8
Ai Khua a Kilaakna le a Kilalcipsakna
1 Topa in Joshua munah, “Ngalkapte a vekpi in keng in a, Ai khua ah va pai to tavun. Lau heak vun a thinkiam heak vun. Ai kumpipa kong zosak tu hi; a mite, a khuapi le a ngam a lei nang aa hi tu hi.
2 Jericho le a kumpipa tungah na vawt uh bangin Ai le a kumpipa tungah na vawt tu uh hi; ahihang tu sia hun ciang vanhte le ngannote noma neisa tu in na keam thei tu uh hi. A muanmawk ngawl het tu in khuapi sia a nungsang pan sim tu in kithoai vun.”
3 Tua ahikom Joshua sia a ngalkap theampo taw Ai khua ah kuan tu in kinging hi. Ama in a ngalkapte sung pan a phabel 30,000 tealtuam a,
4 thupiakna hi teng taw zan in kuansak hi, “Khuapi ii langkhat ah na buu vun a, ahizong tua khua taw kikhuala leih heak vun; a sim tu in na kinging vun.
5 Ka mite le keima in khuapi kong neak tu uh hi. Ai khua mite in ko sim tu hong pai uh ciang a masa ih ngamtat bangin kiheak in kong tai tu uh hi.
6 Khuapi pua ah kong thetpui uh dong delsak tu khu hi. A masa lai bangma in amate kung pan a taikeak in hong ngaisun tu hi.
7 Tuasia ciang no sia na bukna uh pan hong pusuak in, khuapi nong la tu uh hi. Topa na Pathian in tua khua sia no hong pia tu hi.
8 Khuapi na laak zawk uh ciang, Topa thupiak bangin na haltham tu uh hi. Hi teng sia no atu thu piakna hi.”
9 Tua ahikom Joshua in amate kuansak a, Ai le Bethel kilaklaw, Ai ii nitumna sang a bukna tu mun zuanin tuak sung pan ngak uh hi. Joshua sia ngiaphual ah zan ngiak hi.
10 Zingsang tuungin Joshua tho a, ngalkapte khawmtua hi. Tuaciang ama le Israel lampuite in amate Ai khua zotpui hi.
11 Ama taw a kithua ngalkapte sia khuapi tumna kongpi sangah pai in, Ai le amate kilaklaw leikuam khat ii halna saksang ah ngiaphual saat uh hi.
12 Ama in mihing tulnga bang khuapi ii nitumna sang Ai le Bethel kilaklaw ah buusak hi.
13 Ngalkapte sia a kido hun tak ciang ngiaphualpi a om teng khuapi ii saksang ah , a dang teng nitumna sangah ngalsim tu in hawm hi. Joshua ahile leikuam ah zan ngiak hi.
14 Ai kumpipa in Joshua ii mite a mu ciang manlang takin diang hi. Ama le a mite sia Jordan Kuam sangah a masa a lai bangma in Israel te do tu in hong pai uh hi, amate ii nungsang panin a kisim tu hunlam a he meal bua uh hi.
15 Joshua le a mite sia a nungkin bangin hong kiheang a, mun awngna sangah hong taimang uh hi.
16 Khuapi sungah a om pasal theampo sia ngalte del tu in kisam a, Joshua a del uh ciang, amate sia khuapi pan a khuala vaialna hong theng uh hi.
17 Ai khua mi pasal a minpiang in Israel te del ahikom khuapi kihong keak a, kuama a hung tu om ngawl hi.
18 Tuasia ciang Topa in Joshua mun ah, “Na teipalh sia Ai khua kawksak in; nang tungah tua khua hong pia khi hi,” ci hi. Joshua in ama a kisawl bangin ngamta hi,
19 tuaciang a khut a lapto po ciang, a buu ngalkapte ding to in, khuapi sungah tai a tua khuapi la uh hi. Tua zawk po ciang khuapi hal uh hi.
20 Ai mite in a lee et kik uh ciang, meikhu van ah a kaato mu uh hi. Amate atu in suatak natu lampi om ngawl hi, banghang ziam cile Israel te ngam kolhna sangah a taite sia tu in a sim tu in hong kingeilee kik uh hi.
21 A dang teng in khuapi la zo in, a kaanghtham sia Joshua le a mite in a mu uh ciang heak kik in, Ai mite a thatlum tu in kipan hi.
22 Khuapi sungah a om Israel te sia tu in ngalsim pui tu in hong paisuk uh hi. Tuabangin Ai mite sia Israel te in kiim uum cip zo ci in kimu a, tua zawkciang amate a vekpi in thalup thuak uh hi. Kuama tai ngawl a,
23 Ai kumpipa simngawl kuama nungta in a suakta om ngawl hi. Ai kumpipa ahile kiman a Joshua kungah kipuak hi.
24 Israel te in ngamkolna sungah amate a del ngalte thatlum siat uh hi. Tua zawkciang amate Ai ah heak kikin tua munah a om theampo thatlum siat uh hi.
25-26 Joshua in a teipalh sia Ai khua kawk topsak a, tua munah a om mihing theampo a kithalup mateng in a tei a khia bua hi. Tua ni in Ai khua mite a vekpi in kithatlum siat hi — numei pasal a kingawm 12,000 pha uh hi.
27 Topa ii Joshua a sawl bangin Israel te in khuapi sung pan a mat vanhte le ngannote amate ii neisa tu in keam uh hi.
28 Joshua in Ai sia haltum a, a zaancip in nusia hi. Tuni in tuabang ma in om lai hi.
29 Ama in Ai kumpipa sia thingkung khat tungah awklumsak a, nitak sang dong a luang tualai ah nusia hi. Nitum ciangin Joshua in a luang a laak natu thupia a, khuapi tumna kongpi ah kivawksuk hi. Amate in a luang sia suangtum honpui khat taw del a, tu ni dongin tua munah om lai hi.
Ebal Mual ah Thukham Sim
30 Tuaciang Joshua in Ebal Mual ah Topa Israel te ii Pathian atu biaknatau khat vawt hi. Ref 8:30-32 Thkna 27:2-8,8:31, Pu 20:25
31 Topa naseampa Moses ii Israel te a hilna bangin Moses ii Thukham sungah: “Thik vanhzakte taw a kitan ngawl suang taw a kivawt biaknatau” sia vawt hi. Tua tungah amate in Topa atu meihal biakpiaknate le pawlkhop biakpiaknate pia uh hi.
32 Tua munah Israel te mu tangin Joshua in Moses at sa Thukham sia taw a kibang linlian khat suangte tungah at hi.
33 Israel mite in a lampuite, a uliante, a thukhente le amate sung a om ngamdangmite teng taw Topa Thuciamna Thingkuang lang le lang ah tuasia a pua Levi thiampite maingat in ding uh hi. A mite sung pan a lang in Gerizim Mual nungngat in, a lang in Ebal Mual nungngat in ding uh hi. Amate thupha saan hun a tun ciangin tu a bangin ngamta vun ci in Topa ii naseampa Moses in thupia zo hi. Ref 8:33-35 Thkna 11:29; 27:11-14
34 Tua zawkciang Joshua in Thukham laibu sungah a ki at bangin, thuphate le haamsiatna te kihel in Thukham buppi a ngingin sim hi.
35 Moses ii thupiakte theampo, numei, patang, ngamdangmi, amate sung a teangte zongh a kihel, a kikhawm buppi tungah Joshua in sim siat hi.