15
Judah Mite Lalna
1 Tuaciang Topa in kei tungah, “Moses le Samuel ngawngawn hi munah dingin ka tungah hesuak hong ngen hial zongh in, hi mihingte tungah hesuakna ka nei tuan buatu hi. Amate paisak vun; ka muna ah omsak heak vun. Ref 15:1 Pu 32:11-14; Mi 14:13-19; 1 Sa 7:5-9
2 Koi sungah pai tu khu ziam ci in amate in nang hong dongh uh le, hi bang ka ci teng son in:
Pawlkhat sia natna taw thi tu in kisee a —
tua mun sia amate pai natu mun ahi hi!
A dangte sia ngal sungah thi tu in kisee a —
tua mun sia amate pai natu mun ahi hi!
Pawlkhat sia pukthi in thi tu in kisee a —
tua mun sia amate pai natu mun ahi hi!
A dangte sia thongtaakte bangin a kipaipui tu in kisee a —
tua mun sia amate pai natu mun ahi hi! Ref 15:2 Tpl 13:10
3 Keima, Topa in, a lauhuai thu nam li amate tungah tung tu in ka khensat zo hi: Ngal sungah amate kithatlum tu hi; a luangte ui in kaikeak a; vacimte in ne tu hi, tuaciang a om laiteng ngamsate in ne tu hi.
4 Hezekiah ii tapa Manasseh in Judah ngam ah kumpi a sep laitakin Jerusalem khua ah a vawt thute huu in tuate taw leitung mite theampo ka liinglawngsak tu hi,” hong ci hi. Ref 15:4 2 Kum 21:1-16; 2 Khang 33:1-9
5 Topa in,
“Jerusalem mite awng, akua in no hong hesuak tu ziam,
akua in no hong khuangai pui tu ziam?
Na om zia uh hong dongh tu in
akua in hong ngak man tu ziam?
6 No, mihingte in kei nong nial zo uh a; nong nungngat zo uh hi,
ka thin uukna ka iip na in toi zo ka hikom
ka khut zalh in kong susia hi.
7 Ngamsung khua sim ah taangphaw bangin vui sungah note kong lawn hi.
Ka mite awng, note kong susia hi,
Na ngitlo ngamtatnate uh
na kheal ngawl uh hu in na tate uh ka thatlum hi.
8 Tuipi hui ah sennealte sangin
note ngam sungah meingong tamzaw hi.
Na tangvalte uh a khan saan laitakin ka that a,
a nute in ka thuaksak hi.
Thakhat thu in amate tungah
thin natna le launa ka thengsak hi.
9 A tate sali ii a thi sanh a nu sia
butthi in a husamh hi,
ama ii sun khuavak sia khuazing suak a,
ama sia maimawl in a thinna sa hi.
No sung pan a nungta laiteng
na ngalte in kong thatlumsak tu hi.
Keima, Topa in ka son zo hi,” ci hi.
Jeremiah in Topa Mawsiat
10 A lungdam ngawl pa sia keima ka hi hi! Banghangin ka nu in leitung ah kei hong hing ziam? Ngam sungah mihing theampo taw kihau in thu kinial tu ka hi thong hi. Sum ka pukthaak bua a sum ka pu bua hi; tua hi napi ngual theampo in kei hong haamsiat veve hi.
11 Topa awng, nangma ii na pha takin ka seam bua le, ka ngalte ngim nga a natna satna a thuak laitakin amate taangin nangma tungah hesuakna ka ngetsak buale amate ii hong haamsiatnate theampo taangtung tahen.
12 Kuama in thik, a tuan in saksang pan hong pai taau taw kihel thik sia thiaktan zo ngawl hi.
13 Topa in keima tungah, “Ngamsung theampo ah mawna khialna a vawt hu in amate daan pia tu in ka mite ii nei le lamh sum le vanh manphate a laaksak tu ngalte ka puak tu hi.
14 A thu a la a heak ngeingawlna ngam ah a ngalte ii na ka seamsak tu hi, banghang ziam cile ka thin uukna sia mei taw kibangin a tawntungin kuang tu hi,” hong ci hi.
15 Tuasia ciang keima in, “ Topa awng, tel ni hi. Hong phawkin hong hu ta'n. Kei hong vawtsiate tungah phu hong lasak ta'n. Amate ii kei hong thalup nop sia a taangtut natu in, amate tungah na thin sausak lei heak in. Nangma hangin kei hong kiselno ahi sia phawk in.
16 Nangma in nong paupui a na kammal theampo kong ngai hi. Topa, Vaanglianbelpa, Pathian awng, keima in nangma aa ka hi a, tua ahikom na kammalte in ka thin hong nuamsak a hong lungdamsak hi.
17 Keima in midangte taw nui khawmin ngualnop hun ka zangh bua hi. Nong thupiak ka nitna in keima nguakin ka om a, thin uukna taw ka kidim hi.
18 Banghang ngim thuathuak lai khi ziam? Banghangin ka liammate kibawl thei ngawl ziam? Banghangin dam ngawl tu ziam? Khuakhaal sung luitui kang bangin thin kiamsak tu hong sawm ni ziam?” ka ci hi.
19 Hi thu taw kisai in Topa in, “Nong heak kik ahile kong la kik tu a, ka naseampa na suak kik tu hi. Thu mannung ngawl po na son sangin thu manpha thu taknei na son le, ka kamsaang na suak kik tu hi. Mipite sia nang kung hong zuan kik tu a, amate kungah nang na pai kul ngawlzaw tu hi.
20 Hi mite taw na kizopna ah taau ciitak taw a kivawt khua uumna dal taw kong kibang sak tu hi. Amate in nang hong sim uh hangin hong zo buatu hi. Nang hong dal tu le hong keamcing tu in nang taw kong omkhawm tu hi.
21 Mi seksolte le mi ngoltolte ii khut sung panin nang kong suatak tu hi. Keima, Topa in kong son hi,” ci in hong zo kik hi.