23
Joshua ii Kikhenna Kam vaithak
1 Khuangei mama zawkciang Topa in Israel te sia a kiim a paam ngal launa panin ngammuanna pia hi. Tua hun in Joshua sia huai mama zo hi,
2 tua ahikom Israel theampo, upate, lampuite, thukhente, mipite sung pan a uliante sam a, ama in, “Tu in kei sia huai mama zo khi hi.
3 Noma hu in hi minam teng tungah Topa na Pathian ii a sep a vawt theampo na mu zo uh hi. Topa na Pathian sia no atu in ngal do hi.
4 Ngamsung minam a taanglai te ii leitang sia noma namte atu kong pia zo a, nisuana Jordan ngun pan nitumna Mediterranean Tuipi dong ka zawthal sa minam teng ii ngam zongh kong khensak zo hi.
5 Topa na Pathian in no kung pan amate nungkinsak tu a, tuaciang mai sang na manaw uh ciang amate hawlkeak tu hi. Topa na Pathian ii hong kamciamsa bangin amate ngam sia na tang tu uh hi.
6 Tua ahikom Moses Thukham laibu sung a ki at theampo na zui natu na kikhuangkho tavun. Tuasung thute khat zongh na ngaingon heak vun,
7 tuasia ciang note kawm ah a taanglai mite taw na kipawl buatu uh hi, amate ii pathian minte thuson in na nei buatu uh hi, ahibuale tuate ii min lo in thuciamte na vawt buatu uh a, tua pathiante bia in na kun suk buatu uh hi.
8 Tua taangin tu dong ciang na thumaan sa uh bangma Topa tungah thumaan tu nu hi.
9 Topa in a thahat minam liante sia na mai sang na manaw uh ciang hong nawkeaksak zo a, kuama no hong nalh zo om ngeingawl hi.
10 No sung pan pasal khat pawpo in pasal tulkhat taikeaksak zo tu nu hi, banghang ziam cile Topa na Pathian sia, hong kamciamsa bangma in, no atu ngal hong simsak hi.Ref 23:10 Thkna 32:30; Thkna 3:22
11 Tua ahikom, Topa na Pathian na it tu uh kingaisun vun.
12 Na thumaan bua uh a, no sungah a taanglai minamte taw kipawlkhawm in na kiteang uh le,
13 Topa na Pathian in hi minamte sia maisang na manaw uh ciang hong nawkeaksak nawn ngawl het tu ahi sia na he thei hi. Amate sia no atu in thaang bang, vuum bangin hong lauhuai zaw tu a, thibin pan kivel bang, mittang sung ling do bangin hong na zaw tu hi. Topa na Pathian ii hong piaksa hi leitang hoi tungah note kuama na om nawn ngawl uh dong hisia kipee tan tu hi.
14 “Tu in ka thi tu hun theng zo hi. Topa na Pathian in na pha theampo hong kamciamsa bangin hong pia zo ci sia na thinmuu na lungmuu le na thaa sungah a kuama po in na he uh hi. A kamciam khat simin kikeamcing a; khat zongh vaalthongsak ngawl hi.
15 Ahihang, no tung a kamciam hong kipia theampo a kepcing bangma in, hong tawnnate theampo zongh tungsak tu hi.
16 Topa na Pathian ii na kepcing tu in hong thupiak thuciam sia keam ngawlin pathian dangte na seamin na bia uh le ama in a thin uuk tutna in note daan hong pia tu a, ama hong piaksa hi ngam hoi ngam phana ah hai ngawlin kuama na om nawn buatu uh hi.