16
Ephraim le Nitumna sang Manassehte atu A kipia Ngam
1 Joseph suan le paalte a kipia ngam le lei ii thangsang ngamngi sia Jericho hui Jordan panin kipan a, Jericho cikte ii nisuana sangah pai in sennealngam sung sun hi. Jericho pan Bethel dong mualtung ngam ah paito hi.
2 Bethel pan a ngamngi sia Luz ah pai a, Ataroth Addar, Archit te teenna kaantan hi.
3 Tua zawkciang nitumna Japhlet te ii ngam ah pai a, Beth Horon Nuainung ngam dong pai hi. Tua mun panin Gezer ah paisuakin tuaciang Mediterranean Tuipi ah tawp hi.
4 Joseph ii suan le paalte Ephraim nam le nitumna Manasseh namte in hi ngam sia amate ii neisa in saang uh hi.
Ephraim
5 Ephraim innkuante ii ngam sia hisia ahi hi: a ngamngi paizia sia, Ataroth Addar pan nisuana sangah Beth Horon Tungnung ah,
6 tua mun panin Mediterranean Tuipi dong ahi hi. Michmethath sia a saksang ah om hi. Tua ii nisuana sangah ngamngi sia Taanath Shiloh sangah koai a, tuasia kaantan in nisuana sang Janoah dong paitan hi.
7 Tua zawkciang paisuk a Janoah pan Ataroth le Naarah ah, Jericho pha in Jordan ah tawp hi.
8 Ngamngi sia Tappuah pan nitumna sang Kanah lui ah pai in Mediterranean Tuipi ah tawp hi. Hi leitang sia Ephraim nam innkuante tan tu in kipia a,
9 Manasseh ngamngite ii sungsang a om khuate le khuano pawlkhat taw kopin Ephraim te kipia khawm hi.
10 Ahihang amate in Canaan mi Gezer a teangte sia notkeak ngawl ahikom Canaan mite sia Ephraim mite sungah tu ni dong teang khawm uh hi, ahihang amate sia salte bangin na kiseamsak hi. Ref 16:10 Thkte 1:29