33
Hu natu Thungetna
1 Ih ngalte a lal ahi hi! Kuama in amate suttol ngawl, leeheak ngawl napi in, amate in ngual ii neisa suttol in leeheak uh hi. Ahihang ngual ii neisa a sutol tu le a leeheak tu hun bo tu a, tuaciang amate mama sia ngual ii sutol le theam thuak tu uh hi.
2 Topa awng, kote hong hesuak ta'n. Ka lamet uh sia nangma na hi hi. Ni khat zawk ni khat kote hong khoi ta'n a thinngim hunin, hong hun ta'n.
3 Ko atu ngal na sim ciangin minamte sia ngal kisimna awnging panin taikeak uh hi.
4 Amate ii neisate kizamh tu a ngalvanh mat bangin kilaaksak tu hi.
5 Topa bangza in lian ziam! Ama in na theampo uk hi. Ama in thukhaikim le thutuumna taw Jerusalem dimh tu a,
6 ngam bup kikhealna om ngawlin khosak tu hi. Ama in a mite sungsia tawntungin, ciimna le heakna pia tu hi. A nei lianbel uh sia Topa a thasiana uh ahi hi.
7 Ngalhangte in hu ngen uh hi. Kilemna omsak tu a hanciam tongciinte nasia takin kap uh hi.
8 Lampi liante lauhuai mama ahikom kuama in tawn ngawl hi. Thuciamnate ciampealin, thukimnate kipaltan hi. A kizakta khat zongh om nawn ngawl hi.
9 Leitang kinusia cip in a awng thongin om hi. Lebanon ngam duisung ah thingte ngeau zo in, Sharon leipha kuam sia sennealngam bang hi a, Bashan ngam le Carmel mual tungah thingkungte a tee pul uh hi.
Topa in A ngalte Kidop natu Thupia
10 Topa in minamte tungah, “Tu in kong diang tu hi. Ka vaangletna kong lak tu hi.
11 Na ngealnate kimanna om ngawl a, na nasep theampo luithawthong hi. Ka thaa sia note hong lalcipsak tu meikuang khat bang ahi hi.
12 Leikaang nga natu in suang a kihal bangin na zaanvui tu uh a, lingkungte vut suakin a kihaltum bang na hi tu uh hi.
13 A naina le a khualana ah a om mihingte theampo in ka sep sate za tek tahen a, ka vaangletna hong heaksak tahen,” ci hi.
14 Zion ah mawnei mihingte lau na taw liing uh hi. Amate in, “Pathian ii thukhenna sia a kuang tawntung mei khat taw kibang hi. Tuabang meikuang sung pan akua suakta zo thong tu ziam?” ci uh hi.
15 Thumaan son in a maan na seam uh le na suakta zo tu uh hi. Na vaang neina uh sia mizawngte theamna in zangh heak vun a, sumnguk sang heak vun. Mihing thalup a sawmte taw ahizong, a dang a sia vawt theite taw ahizong, kipawl heak vun.
16 Tua hile na ngammuang tu uh hi; a muanhuai kulh sungah om bangin thinmuang lungmuangin na om tu uh hi. Note in anneak tu le tuidawn tu na nei tu uh hi.
Minthanna taw a kidim Maisang
17 A zai mama ngam khat, et hoi takin a uk kumpipa sia khatvei na mu kik tu uh hi.
18 Nidangin na kiitak ngamdangmi shiadongte le thukankute sia thu nung phaw kik khat hi lel tu hi.
19 Na tel thei ngawl uh kam a pau, a kisathei ngamdangmite na mu nawn buatu uh hi.
20 Ih biakna poaite khaamna khuapi ahi, Zion khua en vun. Jerusalem khua en vun! Teen natu in bang zata in a muanhuai a bitna mun khat ahi ziam? Tua in a khetphinte a kidok ngeingawl, a sawmna khaute a tattan ngeingawl, a kikhiin ngeingawl puanbuk khat taw kibang tu hi.
21 Topa in a vaangletna eite hong lak tu hi. Ngun zaite le lui zaite hui ah ih teang tu hi, ahihang ngal teambawte tuate tungah pai nawn ngawl tu uh hi.
22-23 Tua teambawte tungah a kizangh khaute theampo a luithawthong hi; Teambaw puankhakte kiphal thei ngawl hi! Ih ngalte ii ngalkap honte nei na manpha theampo ih matsak tu a, vanh tam mama tu ahikom peangbaite ngawngawn zongin hawmtel khat tek nga tu uh hi. Topa mama sia ih kumpi hi tu a; ama in eite hong ukin hong sungsia tu hi.
24 Ih leitang tungah a teang mite kuama in ka ciina hi ci in phun kik ngei nawn ngawl tu a, tuaciang mawna theampo kimaisak tu hi.