JOHN
Laithak A khatna
(The First Letter of John)
Hi kihilna taw kingalsai in lai atpa in Jesus Christ sia mihing tatak ma ahi hunlam thiang son a, tuaciang Jesus um in Pathian a it theampo zongh khat le khat ki it kul hi, ci sia thupi laakin sonbel hi.
1
Nuntakna Kammal
1 A kipatciil pan a omsa, nuntakna Kammal huvau note tungah lai kong thaak hi. Tua thu ka za zo uh a, ka mit taw ka mu zo uh hi; hi hi, mu zo khu hi, ka khut uh taw tham zo khu hi.Ref 1:1 Jn 1:1
2 Hi nuntakna sia a kimu thei in hong kilangh ciang, kote in ka mu uh hi; tua ahikom tua thu ka son uh hi, tuaciang koma hong heaksak ahi, Pa taw a omkhawm, tua tawntung nuntakna thu sia no tung zongh ah kong son uh hi.Ref 1:2 Jn 1:14
3 Pa le a Tapa Jesus Christ taw ka kipawlkhopna sungah nong pop thei natu in, ka mu ka zaak uh teng no tungah kong phuang uh hi.
4 Kote lungdamna a pawlcin thei natu in tua thu kong at uh hi.
Pathian sia Khuavak
5 Tu in a Tapa tung pan ka zaak thu le kong zaaksak uh thu in hi thu ahi hi: Pathian sia khuavak hi a, ama sungah khuazing om ngawl het hi.
6 Tua ahikom ama taw a kipawl khawm hi hing ci napi, khuazing sungah ih om veve le ih kampauna le ih ngamtatna ah a leilot ih hi hi.
7 Ahihang eite khuavak sungah ih nungta le — ama sia khuavak sungah om ahi bangma in — eite khat le khat a kipawl theite ih hi a, tuasia ciangin a Tapa Jesus ii chisan in ih mawna theampo pan hong thiansua hi.
8 Mawna nei bua hing ih cile eima le eima kitheam ih hi a, ih sungah thumaan thutak om ngawl ahi hi.
9 Ahihang ih mawnate Pathian tungah ih pualaak le ama in a kamciamte keam tu a, tuaciang a maan sia seam hi: ama in ih mawnate hong maisak tu a, ih ngamtat khialna theampo pan hong thiansua tu hi.
10 Maw ngei bua hing ih cile Pathian sia a leilot pa ih suaksak a, ama kammal eite sungah a om bua hi.