JOHN
Teptee bang Lungdamna Thu
A tawntung a om Pathian Kammal le, Jesus sia thu khat a hina teng thupatna in a nei zawkciang, Lungdamna Thu ii a masa sangah nalamdang lakna tuatuamte taw Jesus sia hong kikamciamsa Hunpa, Pathian Tapa hi ci in pualaak hi. Tua nalamdang laknate in bang pualaak ziam ci in sontelnate taw zomto hi. Mihing pawlkhat in Jesus um in a nungzui suak a, a dangte in nial a, um ngawl hi, ci thu hi thubu khen in son hi. A a khan lian 13-17 na sia Jesus a kimat tu ni zanin a nungzuite taw nai takin a kitholna le a kingingsa in a om thei natu thapiakna kammalte thinglamtee tungah a kithalup tu ma a nitakin amate tungah a sonte tepteena ahi hi. A khaksang a sonna sungah Jesus kimatna, a thusitna, thinglamtee tung a kithalupna le a thaw kikna, a thaw kik zawkciang a nungzuite tungah a kilangh na thute ki at hi.
Palngul mawna vawt, a kiman numei sia ii thu teng (8:1-11) laimal doituamna sungah kikoi hi; banghang ziam cile lai a ki at ciilte le a kipheen ciilte tam mama sungah kihel ngawl hi. Tuaciang a dangte in, mundang ah koi uh hi.
John in Christ tungtawnin a kinga tawntung nuntakna letsong sia thupi son a, tua letsong sia tu pan kipan kinga a, Jesus sia lampi, thumaan thutak le nuntakna hi ci in a saangte tungah kipia hi ci hi. John thubu ii a lamdanna sia ni sim a, a kizangh a kimu nate ahi tui, anluum, khuavak, tuucingpa, le a tuute, sapitkung le a nga ci bangte taw sontee in thaa lam a thuthukte lak hi.
1
Nuntakna Kammal
1 A kipatciilin, Kammal na omkhol zo hi; tua Kammal in Pathian taw om a, tua Kammal in Pathian ahi hi.
2 A kipatciil lai mama panin Kammal in Pathian taw a omsa ahi hi.
3 Ama tungtawnin Pathian in na theampo piangsak hi; a kibitphua theampo ama ngawl taw a kipiangsak na khat beak a om bua hi.
4 Tua Kammal in nuntakna ii naak ahi hi. Tuaciang hi nuntakna in mihing a minpiang atu in khuavak hong puak hi.
5 Khuavak in khuazing sungah taang a, khuazing in sumit zo ngeingawl hi.
6 Pathian in John a kici ama kamtaipa hong paisak a, Ref 1:6 Mt 3:1; Mk 1:4; Lk 3:1-2
7 mihing theampo in za a, a up natu in, tua khuavak thu mihingte tungah a son tu in hong pai ahi hi.
8 Ama tatak ahile khuavak hi ngawl hi; khuavak ii thu son tu in hong pai ahi hi.
9 Hi khuavak in khuavak tatak hi a — leitung ah hong pai in mihing sim tungah a taang hi.
10 Kammal in leitung ah om a, Pathian in leitung sia ama tungtawnin piangsak hi napi, leitung in ama a he bua hi.
11 Ama in ama ii ngamsung ma a hong pai ahihang a mite in ama a saang bua uh hi.
12 Ahizong pawlkhat in ama saangin um uh hi; tua ahikom ama in tuate tungah Pathian ii tate sua thei natu thupia hi.
13 Amate leitung pianziate taw Pathian ii tate a suak hi ngawl hi, cinopna in, pa khat ii hin tate bangin a piang ahi bua hi; Pathian mama sia amate ii Pa ahi hi.
14 Kammal in mihing hong suak a, thuthiamna le thumaan thutak taw kidimin, ei sungah hong teang hi. Eite in ama ii vaangletna, Pa ii Tapa khat bek a hina taw a saan vaangletna ih mu zo hi.
15 John in ama huvau son hi. Ama in, “Hisia pa sia a thu ka sawson pa hi a, ‘Kei nung pan hong pai hi, ahihang kei sangin lianzaw hi, banghang ziam cile kei ii pian ma in ama om zo hi,’ ka ci sia ahi hi,” ci in au hi.
16 A kidimin a om, ama ii thuthiamna sung panin, ei theampo thupha hong pia zo a, thupha khat zawkciang khat hong piak ahi hi.
17 Pathian in Moses tungtawnin Thukham pia hi. Ahihang thuthiamna le thumaan thutak sia Jesus Christ tungtawnin hong pai hi.
18 Kuama in Pathian mu ngeingawl hi. Pa kungah a om, Pathian ma ahi, Tapa khat bek in Pathian hong hesak hi.
Tuiphumpa John ii Thupuak
(Mt 3:1-12; Mk 1:1-8; Lk 3:1-18)
19 Jerusalem khua a om Jew thuneite in John kungah thiampite le Levi te pawlkhat paisak a, “Nang akua ni ziam?” ci in donghsak uh hi.
20 John in a zo thada bua a, phualseal ngawlin hi bangin thiangson hi. “Kei Messiah hi ngawl khi hi,” ci hi.
21 “Tua ahile akua ni ziam? Elijah ni ziam?” ci in dongh uh hi.
“Hi ngawl khi hi,” ci in John in zo hi.
“Kamsaangpa ni ziam?” ci in dongh uh hi.
“Hi ngawl khi hi,” ci in ama in zo kik hi.Ref 1:21 Thkna 18:15,16; Mal 4:5
22 “Tua ahile a kua ni ziam hong son ta'n” ci uh hi. “Ko hong sawlte munah thu ka puak kik uh kul hi. Nangma le nangma bang kici ni ziam?” ci uh hi.
23 Isaiah kamsaangpa ii sonna teng doppha in, John in hi bangin zo hi:
“Kei sia ‘Sennealngam sungah
a au khat ii aw ka hi hi:
Topa ii khualhaw natu
lampi tangsak vun!’ ” Ref 1:23 Is 40:3
24 Phariseete ii kamtaite in,
25 John munah, “Nang Messiah le hi ngawl, Elijah le hi ngawl, Kamsaangpa le hi ngawl na hile, banghangin tuiphum ni ziam,” ci in dongh uh hi.
26 “Kei in tui taw tui kong phum hi, ahihang no sungah na heak ngawl uh khat om hi.
27 Ama sia kei nung panin hong pai ahihang ama peangdap suut tu zong ka kilawm bua hi,” ci in John in zo hi.
28 Hi thu theampo sia John ii tui a phumna Jordan Ngun ii nisuana sangah a om Bethany khua ah piang hi.
Pathian Tuuno
29 A zing ciangin John in ama kungah Jesus hong pai a mu ciangin, “Leitung buppi mawna a lakhia Pathian Tuuno, zialai ah om hi!
30 ‘Mihing khat kei nung panin hong pai tu a, ama in kei pian ma in omkhol zo ahikom, kei sangin ama lianzaw hi,’ ci in ka sawson sia pa ahi hi.
31 Ama sia akua hi tu ziam, ci in ka he bua hi, ahihang Israel mite ii ama a heak natu in, tui taw tuiphum tu in keima hong pai ka hi hi,” ci hi.
32 Tuaciang in John in hi bangin tetti pang hi: “Thaa sia vantung panin ngam vakhu bangin hong tuaksuk a, ama tungah hong tu ka mu hi.
33 Ama sia tua pa ahi hunlam telcian tatak ngawlin ka om lai hi, ahihang tui taw tuiphum a hong sawl Pathian in, ‘Thaa sia hong paisuk in mihing khat ii tungah, hong tuaksuk na mu tu hi; ama sia Thaa Thiangtho taw hong baptize tu pa hi,’ ci in hong son zo hi.
34 Tuasia mu zo khi hi, tuaciangin ama sia Pathian Tapa hi ci in hong son khi hi,” John in ci hi.
Jesus ii Nungzui Phitbel teng
35 A zing ciangin John sia tua munah ama ii nungzuite nii taw a dinkhop kik laitakin,
36 Jesus hong pai mu hi. “Zia sia in Pathian Tuuno hi!” ci hi.
37 Nungzuite nii in tu a bangin a son za uh a, tuaciangin Jesus taw ton uh hi.
38 Jesus kiheak a, amate in a nung a zui a mu ciang, “Bang zong nu ziam?” ci in dongh hi.
Amate in, “Koisung a teang ni ziam, Rabbi awng,” (“Syapa” a cinopna) ci in dongh uh hi.
39 “Hong pai in hong en tavun,” ci in zo hi. Tua hun sia nitak nai li bang hi Tua ahikom amate in ama taw paikhawm a, a teenna a mu uh hi, ama taw tua ni hun om lai teng a zangh khawm uh hi.
40 Tuate sung pan khat in Simon Peter ii suapui Andrew ahi hi.
41 Thakhatin a suapuipa Simon mu in hi thu ko hi. “Ko Messiah mu zo khu hi,” Hi kammal sia Christ a cinopna hi ci in ko hi.
42 Tua zawkciang ama in Jesus kungah Simon paipui hi.
Jesus in ama en in, “Na min sia Simon hi a, John ii tapa ni hi, ahihang nang sia Cephas hong kina tu hi,” ci hi. (Cephas ii khiakna sia Peter ma hi a, “suangpi khat” a cinopna hi.)
Jesus in Philip le Nathanael Sam
43 A zing ciangin Jesus in, Galilee ngam ah pai tu in, khensat hi. Ama in Philip mu a, “Hong zui ta'n,” ci hi.
44 Philip sia Andrew le Peter te ii teenna Bethsaida khua pan ahi hi.
45 Philip in Nathanael a mu ciang, “Moses ii thukham laibu sungah a thu a at pa le, kamsaangte zongh ii a thu a at pa mu zo khu hi. Ama sia Nazareth pan Joseph tapa Jesus hi,” ci in ama munah son hi.
46 “Nazareth panin na pha khat pawpo piang thei thong tu ziam,” ci in Nathanael in dongh hi.
“Hong pai in hong en ta'n,” ci in Philip in zo hi.
47 Jesus in ama kungah Nathanael hong pai a mu ciangin, ama thu hi bangin son hi. “Hi sungah, Israel mi tatak khat om hi; ama in paubanna nei ngawl hi!” ci hi.
48 Nathanael in, “Bangbangin hong he ni ziam,” ci in dongh hi.
“Philip ii hong sam ma theikung nuai ah na om lai in, kong mu zo hi,” ci in Jesus in zo hi.
49 Nathanael in, “Syapa awng, nang sia Pathian Tapa na hi hi! Israel Kumpipa na hi hi!” ci hi.
50 Jesus in, “Theikung nuai ah na om lai in, kong mu zo hi kong ci hu bek in, um na hi bua ziam? Hisia sangin a lian zaw lai na tam mama na mu tu hi!” ci hi.
51 Tuaciang in amate tungah, “Thumaan hong son khi hi: vantung kihong na mu tu a, Mihing Tapa tungah Pathian ii vantunglalangte a tuaksuk a kaato kithalee in a om na mu tu hi,” ci hi.Ref 1:51 Pian 28:12