21
Job
1-2 Kong son tu teng hong ngai tavun;
Heenep natu kong nget sia, tua teng lian ma hi.
3 Pau tu hun hong pia tavun a,
ka man zawkciang nong nunau nuam uh le noma thu hi.
4 A thithei mihingte taw a kihau hi ngawl khi hi;
ka thin vei laakna sia ahang thupi khat om hi.
5 Kei hong en tavun.
Ingh in, thim om in, hong salhsak tham liang hi ngawl ziam?
6 Kei tungah hong piangsate
ka ngaisut ciang lung amh in liingin ka ci ngawk hi.
7 Banghangin Pathian in misia te
a huai dong a nuamsa in nungtasak ziam?
8 Amate in tate le tute nei a,
tuate khan en tu in nungta hi.
9 Pathian in a bangkua uh ah
tuasiatna tungsak ngawl hi,
amate thaa lau in nungta ngeingawl hi.
10 Hi hi, a khuite theampo pungin
a no sua ciang haksa ngawl hi.
11 A note sia tuunote bangin tai in kimai uh a,
12 tengtongh le tamngaite aw taw laam uh hi.
13 Amate thinnuam in nungta a,
tuaciang ngimna thuak ngawlin nuam takin thi uh hi.
14 Mi ngilote in Pathian tungah koma nguak hong nusia ta'n ci uh hi;
amate in a nuntakna sungah Pathian ii deina he nuam ngawl uh hi.
15 Amate in Pathian atu sep kul sa ngawl hi,
a tungah thunget zongh phattuamna omsa ngawl hi.
16 Amate in a nei tha le ngal taw zawna ka nga uh ci hi,
ahihang amate khua ngaisutzia ka saang thei bua hi.
17 Mi ngilopa ii meivak sia kimitsak ngei ziam?
Amate khat in tuasiatna thuak ngei ziam?
Pathian thin uukin a ngilote daan pia ngei ziam?
18 tuaciang vui ii taangphaw a seam bangin
ahibuale vuipi suangval ii leivui a let bangin amate seamkeak ngei ziam?
19 A pa mawna khialna hu in tate khat tungah Pathian in daan pia hi ci nu hi.
Hi ngawl hi! Mawneite amate
mama Pathian in daan pia hen;
Amate mawna hu in
ama ii tuabang a vawtna thu ama in lak hen.
20 Mi mawte in amate aituamin daan thuak tahen;
Amate in Vaanglianbel pa Pathian thin uukna thuak tahen.
21 Eite ih khan man zawkciang
ih tate ii a lungdam le a lungdam ngawl ih awlmawk takpi ziam?
22 A saangna munah a omte ngawngawn thu a khen Pathian tungah
mihing khat pawpo in hilcian thei ziam?
23-24 Mihing pawlkhat sia a thi ni dong ciidam in nungta a;
a pumpi uh zongh pha takin kivaak a,
sa pha in, lungdamin olno takin thi uh hi.
25 A dangte in lungdamna nei vet ngawl hi;
amate thinsia in nungta a, thinsia in thi uh hi.
26 Ahihang a vekpi, a kibangin thi a, a kibangin kiphum hi;
amate a vekpi thanhte taw kituam hi.
27 Elna thin kukal na nei uh hong he khi hi.
28 “Tu in siatna a vawt mi liante ii
innte koisung om ka na ziam?” ci in na dongh uh hi.
29 Khualhaw mite taw thu
kumkhawm ngawl nu ziam?
Amate ii hong ko kik thute he ngawl nu ziam?
30 Pathian thin uuk a
daan a piak ni in
mi ngilote sia kikhoaikhe tawntung hi.
31 Mi ngilote a mawsiat tu kuama om ngawl hi,
tua ahibuale ama ii sepsate theampo a thuk kik tu kuama om ngawl hi.
32 Pha takin a kicing a thaankuul omna thaanmual ah amate a kipuak ciang,
33 mihing a tul simin thaan kuanpui a, a luangte tungah lei ngawngawn in dam takin vuknelh hi.
34 Tuaciang no na hi uh le! Thu nawnsan teng po taw kei heenep nong sawm uh hi!
Nong zo kikna peuma leilot thu vive hi!