33
1 Job awng, tu in ka son tu theampo pha takin hong ngai ta'n.
2 Ka thin sungah a om teng son tu in kinging khi hi.
3 Ka kammalte theampo ka ci takpi ma hi a, thumaan thutak ka son hi.
4 Pathian ii thaa in kei hong vawt a, nuntakna hong pia hi.
5 Nong zo thei le hong zo ta'n. Nong nial natu kinging khol in.
6 Nang le kei sia Pathian ii muna ah ih kibang a,
ih nii in tungman pan hong kivawt hi.
7 Tua ahikom kei nong kiitak natu bangma thu om ngawl hi;
Nang hong neethaw ngawl tu khi hi.
8 Tu in hi teng sia na pau vangiat ka zaak ahi hi:
9 “Kei maw ngawl khi hi; a maan ngawl vawt ngawl khi hi.
Kei sia mawbanna nei ngawlin mawna khialna pan peng khi hi.
10 Ahihang Pathian in
kei hong sim nop hu in paulap tu thu mu a,
ngalte khat bangin
hong vawt hi.
11 Ama in ka peang thikkol bulh a,
ka tukna ka dianna theampo hong encik hi,” ci ni hi. Ref 33:11 Job 13:27
12 Job awng, ahihang hong son khi hi, nangma khial ni hi.
Mihing khat pawpo sangin Pathian lianzaw hi.
13 Banghangin eite ii lungkim ngawlnate
hong zo ngeingawl hi ci in Pathian mawsiat ni ziam?
14 Pathian in thuson kik a, son kikik ahihang
ama paunate kuama in nangai ngawl hi.
15 Zan lai mihingte mut lanin
Pathian in mang le mukholsakna te taw hong paupui hi. Ref 33:15 Job 4:13
16 Pathian in ama ii paunate
amate in ngaisak hi,
tuaciang kidop natu
a son kholnate in amate lausak hi.
17 Pathian in amate tungah mawna khialna a vawt nawn ngawl natu le
a kiphatsak nawn ngawl natu in pau hi.
18 Ama in amate lalsak ngawl tu hi;
ama in thina mama panin amate hun hi.
19 Pathian in mihingte, natna thuaksakna le
a pumpi tung natna dimsakna taw in hil hi.
20 Ciina khat in a ankam lim ngawl a,
an limbel zongh sungnim huai sa hi.
21 A ci a sa theampo kiam a; a ngu nguak bek a om na mu thei hi.
22 Ama mithi khua zuan tu in kipapan hi.
23 Mite ii a nasep a phawksak kik,
vantunglalang khat —
Pathian ii vantunglalang
a tul sim sung pan khat, amate hu tu in hong pai thei tha tu hi.
24 A hesuakna taw vantunglalang in, “Ama suatak in!
Ama mithi khua ah a pai tu hi ngawl hi.
Ama a suatak natu in hi lai ah a kitatna om hi,” ci tu hi.
25 A pumpi moi sua kikin thahat kik tu hi;
thu a nget ciang Pathian in zo tu hi;
26 ama in lungdamna taw Pathian bia tu hi.
Pathian in ama atu in na tuatuamte a maan in lemh kik tu hi.
27 Ama in mihonte tungah, “Maw zo khi hi.
A maan bang seam ngawl ka hihang, Pathian in hong khoaikhe hi.
28 Mithi khua ah ka pai
ngawl natu in
ama in hong keamcing a,
ka nungta lai hi” ci tu hi.
29 Pathian in hite theampo seam kikik hi,
30 Ama in mihing khat ii nuntakna hun a,
tuaciang nuntak sung lungnopna pia hi;
31 Tu in Job awng, ka son tu sia hong ngai ta'n;
thim khipkhep in a, kei hong pausak ta'n.
32 Ahihang son nop khat po na nei le tuasia za nuam khi hi;
lungdam takin maan hi ci ngam tu khi hi.
33 Ahihang tuabangin na son buale, thim om in hong ngai ta'n,
na ciim natu zia hong hilcian tu khi hi.