50
Babylon A Kilaakna
1 Babylon khuapi le a mite taw kisai in Topa in hi bangin a thupuak sia ka tungah hong son hi:
2 “Minamte tungah hi thu son in!
Hi thu thangsak in!
Limlakna pia in a, a thu taangko in! Thuku in koi heak in!
Babylon taak zo hi!
A pathian Marduk kisemtham zo hi!
Babylon ii milimte kimaizumsak zo hi;
a kiihuai a milimte kisutham hi! Ref 50:1—51:64 Is 13:1—14:23; 47:1-15
3 “Saksang panin minam khat Babylon sim tu in hong theng zo a tua sia sennealngam suaksak tu hi. Mihing le nganhingte taikeak tu uh a, tua munah kuama teang ngawl tu hi,” hong ci hi.
Israel ii Heakkikna
4 Topa in, “Tua hun hong thet ciang, Israel le Judah mite kap kawmin hong paikhawm tu uh a, amate ii Pathian, keima hong zong tu uh hi.
5 Amate in Zion lampi dongh tu uh a, tua zawkciang tua sang ah pai tu uh hi. Amate in keima taw a tawntung kiciamna khat vawt tu uh a, bangma hunin palsat ngeingawl tu uh hi.
6 “Ka mite sia tuucingte ii mualtung tengah a bosua tuute taw kibang hi. Amate sia tuute bangin mual khat pan mual khat ah vakthap kawkoai uh a, a inn omna mun mangil zo uh hi.
7 Amate sia a mute theampo in sim uh hi. A ngalte in, ‘Amate sia Topa tungah maw uh hi, tua ahikom hi bang a amate tungah ih vawt sia kikhial ngawl hi. A taanghpupite in Topa muang hi, tua ahiciang amate mama sia Topa tungah a thumaan top tu uh ahi hi,’ ci uh hi.
8 “Israel mite awng, Babylon panin taikeak vun! Hi ngam nusia vun! A nusia phitbel hi vun! Ref 50:8 Tpl 18:4
9 Sak sangah a om ngam thahat pawlkhat ka thawn tu a Babylon ka simsak tu hi. Amate in tua ngam sim tu in a thuangin kingual tu a, zo tu uh hi. Amate sia thal taw muiliim savai thiamte ahi uh hi.
10 Babylon khuapi kiphuul tu a, a phuulte in a dei theampo la tu uh hi. Keima, Topa in ka son zo hi,” ci hi.
Babylon Bona
11 Topa in, “Babylon mite awng, ka minam na suttol uh hi. Note lungdam in na kipaak uh a, khuipui an cicil ahibuale a hahaam siphu khat bangin vak kawkoai nu hi,
12 ahihang na khuapi lian uh sia a vaang kibosak tu a, kimaizumsak tu hi. Babylon sia ngam theampo sung panin a thupi ngawlbel ngam suak tu a, a kongaw le tui om ngawl sennealngam suak tu hi.
13 Ka thin uukna hu in Babylon ah kuama teang ngawl tu hi; a siacip in kinusia tu a, tua mun kaantan in a paite theampo in ingh in lamdang sa tu uh hi.
14 “Thal toaite awng, Babylon sim tu in kingual vun a kiim uum vun. Na thaltang theampo uh taw Babylon kap vun, banghang ziam cile ama in keima Topa tungah hong maw zo hi.
15 Khuapi kiimkot ah ngal thotna aw taw au vun! Tu in Babylon in ngallel zo hi. A khuapi luphungte sulet zo a cimhtham zo hi. Keima in Babylon te tungah phu ka la hi. Tua ahikom amate tungah phulam vun a, midangte tungah a vawt uh bangin amate tungah vawt vun.
16 Tua ngam sungah thaicii kituu heak hen a, an kila heak hen. Tua munah a teang ngamdangmite theampo in Babylon a sim ngalkaphonpi sia kiita tu a, a inn a lo ah cia kik tu uh hi,” ci hi.
Israel ii Heak kikna
17 Topa in, “Israel mite sia tawpite in delmang a, a kithethaang tuute taw kibang uh hi. A masabel in amate sia Assyria kumpipa in sim a, tua zawkciang Babylon kumpipa Nebuchadnezzar in a ngu khimtham hi.
18 Tua ahikom, Keima, Vaanglianbelpa Topa, Israel ii Pathian in, Assyria kumpilianpa daan ka piak bangma in Nebuchadnezzar kumpipa le a ngam daan ka pia tu hi.
19 Israel mite a ngam ah ka teangsak kik tu hi. Amate in Carmel mual tung le Bashan ngam sungah a ciin ante ne tu uh a, Ephraim le Gilead ngamte sungah a piang ante theampo a du bangin in ne tu uh hi.
20 Tua hun a thet ciang, Israel ngam ah mawna khialna kimu ngawl tu a, Judah ngam ah seksolna om ngawl tu hi, banghang ziam cile a nuntakna ka kheet lai mihingte ii mawna ka maisak tu hi. Keima, Topa in ka son zo hi,” ci hi.
Babylon tungah Pathian ii Thukhenna
21 Topa in, “Merathaim mite le Pekod mite sim vun. That vun a susia vun. Kong thupiak theampo seam vun. Keima, Topa in ka ci zo hi.
22 Hi ngam ah ngal kisimna aw kiza a, suksiatna nasia takin om hi.
23 Babylon in leitung buppi sek taw seaktham a, tu in tua sek sia taltan zo hi! Tua ngam ah a piang thute minam theampo in lamdang sa in ingh uh hi.
24 Babylon awng, kei nong do hi, na heak ngawl hang bek hi a, thaang kong siana sungah na awk zo hi.
25 Ka ngalhiamte koina mun ka hong zo hi, ka thin uuk in tua ngalhiamte ka pusua keak zo hi, banghang ziam cile Keima, Vaanglianpipa Topa, Vaanglianbelpa in Babylon ah nasep tu ka nei hang ahi hi.
26 Mun theampo pan sim vun a, a antang kholna munte hong keak vun! Na suttol vanhte antang sen bangin seng to vun! A ngam susia vun! Bang mama khe heak vun!
27 A ngalkapte theampo that vun! Amate mon vun! Babylon mite a lal a hi uh hi! Amate daan piak tu hun hong theng zo hi!” ci hi.
28 Ngaltaite Babylon pan suakta in Jerusalem theng uh a, Babylon te ii a Biakinnpi tungah a vawt nate hu in Topa ih Pathian in bangbangin phula ci sia amate in son uh hi.
29 “Babylon sim tu in thalkaap thiamte son vun. Thal le thaltang a zangh thiamte theampo kuansak vun. A khuapi kiim uum vun a khat zongh suaktasak heak vun. A sep a vawt theampo thuk kik vun, midangte tungah a vawt bangin a tungah vawt vun, banghang ziam cile a kiphatsakna taw diang in Israel ii a Thiangtho Pa, hong langpan hi. Ref 50:29 Tpl 18:6
30 Tua ahikom a tangvalte sia khuapi sung lampi tungah kithatlum tu a, a ngalkapte theampo sia tua ni in kilalcipsak tu hi. Keima, Topa in ka ci zo hi.
31 “Babylon awng, nang sia kiphatsakna taw kidim ni hi. Tua hu in Vaanglianpipa Topa Vaanglianbelpa, Keima in nang kong langpan hi! Nang daan kong piak tu hun hong theng zo hi.
32 A kiphasak na ngam sia lutu in puk tu a, kuama in nang hong phongto ngawl tu hi. Na khuapite ka hal tu a, a kiim ah a om theampo kaanghtum tu hi,” ci hi.
33 Vaanglianbelpa Topa in, “Israel mite le Judah mite in zawthawk vawtna thuak uh hi. Amate a mante theampo in amate hi cinten in cingin pusuaksak ngawl tu hi.
34 Ahihang amate a suatak tu pa sia thahat a — ama min sia Vaanglianbelpa Topa ahi hi. Ama mama in amate vai teng vaansak tu a, leitung ah kilemna thengsak tu hi, ahihang Babylon mite tungah ngimna thengsak tu hi,” ci hi.
35 Topa in,
“Babylon ah thina theng hen!
A mihingte, a ukte le a mipilte tungah thina theng hen.
36 Leilot kamsaangte tungah thina theng tahen —
bang ka mawmawt uh ci ziam!
A ngalkapte tungah thina theng tahen —
bangza in lauhuai ziam!
37 A siphute le a siphu ngalleangte susia vun!
A cial ngalkapte tungah thina theng tahen —
bangza in zawm ziam!
A sum a paaite susia vun, suttol in laksak vun.
38 A ngam ah nguatui hangsak vun a, a ngunte kangsak vun.
Babylon sia a kiitakhuai milim biakna ngam hi a,
tua milimte in mihing mawmawte suaksak uh hi.
39 “Tua ahikom Babylon sia doaite, tha ngilote le vacim thiangtho ngawlte teenna ngam suak tu hi. Tua munah bangma hun in mihing teang kik ngei nawn ngawl tu hi. Ref 50:39 Tpl 18:2
40 Sodom khua, Gomorrah khua le a nai a khuate ka suksiat bangin Babylon ka susia tu hi. Tua munah kuama teang kik ngeingawl tu hi. Keima, Topa in ka ci zo hi. Ref 50:40 Pian 19:24-25
41 “Sak sang ngam panin a khuala ah a om
a thahat minam khat hong pai hi;
kumpi tam mamate ngal do tu in kithoai uh hi.
42 Amate in a thal le namsaute toai uh hi;
Amate sia ngilo a ngual hesuakna nei ngawl uh hi.
A siphute tung a to uh ciang,
tuipi hawk bangin nging hi.
Babylon sim tu in amate kithoai uh hi.
43 Babylon kumpipa in tua thu za a, a khutte zaw vanek hi.
Ama in numei nautun a nat bangin
thinngimna le tak ngimna thuak hi.
44 “Jordan ngundung taam thuk sung pan pusuak in, lopa hingna munah a pai to tawpi khat bangin Keima, Topa kong pai tu a, Babylon te a khuapi uh pan thakhatthu in ka taikeaksak tu hi. Tuasia zawkciang lampui ka tealpa in ngam uk tu hi. Kei taw kitee ngat thei tu akua om ziam? Akua in kei hong thato ngam tu ziam? Hong langpan ngam tu kumpi akua bang om ziam?
45 Tua ahikom Babylon khuapi suksiat natu ka tupna le a mite tungah ka vawt tu zia ka sawmna teng hong ngai tavun. A patangte ngawngawn kikaikeak tu a, mihing theampo patausak tu hi.
46 Babylon a bo ciang, awnging nasia tu ahikom leitung buppi liing tu hi. Patau in a auna awte minam dangte in za tu uh hi,” ci hi.