24
Topa in Leitang Daan pia tu
1 Topa in leitang lalsakin ngamkhingsak tu hi. Ama in lei maitang heakcipin, a mite thethaang tu hi.
2 Mihing theampo — thiampite le mihingte silate le tote, vanh leite le vanh zuakte, sum pukthaakte le sumpute, a hau a zawng, a thuakna uh kibang kim tu hi.
3 Leitang tamhtham in kisiacip tu hi. Topa in son zo a tuabangin kivawt tu hi.
4 Leitang ko ngaw in tul hi; leitung buppi zawngkhal hi; lei le van a nii in lal hi.
5 Mihingte in Pathian thukhamte paltan na taw le a tawntungin a kikhomsuan tu a vawt thuciamna a siatsakna taw leitang ninsak uh hi.
6 Tua ahikom Pathian in leitang haamsiat zo hi. A mite in amate ii vawt bangin thuak uh hi. A nungta mihing tawm vaial hi.
7 Sapitkungte vul in sapittui tawm hi. Khatvei lai in a lungdamte tu in khuangai a,
8 a lungdamhuai tengtongh le khuang ngingte thim zo hi.
9 Sapittui a neak uh hang lungdam in lasa thei nawn ngawlin; kuama in a limna he nawn ngawl hi.
10 Khuapi sungah na theampo kibuai in om a, kihuk natu in amate a inn sung tek ah kikhabil uh hi.
11 Sapittui a om nawn ngawl hu in mihingte lampi ah au uh hi. Lungdamna mangtatam siat zo a, leitung pan kibosak zo hi.
12 Khuapi sia siacip in, a kongpite kisaat tham zo hi.
13 Hi sia in leitung theampo ah a om minam sim tungah a piang tu thu ahi hi. Tuasia in Olive ngate kithing siatin, sapitkung tung pan sapit sanghte a kilaw siat zawkciang an kila siat sa lo taw kibang tu hi.
14 A suakta sunte lungdam in lasa tu uh hi. Nitumna sangah a omte in Topa ii letna thu son tu a,
15 nisuana sangah a omte in ama pok tu uh hi. Tuipi dung ah a teang mihingte in Israel te ii Pathian, Topa pok tu uh hi.
16 Leitung a khuala belnate panin a thumaan Israel minamte a kipokna late ih za tu hi.
Ahihang kei atu in lametna bangma om ngawl hi! Kei zawm dikdek ing! Ngual a leeheakte in tawp ngawlin thetheam lai a, ngual a leeheakna nasia vaial hi.
17 Mihing theampo awng, hong ngai tavun! Launate, dumte le thaangsia nate in note hong ngak nginge hi.
18 A lauhuai patauna pan suatak tu a hanciam pawpo dum sungah taak tu a, dum sung pan a suakta pawpo thaang sungah kiman tu hi. Vantung pan a biing a bealin a sun bangin nguazu tu a, lei tawdapte liing tu hi.
19 Leitang kektham, tamhtham in, kikhen keak tu hi.
20 Leitang mama sia zukham khat bangin hoi vatut tu a, vuipi sungah vui ii seam buk bangin huang tu hi. Leitung sia a mawnate in nengcip ngawpin, puk in tho kik ngei nawn ngawl tu hi.
21 Topa ii, tungsang vaang neite le leitung ukte daan a piak tu hun khat hong theng tu hi.
22 Dum sungah thongtaakte bangin Pathian in kumpi honkhat kaikhawm tu hi. Amate daan piak tu hun hong thet mateng Topa in thong sungah khabil tu hi.
23 Tha mial tu a, ni taang nawn ngawl tu hi, banghang ziam cile, Vaanglianbelpa Topa sia kumpi hi tu hi. Jerusalem khua Zion Mual panin ama in uk tu a, mipi lampuite in a vaangletna mu tu uh hi.