16
1 Hanani ii tapa kamsaang pa Jehu tungah Baasha atu kam hi teng Topa in pau hi:
2 “Nang sia bangma ahi ngawl khat hi napi ka Israel mite lampui in hong koi khi hi. Tuaciang tu in nang zongh Jeroboam bangma in mawna na vawt a, ka mite mawna sungah lampui zo ni hi. Amate ii mawnate in kei hong thin uuksak hi,
3 tua ahikom Jeroboam ka vawt bangma in nang le na bangkua kong heam tu hi.
4 Na innkuanpuite khuapi sungah a thi peuma ui in ne tu a, ngam taanzauna sungah a thi peuma vaciik in ne tu hi,” ci hi.
5 Baasha ii a sep a vawt dang theampo Israel Kumpipate Taanghthu sungah kikhum hi.
6 Baasha thi a Tirzah ah kiphum hi, tuaciang a tapa Elah in a kumpi za laih hi.
7 Baasha le a bangkua langpanna, tua Topa kammalte sia kamsaangpa Jehu in pia hi, banghang ziam cile Baasha in Topa tungah mawna vawt hi. Ama in Topa thin uuksak hi, banghang ziam cile ama in tatkhakna sia ama mai a, Jeroboam vawt bangin a vawt dom ngawlin, Jeroboam ii innkuanpuite theampo zongh that siat hi.
Israel Kumpipa Elah
8 Judah kumpipa Asa ii maan zawk a kum 26 na in, Baasha ii tapa Elah sia Israel kumpipa suakin Tirzah pan kum nii sung uk hi.
9 A uliante khat, kumpipa siphu ngalleangte ii kimkhen khat a ukpa Zimri in ama suam sawm hi. Ni khat ni in Tirzah ah Elah sia kumpi inn ukpa Arza ii inn ah zu kham hi.
10 Zimri sia inn sungah tum a, Elah suamlum in kumpi za laih hi. Hi bang a pian hun sia Judah kumpipa Asa a maan zawk kum 27 na kum ahi hi.
11 Zimri kumpi a sua po ciangin Baasha ii innkuanpuite theampo thatlum siat hi. A mealheak le a lawm ahi theampo pasal a minpiang thatlumsak siat hi.
12 Tuabangin kamsaangpa Jehu tungtawnin Topa ii Baasha huvau a son bang tatakin Zimri in Baasha innkuanpui theampo thatlum siat hi.
13 Amate ii milim a biak hu le Israel mite mawna sung a thet pui hu in Baasha le a tapa Elah in Israel ii Pathian, Topa a thin uuksak hi.
14 Elah ii sep le vawt a dangte theampo Israel Kumpipate Taanghthu sungah kikhum siat hi.
Israel Kumpipa Zimri
15 Judah kumpipa Asa maan zawk kum 27 na ciang Zimri in Tirzah pan Israel sia ni sali sung uk hi. Israel ngalkapte in Philistia ngam Gibbethon khuapi uumci uh hi,
16 tuaciang amate in Zimri ii kumpipa a suamlup a zaak uh ciang, tua hun tua munah amate ngalkap ukpa Omri sia Israel kumpipa in thangsak uh hi.
17 Omri le a ngalkapte in Gibbethon nusia in Tirzah ah pai a uumci uh hi.
18 Zimri in khuapi sia kila zo ci in a mu ciang kumpi inn ii a sungsang kulh ah tumin kumpi inn hal a, ama zongh meikuang sungah thi hi.
19 Hi bangin a pian sia ama in Topa tungah a maw hang hi. Ama mai ah a maang Jeroboam bangma in ama mawna hu le Israel mite mawna sungah a lampui hu in, Topa lungkim ngawlna piang hi.
20 Zimri ii a sep a vawt dangte theampo a sawmna thu zongh Israel Kumpipate Taanghthu sungah kikhum siat hi.
Israel Kumpipa Omri
21 Israel mite sia kikhen hi: pawlkhat te in Ginath ii tapa Tibni kumpi suaksak nuam a, a dangte in Omri dei uh hi.
22 A khakbel ciang Omri deite in zo zaw hi; Tibri thi a, Omri sia kumpi suak hi.
23 Tuabangin Judah kumpipa Asa maan zawk a kum 31 na kumin Omri sia Israel kumpipa suak hi, tuaciang ama in kum sawm le kum nii sung uk hi. A masa kum luk teng sia ama in Tirzah pan uk a,
24 tua zawkciang Samaria ngam mual khat sia Shemer a kici pasal khat ii tung pan ngunntang 6,000 taw lei hi. Omri in tua mual sia kulh vawt in tua munah khua khat saat a, a min sia mual nei lui pa min Shemer la in Samaria phuak hi.
25 Omri in ama mai a te sangin Topa tungah a nasia zawin maw hi.
26 Ama ii mai ah Jeroboam bangma in ama mawna te hu le a mite sia mawna le milim biakna sungah a thet pui hu in Israel ii Pathian Topa thin uukna piangsak hi.
27 Omri ii a sep a vawt dangte le ama zawnate sia Israel Kumpipate Taanghthu sungah kikhum hi.
28 Omri thi a, Samaria ah kiphumin, a tapa Ahab in a kumpi za laih hi.
Israel Kumpipa Ahab
29 Judah kumpipa Asa ii maan zawk a kum 38 na kumin Omri ii tapa Ahab sia Israel kumpipa suak a, Samaria ah kum 22 sung uk hi.
30 Ama in ama ii mai a kumpi dangte sangin Topa tungah mawna tam vawtzaw hi.
31 Ama atu in Kumpipa Jeroboam bangin a maw tu sia pha zo sa ngawl hi; ama in tua kaanin ngamta a, Jezebel a kici Sidon kumpipa Ethbaal ii tanu teenpui in Baal pathian bia hi.
32 Ama in Samaria ah Baal atu biakinn saksakin, biaknatau khat vawtin biakinn sungah koi hi.
33 Ama in numeipathian Asherah milim khat zongh vawt hi. Israel ii Pathian Topa thin uuk natu in ama ii masia a, Israel kumpi theampo sangin ama in vawt zaw lai hi.
34 Ama ii maan sungin Bethel panin Hiel in Jericho sa kik hi. Nun ii tapa Joshua tungah Topa ii sonkhol bangma in Hiel in a tapa lianbel Abiram sia Jericho khua ii tawdap a vawt laitakin thi sua a, tuaciang a tapa a nobel Segub zong kongpite a vawt ciang thisua hi. Ref 16:34 Jos 6:26