1 Banghangin vantung hongkeak in hong tuaksuk ngawl ni ziam? Mualte sia nang hong mu a, hong kiita in liing tu uh hi. 2 Meisa khat tungah a kisuang tuiso bangin amate liing tu uh hi. Hong pai ta'n a na vaangletna na ngalte tungah pualaak in, minamte na mai ah liingsak in! 3 Nong pai lai in kote muanmawk khol ngawl, a lauhuai nate na vawt hun khat om hi; mualte in nang hong mu in, hong kiita in liing uh hi. 4 Ama sungah lametna a nei mihingte atu in tuabang na a seam, nangma bang Pathian khat sia kuama in mu ngeingawl a, za zongh za ngeingawl uh hi. Ref 64:4 1 Cor 2:9 5 Na deisak bangin nuntak tu a phawkte le a maan na seam in a lungdamte na phatvawt hi. Ko tungah na thin uuk hi, ahizong kote in mawna khialna ka vawt leleng uh hi; na thin uuk mama napi in taanghlai pan kipan kote in mawna khialna ka vawt tan uh hi. 6 Eite theampo ih maw siat zo hi. Ih ngamtatna a phabelte ngawngawn a nincip hi siat hi. Ih mawnate hangin vui ii letkeak thingteekote taw ih kibang hi. 7 Thungen in nang kung hong zuan kuama om ngawl a; huna ngen tu in nang kung hong pai kuama om ngawl hi. Ka mawnate uh hangin nangma in ko kung pan kisealin nong nusia zo hi.

8 Ahizong Topa awng, nangma in kote Pa na hi hi. Kote in tungman bang hi a, nang in beal seakpa bang na hi hi. Nangma in kote nong bitphua a, 9 tua ahikom ko tungah hong thin uuk lei heak in a, ka mawnate uh taw ko hong len top heak in. Kote sia nangma mihingte ka hi uh hi; kote hong hesuak ta'n. 10 Na khuapi thiangthote sia sennealngam khat bang ahi hi; Jerusalem sia a kinusia a lalcip khat ahi hi, 11 thiangtho in a et hoi, ka taanghpupite ii nang hong pokna mun ahi ka Biakinnpi uh sia, mei in kaanghtum zo hi. Kote ii nop ka sakna mun theampo lal siat zo hi. 12  Topa awng, hi thute theampo phamaw sa tuan ngawl ni ziam? Nangma sia bangma lok ngawlin kote thuak laak tu za dongin ngim hong thuaksak tu ni ziam?