Calcol le Darda, sangin ciimzaw a, ama ii minthanna sia kiim le paam ngam theampo dongin kizel hi. Ref 4:31 Ps 89Thulu
32 Ama in paunak 3,000 le la ngui tul vaal phuak hi. Ref 4:32 Pau 1:1,10:1,25:1
33 Ama in thingkung le lopate thu thusonin nei a, Lebanon a cedar te pan pang tung a po hyssop te thu dong son thei hi; ama in ngamsate, vacimte, awmtaal nganhingte le ngasate ii thu son hi.
34 Leitung bup a kumpite in a ciimna za a, a thuson ngai tu in thataak mite paisak uh hi.