27
Job
1-2 Thukhaikim thu hong pia nuam ngawl,
ka nuntakna a lalsak,
a nungta Vaanglianbelpa Pathian taw ka kiciam hi.
3 Pathian in husanna hong piak laiteng in
4 ka kam ka muk in a sia peuma
pau ngeingawl tu a,
ka leei in leilot thu khat zongh
son ngeingawl tu hi.
5 No pasalte maan nu hi ci ngeingawl tu khi hi;
ka mawban ngawlna sia
ka thi dongin ka thasua buatu hi.
6 Maan khi hi ka ci sia bangma hunin thasua ngawl tu khi hi;
hi thu ah kithasunna om ngawlin ka thin thiang hi.
7 Kei hong langpanin kei hong ngal vawtte a vekpi in
mi seksolte le thutang ngawlte bangin daan kipia tahen.
8 Pathian selte nuntakna sia
Pathian ii a tangkal hun ciang
bang lametna om na ziam?
9 Ngimna hong tun ciang
Pathian in amate auna za tu ziam?
10 Amate in Pathian piak
lungdamna sia a dei tu uh hi a,
ama ii tungah tatsat ngawlin
11 Pathian ii vaangletna
bangza in lian ziam, hong hilsak tavun a,
tuaciang Vaanglianbelpa
Pathian in bang ngeal ziam ci sia no hong sonthiangsak tavun.
12 Ahihang, kong hil bua zong noma mama in mu tek zo nu hi;
tua ahiciang banghangin tuabang nawnsan thu son nu ziam?
[Zophar] note 27:13 thulu Zophar hi kampau sia Zophar min a kibul mun om ngawl ahihang ama veu ma kiseesiat hi.
13 Hisia in vaanglianbelpa
Pathian ii
a ngilo, a ngongtat mite
daan a piakzia hi.
14 Amate in tapa tam mama nei thei tha tu hi,
ahihang ngal sungah a vekpi kithat tu a;
amate ii tanote in neak tu a kicing nei ngeingawl hi.
15 A nungta sunte zongh natna taw thi tu a,
tuaciang a meingongte ngawngawn in a thi huvau in khuangai ngawl tu uh hi.
16 Mi seksol sia in sim zawk ngawl ngunntang nei tu a,
khat pawpo ii kisap za sangin a tamzaw puansilhte nei tu hi;
17 ahihang mipha khat po in tua puante silh tu a,
tuaciang mi thumaan khat po in tua ngunte tang tu uh hi.
18 Mi seksol pa in mombu bangin innte sa a,
tua ahibuale lote a cing sila khat ii buk bangin sa hi.
19 Hun khakbel khat sungah amate a hau in lum tu a,
a khanlaw uh ciangin, a nei a lamh teng a bo siat mu tu uh hi.
20 Thakhat thu in khuanawl suak
bangin launa in nawk tu a;
zanin vui in amate
seamkeak tu hi;
21 ni suana vui in amate
a inn uh panin lenkeak tu hi;
22 amate ii suatak natu
a hanciam mama laitakin
tua vui in amate
dual ngawl hetin nuaimang tu hi.
23 Amate a tai uh ciang, vui nging himhum in,
lalsak theina hatna taw amate hawk a lausak hi.