45
Topa in Cyrus Nasep pia
1 Topa in Cyrus sia kumpi tu in teal zo hi!
Topa in ngamte zo tu in ama sawl zo hi;
kumpite ii vaangletna hawkkeak tu in Topa in ama puak hi;
Topa in khuapi kongpite Cyrus atu in hong tu hi.
Cyrus tungah Topa in,
2 “Keima in muallian mualnote tamkimsakin,
na lampi ka puua tu hi.
keima in taau kongpite thiaktan in
a thikzawlte ka saattham tu hi.
3 A zingna munah, a thimtham munah
a kiphual sumngumte nang kong pia tu hi;
tuasia ciang keima in Topa ka hi hunlam le
Israel ii Pathian in na minlo in
nang hong sam zo hi cisia na tel tu hi.
4 Ka tealsa mi ahi Israel ka naseampa hu tu in nang kong sep hi,
nang in kei hong he ngawl na hitazong
5 “Keima in Topa ka hi hi; pathian dang om ngawl hi.
Na kitaangsap thahatna sia,
nangma in kei hong he ngawl na hihang kong pia tu hi.
6 Leimong khat pan leimong khat dongah a om mihing theampo in
keima sia Topa ka hina thu le
pathian dang om ngawl a hina thu
a heak thei natu in hi bangin ka vawt ahi hi.
7 Keima in khuavak le khuazing ka bitphua khawm hi;
thupha le tuasiatna ka puak khawm hi.
Topa ahi, keima in hite theampo ka vawt hi.
8 Keima in ngalzawna sia
ngua bangin van pan ka zusak tu a;
a saang tu in lei kihong tu a
suatakna le thumaanna taw paak bang hong palh tu hi.
Topa, keima in hisia ka piangsak tu hi,” ci hi.
Bitphuana le Taanghthu ii Topa
9 A dangte theampo taw ma a kibang leibeal khat in
ama a vawtpa kam nial ngam tu ziam?
Tungman in beal seakpa tungah
bang vawt ni ziam ci in a dongh ziam?
Beal in beal seakpa tungah thiam bua teh ci in phunsan ziam? Ref 45:9 Is 29:16; Rom 9:20
10 Akua in a nu a pate tungah,
“Banghang hi bang keak a hong piangsak nu ziam?” ci ngam tu ziam?
11 Israel te ii a thiangtho Pathian ahi,
Topa, maisang atu a piangsak pa in:
“Ka tate taw kisai in kei tungah thu nong dok natu thu, ahibuale
kei vawt tu a kul sia nong son natu thu na nei bua hi!
12 Keima in leitung a vawtpa le
tua tungah a teang tu minam a bitphuapa ka hi hi.
Ka vaangletna taw vantungte ka phalhkeak a;
ni, tha le aksite ka uk hi.
13 Ka tup ka sawmna bang a taangtut thei natu le
nate a maan a sua natu a seam tu in Cyrus ka thaw hi.
Ama ii khualhawna lampi theampo ka tangsak tu hi.
Ama in ka khuapi, Jerusalem sa kik tu a,
koltaang ka mite suaktasak tu hi.
Hi thu vawt tu in kuama in ama cial ngawl hi, ahibuale sumnguk pia ngawl hi” ci hi.
Vaanglianbelpa Topa in son zo hi.
14 Topa in Israel tungah,
“Egypt le Ethiopia te hauna sia no atu hi tu a,
a tunsaang Seba mite sia na sila uh suak tu hi;
amate thikkol kibulin na nung uh hong zui tu hi.
Amate in note mai ah kunin,
‘Pathian sia note taw omkhawmin — ama bekma Pathian hi.
15 A mite a ngum, Israel te ii Pathian sia,
ama le ama a kiseal Pathian ahi hi.
16 Milim a vawtte a vekpi in kimaizumsak tu hi;
amate a vekpi in a mai uh kimawlsak tu hi.
17 Ahihang Israel ahile Topa in ngumin,
a ngalzawna a tawntungin kip hi;
Ama mite kimaimawlsak ngeingawl tu hi,’ ci in pualaak tu uh hi,” ci hi.
18 Topa in vantungte bitphua a —
ama sia Pathian ahi hi!
Ama in leitung lemh in vawt a —
a kip a kho suaksak hi.
Ama in leitung a awngthong
ngamkol khatin vawt ngawl a,
mihing teenna mun tu in
piangsak hi.
“Keima in Topa ka hi a, Pathian dang om ngawl hi,
19 Keima in a thimthamin thu ka son ngei bua a,
ahibuale ka tupnate ka phualseal bua hi.
Kuama teen ngawlna a awngthong ngamkolna munah
kei hong zong tu in Israel te ka taangsamh bua hi.
Keima in Topa ka hi a, thumaan thutak ka son hi;
a maan nate ka pualaak hi,” a ci pa sia ama ahi hi.
Leitung ii Topa le Babylon ii Milimte
20 Topa in,
“Ngam tuatuam pan mite awng,
a lal kumpi ngamlian pan a suakta mite theampo awng,
hong pai tek tavun;
thu sit thuak tu in noma na ki aap vun!
A thing milimte taw thuangsia khawmin
amate a ngum thei ngawl
pathian tungah thungen mite —
tua mite in bangma heak nei ngawl uh hi!
21 Hong pai tavun a, na thu uh zum ah son vun;
thu neite khat le khat
kikum hen.
Thupiang tute akua in taanghlai in sonkhol ziam?
A mite a ngum Pathian,
Topa sia keima hi ngawl kana khi ziam?
Keima ngawl pathian dang om ngawl hi.
22 “Leitung mihing theampo awng,
tu in kei kungah hong kiheak tavun a, ngupna nga tavun!
Pathian khat bek a om sia keima ka hi hi.
23 Ka kamciam sia thumaanin, kikheal ngawl tu hi.
Keima in keima ka hina theampo taw ciliaphuai takin ka kiciam hi:
Mihing theampo hong pai in ka mai ah hong khupdin tu uh a,
kei tungah thumaan tu in hong kiciam tu uh hi. Ref 45:23 Rom 14:11; Php 2:10-11
24 “Amate in keima taw bekin ngalzawna om a
thahatna kinga hi ci tu uh hi;
ahihang kei hong ngaimawte theampo in
maimawlna thuak tu uh hi.
25 Topa, keima in,
Jacob ii suan le paalte theampo ka suatak tu a,
amate in kei hong pok tu uh hi.