34
Zedekiah atu Thupuak
1 Babylon kumpipa Nebuchadnezzar, ama ngalkaphonpi le amate a hu a khutnuai ah a om minamte theampo ii ngalkapte in Jerusalem le a naina khuate a sim uh lai in Topa in keima hong paupui hi. Ref 34:1 2 Kum 25:1-11; 2 Khang 36:17-21
2 Topa Israel ii Pathian in Judah kumpipa Zedekiah kungah pai in hi bangin son ta'n, “Keima, Topa in hi khuapi sia Babylon kumpipa khut sungah ka aap tu a, ama in haltham tu hi.
3 Na suakta buatu hi; hong kiman tu a, ama tungah hong ki aap tu hi. Nangma in ama na mu tu a, maitang kisi in na paupui tu hi, tua zawkciang Babylon ah na pai tu hi.
4 Zedekiah awng, nangma taw kisai thu kong son sia ngai in. Nang sia ngal sungah hong kithatlum ngawl tu hi.
5 Thin nuam takin na thi tu hi, tuaciang nangma mai ah kumpite ahi, na taanghpupite a kiphum uh ciang mihingte ii ngimnamtui a hal bangma amate in nang atu in ngimnamtui hal tu uh hi. Amate in, ‘Ih kumpipa thi thong ei!’ ci in nang hong kaa tu uh hi. Keima, Topa in ka son zo hi” ci in hong sawl hi.
6 Tuaciang hi thu sia Jerusalem khua sung Zedekiah kumpipa kungah ka puak hi,
7 tua hun sia Babylon kumpipa ii ngalkaphonpi in tua khuapi a sim laitak ahi hi. Tua ngalkaphonpi in Judah ngam sungah a taanglai kulh taw a ki uum khuapi dang ahi Lachish le Azekiah zongh sim uh hi.
Silate A Kitheam vawtna
8-9 Kuama in Israel a mipuite sila in a nei ngawl natu in Zedekiah kumpipa le Jerusalem mite in pa ahizong numei ahizong Hebrew a mipui silate a suatak natu in thukimna khat vawt uh hi.
10 Mipite le a lampui theampo in a silate a suatak tu uh le sila a, a kai kik nawn ngawl natu thukim uh hi. Amate in a silate suaktasak uh hi,
11 ahihang nungsang ciang amate in a thin kheal kik a, sila suak tu ma in kai kik uh hi.
12 Tua zawkciang Topa
13 Israel ii Pathian in mipite tungah thuson tu in keima hong sawl na pan in: “Keima in na taanghpupite uh a sila kaaina Egypt ngam pan ka suatak lai in amate taw thuciamna khat ka vawt hi.
14 Keima in Hebrew sila khat pawpo sia kum luk sung na na uh hong sepsak zawkciang kum sali a cin simin na suaktasak tu uh hi ci in amate tungah ka son hi. Ahihang na taanghpupite in ka thu hong nadon bua uh a ka sawl bang hong mang bua uh hi. Ref 34:14 Pu 21:2; Thkna 15:12
15 Tu nung hiat ma in na thin na kheal uh a, ka diksakte nong seam uh hi. Na vekpi ma in Israel na mipuite sia suataksak tu na thukim uh a, keima hong kibiakna Biakinnpi sung ka mai ah thuciamna khat na vawt uh hi.
16 Ahihang na thin uh na kheal leleau uh a, ka min nong daisak uh hi. Amate ii uukna bang a na suataksak sa uh silate sia note theampo in na la kik uh a, sila in na kai kik uh hi.
17 Tua ahikom keima, Topa in ka thu nong ni bua uh hi kong ci hi: na Israel mipuite suatakna na pia bua uh hi. Tua ahile pha mama hi, suatakna kong pia tu hi: tua suatakna sia ngal, natna le kialpi taw thina ahi hi. No tungah kong vawtna taw leitung mite theampo ka lausak tu hi.
18-19 Judah te le Jerusalem uliante in kumpi inn sungah uliante, thiampite le lampuite theampo taw kikopin amate ii tum nii a sua khuital khat ii a phel niite kilaklaw ah lampaina taw in keima taw thuciamna khat a vawt uh hi. Ahihang amate in tua thuciamna palsat in thuciamna sung thu omte mang ngawl uh hi. Tua ahikom amate ii khuital tung a vawt bangin hi mite tungah ka vawt tu hi.
20 Amate sia amate a thatlum nuam a ngalte ii khut sungah ka aap tu a, a luangte sia vacimte le ngamsate in ne tu uh hi.
21 Judah ngam Zedekiah kumpipa le a uliante zongh amate a thatlum nuamte ii khut sungah ka aap tu hi. Amate sia noma hong simna pan a tawlnga Babylon ngalkaphonpi khut sungah ka aap tu hi.
22 Keima in thu ka pia tu a, hi khuapi ah amate hong heak kik tu uh hi. Amate in tua khuapi simin la tu a, mei taw haltham tu uh hi. Keima in Judah ngam khuate sia kuama ii teen ngawlna sennealngam khat bang ka suaksak tu hi. Keima, Topa in ka son zo hi,” hong ci hi.