36
Baruch in Biakinnpi sungah Laizial Sim
1 Josiah ii tapa Jehoiakim ii Judah ngam kumpi a sua zawk a kum lina kumin, Topa in keima tungah, Ref 36:1 2 Kum 24:1; 2 Khang 36:5-7; Dan 1:1-2
2 “Laizial khat la in a tua tungah Israel le Judah le minamte theampo ii thu kong sonte at in. Josiah kumpi a sep lai in, na tungah kong son masak phit pan kipan tuni dong kong sonte theampo at in.
3 Judah mite in amate susia tu a ka sawmna thute theampo a zaak uh ciang, a tatsiatnate panin kikheal tha tu uh hi. Tuasia ciang a seksolna le a maw a khialnate ka maisak tu hi,” hong ci hi.
4 Tua ahiciang Neriah ii tapa Baruch samin Topa ii ka tungah hong son te theampo at tu in ka khaw hi. Tuaciang Baruch in laizial sungah at siat hi.
5 Tuaciang keima in Baruch tungah a nuai ah kihilnate ka pia hi: “Keima in Biakinnpi sungah pai thei natu thu ka nga nawn bua hi.
6 Ahihang mipite ii antan kik hun ciangin tua munah nangma pai lete kong oai hi. Topa ii hong sonte le keima ii nang tungah kong khawte theampo amate ii a zaak thei natu in tua laizial sia nging takin nong sim tu hi. Mihing theampo, a khua tek pan hong pai Judah mite zongh ii hong zaak thei natu munah sim in.
7 Topa in a lauhuai thin uukna le a thinsona taw hi mihingte tawng zo ahikom amate in Topa tungah thu ngenin, a tatsiatnate panin kikheal thei tha tu uh hi.”
8 Tuaciang Baruch in ka sawl bang tatak ma in Biakinnpi sungah Topa ii kammalte sim hi.
9 Jehoiakim ii Judah kumpi a sep zawk a kum ngana, a tha kua tha in mihingte in Topa maipha nga nuam in antang uh hi. Jerusalem khua ah a teang theampo le Judah khuate pan hong pai theampo antang uh hi.
10 Tua zawkciang mihingte theampo ii a ngai laitakin, laizial sungah a kikhum ka thusonte theampo Baruch in sim hi. Biakinnpi sung, Shaphan ii tapa, zum thuzeakpa Gemariah ii inndoi panin Baruch in sim hi. Ama inndoi sia Biakinnpi tumna Kongpi Thak kung a zum tung dawl ah om hi.
Uliante tungah Laizial Kisim
11 Baruch ii laizial sung pan Topa kammal a sim sia Gemariah tapa Shaphan ii tupa Micaiah in za hi.
12 Tuaciang Micaiah sia kumpi inn sung thuzeakpipa ii zum inndoi ah ulian theampo kikhop laitakin pai hi. Zum thu zeakpipa Elishama, Shemaiah ii tapa Delaiah, Achbor ii tapa Elnathan, Shaphan ii tapa Gemariah, Hananiah ii tapa Zedekiah le a dang uliante theampo tua munah om uh hi.
13 Baruch ii mipite tungah a sim thu teng Micaiah in a zaak theampo amate tungah son hi.
14 Tuaciang uliante in Jehudi Nethaniah tapa, Shelemiah ii tupa le Cushi ii tu selawn sia Baruch kungah paisak a, mipite tungah a sim laizial sia hong paipui natu in sonsak hi. Baruch in tua laizial sia amate kungah paipui hi.
15 “To in a tua laizial sia ko hong sim ta'n” amate in ci uh hi. A ci bangin Baruch in sim hi.
16 Baruch in tualai a sim zawkciang amate patau a khat le khat ki en in Baruch tung ah, “Kumpipa munah hi thu ka son uh kul tu hi,” ci uh hi.
17 Tua zawkciang amate in, “Tu in hong son ta'n, hite theampo bangbangin at thei ni ziam? Jeremiah in hong khaw ziam?” ci in Baruch dongh uh hi.
18 Baruch in, “Jeremiah in kammal theampo hong khaw a, keima in hi laizial tungah laitui taw ka at hi,” ci in zo hi.
19 Tua zawkciang amate in Baruch tungah, “Nang le Jeremiah sia na buk uh kul tu hi. Na omna uh kuama in hesak heak vun,” ci uh hi.
Kumpipa in Laizial Hal
20 Uliante in tua laizial sia zum thuzeakpa, Elishama ii inndoi sungah koi in, kumpipa zum ah pai in tua munah a thu a vekpi in kumpipa tungah ko uh hi.
21 Tuasia ciang tua laizial la tu in kumpipa in Jehudi sawl hi. Ama in Elishama ii a inndoi panin tua laizial la a, kumpipa le a kiim ah a ding uliante theampo a sim hi.
22 Tua hun sia phalbi hun lai hi a, kumpipa sia a phalbi kumpi inn sungah mei oai in to hi.
23 Jehudi in lai khawk thum khawk li bang a sim zawk po ciang, kumpipa in naamno khat taw tua laizial attan in meikhuk sungah lawn hi. Laizial buppi a kaktum dongin ama in meikhuk sungah hal hi.
24 Ahihang kumpipa ahizong hi thute theampo a za siat a uliante ahizong launa heena lim lak ngawl uh hi.
25 Elnathan, Delaiah le Gemariah in laizial a hal ngawl natu in hesuak ngen hi napi, kumpipa in amate bangma awlmawk ngawl hi.
26 Tua zawkciang kumpipa in keima le ka thuzeakpa Baruch man tu in kumpipa tapa Jerahmeel sia Azriel ii tapa Seraiah le Abdeel ii tapa Shelemiah taw zongh thupia khawm hi. Ahihang Topa in ko hong phual hi.
Jeremiah in Laizial Dang At
27 Baruch tungah ka khaw bangin a ki at laizial sia Jehoiakim kumpipa in a haltum zawkciang Topa in, keima
28 laizial dang khat la in, a masa laizial sungah a omte theampo tuasia sungah at tu in hong sawl hi.
29 Topa in kumpipa tungah hi bangin ci ta'n ci in kei hong sawl hi, “Laizial na haltum zo hi, tuaciang Jeremiah tungah, Babylon kumpipa hong pai tu a, hi ngam susia in a mite le a ngannote thatlum tu hi ci in banghangin at ni ziam ci in dongh zo ni hi.
30 Tua ahikom Topa Keima in tu in nang Jehoiakim kumpipa tungah David ii kumpi ngam sia na suan na paalte kuama in uk ngeingawl tu hi kong ci hi. Na luang sia sunin nisa, zanin daaitui thuak tu in kivawk tu hi.
31 Na vekpi na vawt uh mawna khialnate hu in nangma, na suan na paalte le na uliante daan kong pia tu hi. Nang na hi zong, Jerusalem le Judah mite ahizong, kidop natu kong son te nong nadon bua uh hi. Tua ahikom kong tawnkhol sa tuasiatna sia na vekpi tungah kong tungsak tu hi.”
32 Tuaciang laizial dang khat la in ka thuzeakpa Baruch tungah ka pia a, ka khaw theampo ama in at hi. Laizial masa sia sungah a om sate theampo le ama tungah ka khaw a kibang thute zongh ama in khum siat hi.