14
Samson le Timnah pan Ngaknu khat
1 Ni khat ni in Samson sia Timnah khua a pai le tua munah Philistine ngaknu khat mu in hoaikhol hi.
2 Ama a inn ah cia kikin a pa le a nu tungah, “Timnah khua ah ka thin hong la Philistine ngaknu khat om hi. Hong puisak tavun; ama teenpui nuam khi hi.” ci hi.
3 Ahihang a pa le a nu in “Zi khat nga natu in tua Pathian he ngawl Philistine te kungah pai kul na ziam? Eima mi sung teng, ih bee ih phung sungah ngaknu khat mu zo ngawl ni ziam?”ci in dong hi.
Ahihang Samson in a pa munah, “Kei atu nong puisak tu ka dei sia ama bekma hi. Ama diksa khi hi,” ci hi.
4 Samson ii hi bang a hina sia Pathian lamlakna ahi hunlam a pa le a nu in he ngawl hi, banghang ziam cile Topa in Philistine te a sim natu hunpha khat a zonna ahi hi. Hi hun sia Philistine te ii Israel a uk hun sung ahi hi.
5 Tua ahikom Samson sia a pa le a nu taw Timnah ah pai suk hi. Amate sapithuan sung kaantan in a pai laitak tawpi moi khat a hawk za hi.
6 Thakhat thu in Topa vaangletna in Samson hatsak a, tuaciang a khutnguak taw tawpi sia kealmoi khat bangin baltham hi. Ahihang a ngamtatna teng a pa le a nu a hil bua hi.
7 Tuaciang ama pai in tua ngaknu paupui a, diksa hi.
8 Ni tawmvei zawkciang ama teenpui tu in Samson pai kik hi. A cia lamin tawpi a thalup sia en tu in lampialin a pai le tua tawpi ii luanghawm sungah khuai honkhat le khuaitui mu a lamdang sa hi.
9 Ama in khuaitui sia a khut taw la in a lampai kawmin ne hi. Tuaciang a pa le a nu kungah pai in pawlkhat pia hi. Amate in ne ahihang Samson in tua khuaitui sia tawpi thisa pum sung pan a laak hunlam a son bua hi.
10 A pa sia ngaknu nu ii inn ah pai a, tuaciang Samson in anneakpoai khat tua munah vawt hi. Tuasia in tangvalte ngeina khat ahi hi.
11 Philistine te in ama a mu uh ciangin ama a ompui tu tangval 30 puak uh hi.
12-13 Samson in amate munah, “Thukheldokna khat hong dong tong. Mopoai ni sali a bo ma in, a khiakna na son thei uh le khat sim, puanneal hoi khat tek le puansilh laihna khat tek kong khaam ngam hi, nong son thei bua uh le puanneal hoi khat tek hong pia tu nu hi” a ci ciang,
“Na thukheldokna sia hong son ta'n, ko za nuam ung,” ci uh hi.
14 Ama in,
“A ne sia ii sung pan
neak tu khat hong piang;
A hat sia ii sung pan
a thum khat hong piang,” ci hi.
Ni thum zawkciang zong amate in khel dokna a tel zo bua lai uh hi.
15 A ni li ni ciangin amate in Samson zi munah, “Na pasal ii thukheldok ii a khiakna hong son natu in theambawl in. Tuabang na hi buale na pa inn mei taw ka hal tu uh a, nangma taw cipin kong hal tu uh hi. No nii in ko teng nong sutol nopna in hong sam na hi bua uh ziam?” ci hi.
16 Tua ahikom Samson zi zongh thitui taw a kungah pai in, “Kei hong it ngawl ni hi! Hong ensan hi bek ni hi! Ka ngualtamhte thukhel khat dongh a ciang, kei munah a khiakna hong son ngawl ni hi!” ci hi.
Ama in, “En in! Ka pa le ka nu zongh son ngawl khi hi. Banghangin nang hong son tu khi ziam?” ci hi.
17 Mopoai sung ni sali tawntung a zi kap hi. Ahihang a ni sali ni ciang a nakheng cimh manin ama in thukheldokna ii khiakna son hi, Tuasia ciang a zi in Philistine te tungah son hi.
18 Tua ahiciang a ni sali ni in Samson ii lupna a zot ma in, khuapi sung mite in ama munah,
“Khuaitui sangin a thum zaw
bang om thei ziam?
Tawpi sangin a hatzaw
bang om thei ziam?” ci uh hi.
Samson in,
“Ka khuipui taw lo tho khawm ngawl hi le uhte
tu in a khiakna, na he buatu uh hi.” ci in zo kik hi.
19 Thakhat thu in Topa vaangletna in Samson hatsak a, tuaciang ama Ashkelon ah paisuk hi, tua munah pasal 30 thatlum in, a puansilh uh suusak a, thukheldokna a zo thei teng tua puan hoite pia hi. Tuasia zawkciang thupiang teng hu in a thinso ahikom, ama inn ah cia kik a,
20 tuaciang a zi sia a kiteen lai in ama a dinpuipa kipia hi.