19
Job
1-2 Banghangin kammalte taw kei hong vawtsia tawntung nu ziam?
3 Hun khat zawk hun khat
kei nong selno tawntung uh a,
nong vawtsiat hu in maizum ngawl nu hi.
4 Sep khial keak ka nei zong,
tua in no koibang hong nasak ziam?
5 No hile kei sangin phazaw kisa nu hi,
tuaciang ka ngimnate, ka maw hu in a piang sa nu hi.
6 Hi sia a seam sia Pathian a hi sia mu thei ngawl nu ziam?
Ama in kei hong mat natu in thaang hong sia hi.
7 Ama ngongtatna lungkim ngawlin,
nial leei kaleng kuama in hong ngai ngawl hi;
thukhaikim ka deina in ka au sia kuama in za ngawl hi.
8 Pathian in lampi khak zo a, ka paisuak thei bua hi;
ama in khuazing sungah ka lampi seal zo hi.
9 Ama in ka nei ka lamh theampo la siat zo a,
ka minthanna siasak zo hi.
10 Ama in ka ci tung mun theampo hong vel zazaan hi,
ka lametna hong zunglok a, vul in a thi tu in kei hong nusia hi.
11 Pathian thin uukin kei tungah a thin hong so hi;
ama ii ngal ciphabel bangin kei hong vawt hi.
12 Kei hong sim tu in a ngalkaphonpite hong paisak hi;
amate in kulhte to in ka tuipuan buk uumci uh hi.
13 Ka suapuipate ii hong taisat sia Pathian ii vawt hi;
Kei hong hete atu in kei sia khualmi ka suak hi.
14 Ka beete le ka ngualtamhte bo siat zo hi.
15 Ka inn ah zin hong tung ngeite in kei hong mangil zo hi;
ka naseam numeite in khualmi khat le ngamdangmi khat bangin kei hong vawt hi.
16 Naseam khat ka biapui ciang — ama tung hu ka nget ciang hong zo ngawl hi.
17 Ka zi in ka husan ngim namh zo ngawl a,
ka suapuipate in hong neak ngawl uh hi.
18 Patangte in hong mu ciang
hong zawngsak in hong nuisan uh hi.
19 Ka ngualtamh pha belte in
hong et ciang hong lipkhap uh hi;
ka it belte ka lang ah pang uh hi.
20 Ka ngute tungah ka vuntunte kaai vadul hi;
a nungta valiai bekma in ka suakta hi.
21 Note ka ngualtamhte nu hi! Hesuak mulkimna hong nei tavun!
Pathian khut in kei hong vaatvawk zo hi.
22 Pathian ii kei hong vawt siat bangin,
banghangin note in hong vawtsia hamtang tu nu ziam?
Nong vawtsiatna uh tu za pha heu zo ngawl ziam?
23 Mihing khat in ka kammalte phawk in,
laibu khat sungah ciamtee le paw oai napeu ing!
24 Tua ahibuale sikkhu khat taw
suang tungah ka kammalte a tawntung a kip tu in khen le oai napeu ing.
25 Ahizong vantung ah a om khat om a, a khakbel ciang
kei hong hung tu in ama hong pai tu sia ka he hi.
26 Natna in ka vunte a neaktum zawk ngawngawn in
hi ka pumpi sia taw ma Pathian ka mu tu hi.
27 Ama ka mittang mama taw ka mu tu hi,
tuaciang ama sia khualmi khat hi ngawl tu hi.
Ka thin letna bo hi, banghang ziam cile
28 noma in, “Bangbangin ama ii nat natu vawt zazaan thei tu hi ziam?” na ci uh hi.
Kei nong sim natu uh paulap khat na zong uh hi.
29 Ahihang tu in tua namsau — mawna tungah
Pathian thin uukna a thengsak namsau sia kiita vun,
tua hile thukhen tu khat a om sia he tu nu hi.