21
Levi te ii Khuapite
1 Levi innkuan lampuite sia thiampi Eleazar, Nun ii tapa Joshua le Israel nam theampo te ii innkuan lutangte kungah pai uh hi.
2 Tualai Canaan ngam Shiloh ah hi bangin kison hi, “ Topa ii Moses tungtawnin a thupiakna pan, ko sia khuapite hong kipia tu a, ngan tat natu tua khuate ii kiim le paam lozaute zongh hong kipia tu ci hi.” Ref 21:2 Mi 35:1-8
3 Tua ahikom Topa ii thupiakna taw kizui in Israel te in Levi te sia amate ngamsung pan khuapi pawlkhat le ngan tat natu leitang pia uh hi.
4 Kohath bee le phung pan Levi innkuante sia a masabel in khuapite kipia hi. Thiampi Aaron suan le paal innkuante sia Judah ngam, Simeon ngam, le Benjamin ngamsung panin khuapi sawm le thum kipia hi.
5 Kohath beete sung a om lai teng sia Ephraim, Dan le Nitumna Manasseh ngam teng sung pan khuapi sawm kipia hi.
6 Gershon bee le phung sia Issachar, Asher, Naphtali, Nisuana Manasseh ngam teng sung pan khuapi sawm le thum kipia hi.
7 Merari phung sung pan innkuante sia, Reuben, Gad, le Zebulun ngam teng sung pan khuapi sawm le nii kipia hi.
8 Topa ii Moses tung thu a piak bangin Levi te sia khuapite le ngan tha natu lozaute Israel mite in laimee sawkin pia uh hi.
9-10 Levi suan, Kohath ii bee le phung pan Aaron suan le paal te atu in Judah ngam le Simeon ngamsung pan a kipia khuapite min teng hi teng ahi hi. Amate a kipiakna sia a masabel ahi hi.
11 Amate tungah Arba khuapi Arba sia Anak ii pa hi, tu in Hebron kici, Judah mualtung ngam a om khuapi le a kiim nganthana leitang taw kop in kipia hi.
12 Ahihang khuapi ii lote le a kiim a khuate sia Jephunneh tapa Caleb a kipiasa ahi hi.
13 Hebron bukna khuapite sung pan khat taw kikop in a nuai a khuapi teng sia thiampi Aaron suante kipia hi: Libnah,
14 Jattir, Eshtemoa,
15 Holon, Debir,
16 Ain, Juttah le Beth Shemesh a ngan tatna leitangte taw: Judah le Simeon namte pan khuapi kua ahi hi.
17 Benjamin ngam panin amate sia khuapi li: Gibeon, Geba,
18 Anathoth le Almon, nganthana mun teng taw kipia hi.
19 A vekpi in khuapi sawm le thum, a ngan tat natu leitangte taw Aaron ii suan thiampi te kipia hi.
20 Kohath ii phung sung Levi innkuan dangte atu Ephraim ngamsung pan khuapi pawlkhat kipia hi.
21 Amate tungah khuapi li: Shechem le a nganthana Ephraim bukna khuapi khat hi, mualtung ngam Gezer,
22 Kibzaim le Beth Horon, a nganthana leitangte kipia hi.
23 Dan ngamsung pan amate tungah khuapi li: Eltekeh, Gibbethon,
24 Aijalon le Gathrimmon, a nganthana leitangte taw kipia hi.
25 Nitumna Manasseh ngam pan amate tungah khuapi nii: Taanach le Gathrimmon, nganthana leitangte taw kipia khawm hi.
26 Hi Kohath bee le phung innkuante in a kingawmin khuapi sawm le a nganthana teng nga hi.
27 Levi mi pawl dangkhat Gershon ii bee le phungte in Nisuana Manasseh ngam pan khuapi nii: Bashan ah Golan bukna khuapi khat le Beeshterah, a nganthana leitangte taw nga khawm uh hi.
28 Issachar ngam panin amate in khuapi li: Kishion, Daberath,
29 Jarmuth le Engannim, a nganthana leitangte taw kopin nga khawm uh hi.
30 Asher ngam panin amate in khuapi li: Mishal, Abdon,
31 Helkath le Rehob, a nganthana leitangte taw nga khawm uh hi.
32 Naphtali ngam pan amate in khuapi thum: Galilee ah Kedesh, a nganthana leitangte taw bukna khuapi khat, Hammoth Dor, le Karta'n, a nganthana leitang taw nga khawm uh hi.
33 Gershon bee le phung pan innkuante in a vekpi a kingawm khuapi sawm le thum le a nganthana leitang teng taw nga khawm uh hi.
34 Merari bee le phung pan Levi mi a taanglaite in Zebulun ngam panin khuapi li: Jokneam, Kartah,
35 Dimnah le Nahalal, a nganthana leitang taw nga khawm uh hi.
36 Reuben ngam panin amate in khuapi li: Bezer, Jahaz,
37 Kedemoth le Mephaath, a nganthana leitang taw nga khawm uh hi.
38 Gad nam tung pan amate in khuapi li: Gilead pan Ramoth, a nganthana leitang taw bukna khuapi khat Mahanaim,
39 Heshbon le Jazer, a nganthana leitang taw kopin nga khawm uh hi.
40 Tua ahikom Merari bee le phung a kipia khuapi sia sawm le nii ahi hi.
41-42 Israel te neisa ngam le lei panin a kingawm khuapi sawmli le liat le a kiim nganthana leitang teng sia Levi te kipia hi.
Israel te in Ngam a Neisa tu in La
43 Tua ahikom, Topa in Israel te sia a taanghpupite tungah a ciliap huai kamciam a piaksa ngam le lei theampo pia hi. Amate in tuasia a nga zawk uh ciang, tua munah teang uh hi.
44 Topa in a taanghpupite tungah kamciam a piaksa bangma in, ngamsung bup ah kilemna pia hi. A ngalte theampo sung pan khat zongh in amate nalh zo ngawl hi, banghang ziam cile Topa in a ngalte theampo zaw zawkna Israel te pia hi.
45 Topa in Israel mite tungah kamciam a piak theampo kholet hi.