13
A Kila lai tu Ngamte
1 Joshua sia tu in huai mama zo hi. Topa in ama munah, “Nang huai mama zo ni hi, ahihang ngam le lei tam mama laak tu om lai hi:
2 Philistia le Geshur te ngam theampo,
3 thang sangah Avvim te ngam theampo zongh ahi hi. Shihor lui pan Egypt te ngamngi dong, saksang pan Ekron te ngamngi dong leitang teng sia Canaan te ngam in kingaisun hi; Philistine kumpite sia Gaza, Ashdod, Ashkelon, Gath, le Ekron ah teang hi.
4 Canaan te ngam theampo le Mearah Sidon te neisa hi om lai a, Amor te ngamngi a om Aphek dong hi a;
5 Gebal te ii ngam; nisuana ah Lebanon bup, Hermon Mual ii thangsang Baalgad pan Hamaath Mualciangh dong ahi hi.
6 Hisia Lebanon Mualte le Misrephoth Maim kilaklaw mualtung ngam a teang Sidon te ngam theampo kihel hi. Israel mite a mai sang a nawk kawmin hi mite theampo ka notkhia tu hi. Kong sawl sa bangma in ngam le lei te sia Israel mite sungah na hawmsak tu uh hi. Ref 13:6 Mi 33:54
7 Tua ahiciang tu in, Israel nam kua le Manasseh ii nam a lang teng ii tan tu in hawmsak in” ci hi.
Jordan Nisuana sang Ngamte A Hawmna
8 Reuben le Gad nam te le Manasseh ii nam a lang teng in Topa naseampa Moses ii piaksa ngam le lei tek nga zo a; tuasia Jordan ngun ii nisuana sangah om hi. Ref 13:8 Mi 32:33; Thkna 3:12
9 Amate ii ngam sia Aroer Arnon Kuam ii kiil ah a om le tua kuam ii laizang a om khuapi dong zai a, Medeba pan Dibon dong mual zaangtam theampo kihel hi.
10 Tuasia Ammon te ngamngi dong hi a, Heshbon pan a uk Amor te kumpipa Sihon ii khuapi theampo zongh kihel siat hi.
11 Gilead, Geshur le Maacah ngamte, Hermon Mual bup le, Bashan bup Salecah dong kihel hi.
12 Ashtaroth le Edrei panin a uk Rephaim kumpi nam a khakbel ahi Og ii kumpi ngam kihel hi. Moses in hi mite sia zo in notkeak hi.
13 Ahihang Israel te in Geshur le Maacah mite not ngawl uh a; amate Israel ngam ah teang lai uh hi.
14 Moses in Levi nam sia ngam le lei a pia bua hi. Topa ii Moses tungah a sonsa bangma in Israel ii Topa Pathian biakpiakna tau tungah a hal sangaw biakpiaknate sung pan tel khat sia amate in tang tu hi. Ref 13:14 Thkna 18:1
Reuben Suante atu A kipia Ngam
15 Moses in ngam khen khat sia Reuben ii nam innkuante tan tu in pia hi.
16 Amate ngam sia Aroer Arnon Kuam kiil a om le tua kuam laizang a om khuapi dong hi a Medeba mual zaangtam kiim teng kihel hi.
17 Tuasia sungah Heshbon le mual zaangtam tung a om khuapite: Dibon, Bamoth Baal, Beth Baalmeon,
18 Zahaz, Kedemoth, Mephaath,
19 Kiriathaim, Sibmah, tua kuam sung mual tung a om Zereth Shahar,
20 Bethpeor, Pisgah Mual pangh suk teng le Beth Jeshimoth kihel hi.
21 Heshbon pan a uk Amor te kumpipa Sihon kumpi ngam bup le mual zaangtam a om khuapite kihel hi. Moses in ama zo a, Midian a ukte: Evi, Rekem, Zur, Hur le Reba te zongh zo hi. Amate theampo in Kumpipa Sihon atu in ngam uk uh hi.
22 Israel te ii thalupte sungah Beor tapa Balaam, aisaan thei pa kihel hi.
23 Jordan sia Reuben nam ii nitumna ngamngi ahi hi. Hi khuapite le khuate sia Reuben nam innkuante tan tu in kipia hi.
Gad Nam atu A kipia Ngam
24 Moses in zongh ngam khen khat sia Gad nam innkuante tan tu in a piaksa hi.
25 Amate ii ngam sia, Jazer le Gilead khuapi theampo, Ammon ngam a lang, Rabbah ii nisuana sang Aroer dong ahi hi;
26 amate ngam sia Heshbon panin Ramath Mizpeh le Betonim dong, Mahanaim pan Lodebar ngamngi dongin kithung hi.
27 Jordan Kuam sungah Beth Haram, Bethnimrah, Sukkoth, le Zaphon, Heshbon kumpipa Sihon ii kumpi ngam a om lai teng ahi hi. Amate ii nitumna sang ngamngi sia Jordan ngun hi a, saksang ah Galilee Tuili dong hi to hi.
28 Hite sia Gad nam innkuante tan tu a kipia khuapite le khuate ahi hi.
Nisuana Manasseh atu A kipia Ngam
29 Moses in Manasseh nam a lang ii innkuante tan tu in ngamkhen khat a piaksa hi.
30 Amate ngam sia Mahanaim dong kithung a, Bashan theampo huam hi — Bashan kumpipa Og ii kumpi ngam bup le Bashan sungah Jair khuano 60 teng ahi hi.
31 Bashan kumpipa Og ii kumpi ngamsung khuapi thupibel te Astaroth le Edrei, le Gilead ngam khenlang zongh tua ii sungah kihel hi. Hite theampo sia Manasseh tapa Machir ii suan innkuan te ii lang atu a kipia ahi hi.
32 Tuasia Jericho le Jordan nisuana sang ngam le lei teng Moses ii Moab zaangtam ah a om lai in a khensakna bang ahi hi.
33 Ahihang Moses in Levi nam sia leitang a pia bua hi. Israel ii Topa Pathian tungah a piak biakpiaknate sung pan tel khat amate ii neisa ahi sia ama sonsa hi. Ref 13:33 Mi 18:20; Thkna 18:2