8
Mihingte tungah Limlakna bang ahi Isaiah ii Tapa
1 Topa in ka tungah, “Lai atna suangpheak lian khat la in a, tua tungah laimal lian taw: ‘Manlang Suttol, Manlang Laaksak’ ci in at in.
2 Hong heakpui tu in a muanhuai tetti nii, thiampi Uriah le Jeberechiah ii tapa Zechariah sam in,” hong ci hi.
3 Tua zawk tawmvei ciang ka zi naungil om hi. Ka tapa uh a sua ciang, Topa in, “A min, ‘Manlang Suttol, Manlang Laaksak’ ci in phuak in.
4 Patang in, ‘Nu awng’, ‘Pa awng’ a ci thei ma in, Damascus khua hauna theampo le Samaria khua pan a kisuttol vanhte theampo, Assyria kumpipa in la in pua siat tu hi,” hong ci hi.
Assyria Kumpilianpa hong Pai
5 Topa in kei hong paupui kik hi.
6 Ama in, “Hi mihingte in dam tak a luang Shiloah luitui nial zo ahikom Rezin le Pekah kumpite mai ah lau in liing vadil tu a,
7 Topa ahi Keima in, Judah ngam sim tu in Assyria kumpipa le a ngalkapte theampo ka paipui tu hi. Euphrates nguntui pawmin, ngun vaalbote theampo a khup siat bangin amate kuan tu uh hi.
8 Judah ngam sungah tuipawm bangin amate pai tu a, liangko dong tui khangin na theampo khum siat tu hi,” ci hi.
Pathian sia eite taw omkhawm hi! Ama ii tha kiphalte in ngam hu hi.
9 No, minamte awng, kiitakna taw kikhawm tua vun! No, ngam khuala ah a omte awng, na ngai vun. Ngalsim tu in kinging vun, ahihang kiita vun! Hi hi, kinging vun, ahihang kiita vun!
10 Ngealnate na nei vun! Ahihang tuate taangtung ngeingawl tu hi. Na uuk zaza son vun! Ahihang a luithawthong vive hi, banghang ziam cile Pathian sia eite taw om hi.
Topa in Kamsaangpa Kidop natu Thupia
11 Mihingte tot lampi ka tot thaak ngawl natu in Topa in ka kidop natu a vaangletna taw thu hong hil hi. Ama in,
12 “Hi mihingte vaihawmnate pawlpui heak in a, amate kiitakte kiita heak in. Ref 8:12-13 1 Pe 3:14-15
13 Keima, Vaanglianbelpa Topa ka thiantho hunlam na ciamtee in; na kiitak tatak tu sia keima ka hi hi.
14 Keima ii a lamdang thianthona hangin mihingte lutu theina suangtum khat taw ka kibang hi; keima in Judah le Israel kumpi ngammite le Jerusalem khua mite a awksak tu thaang khat taw ka kibang hi.
15 Amate tam mama lutu tu hi; amate pukin, kisucip tu hi. Amate thaang khat sungah kiman tu uh hi,” ci hi. Ref 8:14-15 1 Pe 2:8
Mithite Thudok ngawl natu Khaamna
16 No, ka nungzuite sia, kei tungah Pathian hong piak thute a keamcing thiam tute na hi uh hi.
17 Topa sia ama mite ii a mu thei ngawl natu in ama le ama kiseal hi, ahizong keima in ama ka muang a, ka lametna ama tungah om hi. Ref 8:17 Heb 2:13
18 Topa ii hong piaksa tate taw hi munah ka om hi. A kumpi tokhum Zion mual tungah a om, Vaanglianbelpa Topa in, Israel mite kungah a nungta thupuakte bangin eite hong puak hi. Ref 8:18 Heb 2:13
19 Ahihang mihingte in, maisang thu tu a phun vasup aisaan theite le thaa sam theite tungah thu dongh in hong sawl tu hi. Amate in, “A tatakin ci leang, mihingte in thaa te ii thusuakte nget tu hi a, tuaciang a nungtate atu in a thisate tung thu dok tu ahi hi,” hong ci tu uh hi.
20 Amate tungah, “ Topa in no hong hilna thute ngai vun! Thaa sam theite thu ngai heak vun — amate hong son thute ngimna taw hong kipealsak thei ngawl tu hi,” ci in zo vun.
Ngim nga Hun
21 Mihingte ngam sungah thinkiam ngilkial in vak kawkoai tu uh hi. Amate ngilkial thin uuk in a kumpipa le a Pathian haamsiat tu uh hi. Amate in vantung a ento zong, ahibuale
22 lei a salhsuk zong ngimna khamna le khuazing ngawl buang bangma mu ngawl tu hi, amate sia a lauhuai khuazing sungah kihawlkeak tu hi.