40
Gedaliah taw Jeremiah Omkhawm
1 Ngalkap mangpa Nebuzaradan in Ramah khua ah kei hong suatak zawkciang, Topa in kei hong paupui hi. Keima sia kol bul sa in, Babylon ah luangta tu in a kipaipui Jerusalem le Judah pan midangte theampo taw tua mun ah hong kipaipui khawm zo hi.
2 Ngalkap mangpa in keima hong sam tuam a, “Na Topa Pathian in hi ngam sia suksiat tu in tawng a,
3 ama in ka vawt tu hi a ci sia tu in vawt zo hi. Na mite in Topa tungah mawna vawtin a thu ni ngawl a hi hu in hite theampo piang hi.
4 Tu in na khut ah a kibul kolte kong suutsak tu a kong thaa tu hi. Keima taw Babylon ah na pai nuam le na pai thei a, nang kong keam tu hi. Ahihang na pai nuam buale pai kul ngawl hi. Hi ngam buppi sungah na uukna mun teal in, na uukna po ah pai thei ni hi,” hong ci hi.
5 Bangma zo kik ngawl a ka om ciang, Nebuzaradan in, “Babylon kumpipa ii Judah ngam khuate uk tu in a koi ngamkhen ukpa Shaphan ii tupa, Ahikam ii tapa Gedaliah ii kungah pai kik ta'n. Ama taw om ta'n a, a mite sungah teang thei ni hi, tua ahibuale na pai nopna mun po ah pai thei ni hi,” hong ci hi. Tua zawkciang ama in letsong khat le nguai an hong henin ka pai nopna ah hong paisak hi.
6 Mizpah ah Gedaliah taw om tu in ka pai a, ngam sungah a taanglai mite sungah ka teang hi.
Judah Ngam Ngamkhen ukpa Gedaliah
(2 Kumpite 25:22-24)
7 Judah ngalkapmang pawlkhatte le ngalkapte sia a ngalte khut sungah tum ngawl uh hi. Babylon kumpipa in Gedaliah sia ngamkhen ukpa tu in koi zo a, Babylon ah a kipaipui ngawl theampo — ngamsung pan a zawngbel mite teng uk tu in a kikoina thu amate in za uh hi. Ref 40:7-9 2 Kum 25:22-24
8 Tuasia ciang Nathaniah ii tapa Ishmael, Kareah ii tapa Johanan, Tanhumeth ii tapa Seraiah, Netophah pan Ephai ii tapate le Maacah pan Jezaniah sia a mite taw Mizpah khua ah a om Gedaliah kungah pai uh hi.
9 Gedaliah in amate tungah, “Babylon te nuai ah na tum tu uh sia lau kul ngawl hi kong ci hi. Hi ngam sungah teangin Babylon kumpipa ii na seam le uhte no atu in pha siat tu hi.
10 Keima mama Mizpah ah ka teang tu a, Babylon te hi munah hong pai ciangin noma taangmi ka hi tu hi. Ahihang sapittui, thingnga le olive sathaute khawmin khol vun a, na laak uh khuate ah teang vun,” ci hi.
11 Tuasia hunin Moab ngam, Ammon ngam, Edom ngam le ngamdangte ah a om Israel te theampo in Babylon kumpipa ii Israel te pawlkhat Judah ngam sungah a teen suaksakna thu le Gedaliah sia a ngam khen ukpa in a koina thu za uh hi.
12 Tua ahi manin, amate sia a kithethaang na ngamte nusia in Judah ngam ah cia kik uh hi. Amate Mizpah khua Gedaliah kungah pai in, tua munah sapittui le thingnga tam mama khawmtua uh hi.
Gedaliah KiSuamlum
(2 Kumpite 25:25-26)
13 Hisia zawkciang a tum nuam ngawl Johanan le ngalkapte ii lampuite sia Mizpah khua Gedaliah kungah pai in,
14 ama tungah, “Ammon kumpipa Baalis in nangma hong suam tu in Ishmael hong paisak sia he ngawl ni ziam?” ci hi. Ahihang Gedaliah in tua thu um ngawl hi.
15 Tua zawkciang Johanan in ama tungah, “Keima hong paisak ta'n a Ishmael hong thatsak ta'n, tua hile a that sia pa kuama in he ngawl tu hi. Banghangin ama in nang hong suam thei thong tu ziam? Nang hong kisuam le tua in na kiim ah hong kikhawm Jew mite theampo kithethaangsak tu a, Judah ngam ah a taanglai mite theampo ii tungah tuasiatna thengsak tu hi,” ci ku hi.
16 Ahihang Gedaliah in, “Tua sia hi heak in! Ishmael thu na son sia maan ngawl hi!” ci in zo hi.