20
Israel te Ngalsim tu Kithoai
1 Israel mite theampo saksang ah Dan pan thang sangah Beersheba dong le, nisuana sang ah Gilead ngamte dongin tua ngalkona sia za in saang uh hi. Amate in Topa ii mai Mizpah ah pumkhat in hong kikhawm uh hi.
2 Israel nam lampui theampo hi Pathian mite kikhopna ah om in, lei ngalkap sia 400,000 pha uh hi.
3 Tua laitak ma in Benjamin mite in a dang Israel te a vekpi in Mizpah ah kingawmtua hi ci in za uh hi.
Israel te in, “Hi khialna lian sia koibang piang ci sia hong son tavun,” ci in dongh uh hi.
4 A zino a kisuamlum Levi pa in zo a, “Ka zino le kei sia Benjamin te ngam Gibeah ah zantaam tu in ka pai uh hi.
5 Gibeah pasalte sia kei hong sim tu in zanin hong pai a inn hong kiim uum uh hi. Amate in kei hong thatlum nuam hi; ahihang kei taangin ka zino sia buanin thi hi.
6 Ama luang la in ka sem zawkciang Israel nam khat sim see khat tek ka thaak hi. Hi mite in ei sungah tatsiatna le paktat ngamtatna vawt hi.
7 Hi sungah a om no teng theampo sia Israel mite vive hi nu hi. Hi thu huvau bangbangin ngamta tu hi ziam?” ci uh hi.
8 Mihing theampo hong ding khawm tek in, “Ei a kuama po puanbuk ah ih teang zong, inn sung ih teang zong, cia ngawl tu hi hing.
9 Ih sep tu sia hisia hi: laimee ih sawk tu a, Gibeah a sim tu pasal pawlkhat ih teal tu hi.
10 Israel mi teng sung pan sawm ciang khat veu in ngalkaphonpi atu an sik tu a, a dang teng sia kuan in, hi paktat tatsiatna Israel ah hong vawt hu in Gibeah te daan ih pia tu hi.
11 Tua ahikom Israel mite theampo Gibeah khua sim natu vaihawm tu in kikhawm uh hi.
12 Israel namte in Benjamin nam ii ngamsung tangciing kamtai paisak in, “Hi khialna lian na vawt uh sia bang hi thong ziam?
13 Gibeah ah a ngottatte, tu in hong aap tavun, tua hile amate thatlum thei in, hi tatsiatna sia Israel panin ka heam thei tu uh hi,”cisak hi. Ahihang Benjamin mite in Israel dangte a awlmawk bua uh hi.
14 Amate Benjamin ngamsung khuapite theampo panin Israel dang teng a do tu in Gibeah zuan uh hi.
15-16 Amate in tua ni in a khuapite uh pan ngalkap 26,000 sam uh hi. Hiteng tungsia ah Gibeah ngammite in a kitealtuam. a veilawng 700 khawmtua uh hi. Amate khat simin saili taw suangtang khat a kaap uh ciang samzam zongh a khial ngei bua uh hi.
17 Israel nam a taanglai teng sung pan ngalkap thiam sa 400,000 khawmtua uh hi.
Benjaminte taw Kidona
18 Israel mite Bethel biakna munah pai in Pathian tungah amate in, “Bang nam in Benjamin te sim masa tu ziam?” ci in dongh uh hi.
Topa in zo a, “Judah nam” ci hi.
19 Tua ahikom Israel te a zing kik ciang hong kipan uh a, Gibeah khuapi hui ah ngiaphual saat uh hi.
20 Amate Benjamin ngalkaphonpi sim tu in hong pai uh a, tuaciang a ngalkapte in khuapi maingatsak uh hi.
21 Benjamin ngalkaphonpi khuapi sung pan hong pusuak uh a, nitum ma in Israel ngalkapte 22,000 thatlum uh hi.
22-23 Tua zawkciangin Israel te biakna munah hong pai uh a, nitak dong Topa mai ah tau uh hi. Amate in ama tung ah, “Koma suapui Benjamin te taw kido tu in ka kuan kik tu uh ziam?” ci in dongh uh hi.
Topa in zo a, “Kuan vun!” ci hi.
Tua ahikom Israel ngalkaphonpi sia tha nga a, a zeini in a om bangma in a ngalkapte sia a dinmun ngei ah koi kik uh hi.
24 Amate Benjamin ngalkaphonpi sim tu in a nii veina hong kuan uh hi.
25 Tuaciang Benjamin te zongh a nii veina Gibeah pan hong pusuak uh hi, hisia hun ciang Israel ngalkap thiam sa 18,000 thatlum uh hi.
26 Tuasia ciang Israel mite theampo Bethel ah pai in tau uh hi. Amate Topa ii ompuina tua munah to in, nitak dong an a ne bua uh hi. Amate in pawlkhop sangaw biakpiakna le meihal sangaw biakpiakna pawlkhat a bupin hal uh hi — tua theampo Topa mai ah vawt uh hi.
27-28 Pathian ii Thuciamna Thingkuang sia tua hun lai in Bethel ah kikoi hi, tuaciang Eleazer tapa, Aaron ii tupa Phinehas in tuasia keam hi. Mihingte in Topa tungah, “Ka suapui Benjamin te ka sim kik tu uh ziam maw, ka tawp heu tu uh ziam?” ci in dongh uh hi.
Topa in, “Sim vun, zing ciangin noma in amate hong zosak tu khi hi,” ci in zo hi.
29 Tua hikom Israel te in ngalkap pawlkhat Gibeah kiim ah buusak hi.
30 Tuaciang ni kizom a ni thum ni in amate in Benjamin ngalkaphonpi sangah kuan a, tuaciang nidang bangma in a sim tu kinging sa ngalkapte sia Gibeah maingat in dinmun lasak hi.
31 Benjamin te ngal do tu in hong pusuak uh a, khuapi panin kipaipui suak hi. A masa bangma amate in Bethel paina lampi le Gibeah paina lampi tung a taanzauna mun tengah Israel te pawlkhat thatlum tu hong kipan uh hi. Amate in Israel te 30 khawng that uh hi.
32 Benjamin te in, “Tu masia ih zaw bangin zozo hing,” ci uh hi.
Ahihang, amate khuapi pan pusuaksak a, lampi tungah a zolna in Israel te a nungkin kik tu in ngeal uh hi.
33 Tua bangin Israel te ii ngalkaphonpi a tamzawte hong nungkin a, Baaltamar ah hong kingawmtua kik ciangin, Gibeah khua a uumci mi teng sia amate bukna khuapi kiim suang tamna ngamsung pan pusuak in thakhat thu hong del uh hi.
34 A kitealtuam Israel mi tulsawm teng in Gibeah a sim uh ciang, a kidona nasia mama hi. Benjamin te in amate sia kisucip tu ci in a he bua uh hi.
35 Topa in Benjamin te tungah zawna Israel te pia hi. Israel te in a ngalte 25,100 tua ni in thatlum uh a,
36 tuaciang Benjamin te in ngallel ahi hunlam hong phawk uh hi.
Israel te Ngalzawna
Israel ngalkaphonpi sung pan a sim pi tu teng Benjamin te kung pan a nungkin sia banghang ziam cile amate in Gibeah kiim ah a buksak mite a suan hang ahi hi.
37 Hi mite Gibeah sangah manlang tak tai a; amate khuapi sungah kiphalin tuasung ah a om theampo thatlum uh hi.
38 Israel ngalkaphonpi sia le a buk sak mite in lim taw kilak natu khat vaihawm uh hi. Amate in meikhu lom lian khat khua sung pan a zaamto a mu uh ciang,
39 ngalphual a om Israel te sia kilee kik tu hi. Tusia hunin Benjamin te in Israel te 30 thatlum zo hi. Amate khat le khat hi bang kici uh hi, “Hi hi, tu masia ih zaw bangma ih zo zo hi,” ci uh hi.
40 Tuasia ciang lim sia hong kilangh hi; meikhu lom khat khua sung pan hong zaamto hi. Benjamin te in nungsang a et uh ciang a khuapi bup mei kaangh sia mu in lamdang sa uh hi.
41 Tuasia ciang Israel te hong heak kik a, Benjamin te sia patau in peak keak uh hi, banghang ziam cile amate sia kisucip nai tu ci in phawk uh hi.
42 Amate Israel te kung pan nungkin a, ngam taanzauna sangah tai uh hi, ahihang suakta zo ngawl uh hi. Amate sia Israel ngalkaphonpite le khuapi sung pan hong pusuak mite kilaklaw ah tangciak a, amate sia kisucip hi.
43 Israel te in ngalte sia thaang sung a awk bangin vawt hi, tuaciang tawlnga ngawlin Gibeah ii nisuana sang mun khat dong del in, a del kawmin that uh hi.
44 Benjamin ngalkapte sung pan a phabel tulsawm le tulliat that uh hi.
45 A dangte sia kiheak a, Rimmon Suangpi a kicina mun awngna ngam ah tai uh hi. Lamdung ah amate tulnga that hi. Israel te in Gidom dong a taanglai teng del tan in 2,000 that uh hi.
46 A vekpi kingawmin Benjamin te 25,000 tua ni in that a — a vekpi ngalhang ngalkap vive ahi hi.
47 Ahizong, mihing 600 in Rimmon Suangpi a kicina mun awngna ngam ah suakta uh a, tuaciang tua munah amate tha li taam uh hi.
48 Israel te heak kikin Benjamin te a taanglai teng — pasal, numei, patang te le nganno te zongh a kibangin thatlum siat uh hi. Tua ngamsung khua theampo haltham siat uh hi.