30
1 Ahihang tu in kei sangin a khan moi zaw
pasalte in kei sia ciammuina po in hong nei uh hi!
A pate mannung mama ngawl tawntung ahiciang
ka uite ii tuu cinna ah ka husak bua hi.
2 Amate sia pasal tha tual sa honkhat hi a,
kei atu na khat pawpo a seam tu in thazawm lei hi.
3 Amate zawng mama in a ngilkial ahikom
duisung ngampa ngamtongtana munah
zanin thingzung ko te khim uh hi.
4 Amate in sennealngam ah
thingno pote botin ne uh hi,
limna a nei ngawl belh
munphia kung ii zung ngawngawn ne uh hi!
5 Nguta khawngte ausat bang phetin
a kuama po in amate ausan in notkeak uh hi.
6 Amate sia liang maitang ah a kito vang
lianghawngte sungah teang tu uh hi.
7 Amate ngamsate bangin dui sungah au in,
sawlpaang nuai ah khawl om uh hi.
8 A mannung ngawl,
a son thamman ngawl,
min memeal nei ngawlte veu ahi hi!
Amate sia ngamsung pan kinotkeak hi.
9 Tu in amate hong pai in kei hong nuisan uh hi;
kei sia amate atu in ciammuina bang bek ka suak hi.
10 Amate in kei kiihuai
hong sa uh hi;
amate in kei taw a kiteengat ciang pha mama kisa uh a,
hong pai in ka maitang ngawngawn cil hong phii uh hi.
11 Pathian in a thazawm le a cimaw in kei hong vawt zo ahikom
amate in a thinsona taw kei hong langpan uh hi.
12 Hi a ngilo nuam mihonte in hong talphul a kei hong simin, hong taisak hi;
amate in a khakbel hong sim natu kithoai uh hi.
13 Amate in ka suatak natu
khaktan a,
hong susia tu in hanciam uh hi;
tuaciang amate a tho tu kuama om ngawl hi.
14 Ka kidalnate hong phullet a hong nawk in,
ka tung pan hong sucip suk uh hi.
15 Launa in kei hong zo hi;
ka vaang sia vui muut khat bangin bo hi;
ka nopsaknate meeikaai khat bangin tai hi.
16 Tu in thi dektak khi hi;
ka ngim thuakna sia nuamtuam tuan ngawl hi.
17 Zanin ka ngu ka taang theampo na hi;
kei hong nene natna sia tawp hun nei ngawl hi.
18 Pathian in ka laktong ngawngliip pan hong zamh a,
ka puante meakcip in mealhemsak hi.
19 Ama in buannoai sungah kei hong lawn suk a,
leivui taw in ka kibang hi.
20 Pathian awng,
hong biakpui khi hi,
ahihang nong zo ngei bua hi;
thu kong nget ciang nong nadon bua hi.
21 Kei tungah nong ngilo mama a;
na tha neiza taw
nong vawtsia hi.
22 Vui in nong seamkeaksak hi;
vuipi suangval sungah nong lawlok hi.
23 Mihing theampo atu in
a kisee kholsa thina sungah
nong puak hunlam ka he hi.
24 Hesuak nget simngawl
a dang bangma a vawt thei nawn ngawl, a lalsa pasal khat sia,
banghangin sim nu ziam?
25 A ngim nga mite taw kap khawm ngawl a
a cimaw a kitasamhte atu keima khuangai ngawl ka na khi ziam?
26 Lungdamna le khuavak
ka lam en a
ahizong ngimna le khuazing hong theng zaw hi.
27 Thinngimna le natna in kei hong baltham a
ni khat zawk ni khat
ka thuak hi.
28 Thinngim lungngimin nitaang mu ngawlin ka vavak a;
ngualhon sungah dingin huna ka ngen hi.
29 Ka aw sia ngam ui ahibuale
kalaoh vacim aw bang hi a,
heehuai in lungzuanhuai hi;
30 Ka vun dup zo a, ka ci suuk ngawp hi.
31 Khatvei lai in a zaaknop huai music la awte ka zaakna munah
tu in khuangai in mauna le kaana aw bek ka za hi.