22
Jerusalem taw kisai Thupuak
1 Hisia in Mukholna Kuam taw kisai thupuak ahi hi.
Bang thu piang ziam? Banghangin khua mite theampo in innkhum tungah poai vawtin om uh ziam?
2 Khuapi bup ngamlum siasua a, aw sa le thin patauna taw kidim hi.
Hi ngal sungah a thi na mite sia ngal simin a thi hi ngawl hi.
3 Na lampuite theampo taikeak in, thaltang khat beak zongh a kaap ma in kiman uh hi.
4 Ka mihing a thite theampo atu in nasia tak ka kaa thei natu in, tu in keima nguak hong nusia ta'n. Hong heeneam heak in.
5 Hi hun sia Mukholna Kuam sungah a liinglawng patauna, ngallelna le ahi biaibuai a pian hun hi a, tuate sia Vaanglianbelpa Topa Vaanglianpipa in ei tungah hong thengsak hi. Ih khuapi uumna luphungte kisaattham zo a, huna ngenin auna awte mualte kawm ah hawl hi.
6 Elam ngam pan ngalkapte thal le thaltang toai in siphu tung to in, hong pai uh hi. Kir ngam pan ngalkapte a lum tek taw kithoai sa in om uh hi.
7 Lei pha mama Judah kuamte sia siphu ngalleangte taw kidim hi; siphu ngalkapte Jerusalem kongpite mai ah ding uh hi.
8 Judah te ngal dalnate theampo cimhtham hi.
Tuabang a pian ciang, ngalvanh koina phual pan ngalhiamte na la uh hi.
9-10 Jerusalem luphung koisung teng pua tuak cisia na mu hi. Jerusalem khua ah a om innte theampo na en kawkoai a, khuapi luphungte pua kik natu in, zak tu suangte nga natu inn pawlkhat na pheltham hi. Tui khol natu in,
11 tuikhuk a lui sia pan a luangsuk tuite khol natu in khuapi sung sangah tuibeam khat na vawt uh hi. Ahihang nidang lai pekin, hite theampo hong ngealsak le a piangsak Pathian na thusim bua uh hi.
12 Tuaciang Vaanglianpipa Topa, Vaanglianbelpa in a kap tu a mau tu le sam meettol in, khau-ip puan silh tu in note hong sam hi.
13 Tua taangin note nuiza in poai na vawt uh hi. Neak tu in tuu le khuite na ngo uh a, sapittui na dawn uh hi. Noma in, “Ei teng zongh ne in dawnin ih om thei tha tu hi! Zing ciangin a thi tu ih hi hi,” na ci uh hi. Ref 22:13 1 Cor 15:32
14 Vaanglianpipa Topa, Vaanglianbelpa ama mama in kei hong paupui a, “Amate a nuntak lai teng a siatna kimaisak ngeingawl tu hi. Keima, Vaanglianpipa Topa Vaanglianbelpa ka pau zo hi,” hong ci hi.
Shebna tungah Kidop natu Thupiak
15 Vaanglianbelpa Topa in keima tungah kumpi innkuan sung thuzeakpa ahi, Shebna kungah pai in hi bangin va ci ta'n,
16 “Nang akua kisa ni ziam? Mualpangh suang sungah nangma atu thaan khuk khuak tu in bang thu nei ni ziam?
17 Thupi zongh thupi tha tu ni hi, ahihang Topa in nang hong zamhin hong vawk tu hi.
18 Ama in bawlung top bangin nang hong tawm tu a, a lian zaw na ngam khat ah hong vawk tu hi. Na kiphatsak pui mama ahi siphu ngalleangte ii kungah na thi tu hi. Na topa te innkuan maimawlsak ni hi.
19 Topa in na zum panin hong not tu a, na za letna pan hong khia suk tu hi,” hong ci hi.
20 Topa in Shebna tungah, “Tuabang a pian ciang, Hilkiah ii tapa, ka naseampa Eliakim ka samsak tu hi.
21 Na zum puantual ama ka silsak tu a, na kawngkhau thuasak in, na thuneina theampo ama ka pia tu hi. Ama in Jerusalem le Judah mite tungah pa khat bang hi tu hi.
22 David ii suan le paal kumpipa nuai ah a pawlcing thuneina ama ka pia tu hi. Ama in zum tawtangte nei tu hi; ama hon sia, kuama in khak ngawl tu a, ama kha sia, kuama in hong ngawl tu hi. Ref 22:22 Tpl 3:7
23 Ama sia vanh khaina khat sawm bangin kip takin ka koi tu a, ama ii innkuan bup atu in maipha ngana ii a naak hi tu hi.
24 “Ahizong a beete le ama a bealhte theampo sia ama atu in vanhngit khat suak tu hi. Amate sia vanh khaina ah um le bealte a kikhai bangin ama tungah kibomkhai tu hi!
25 Tuabang a pian ciang kho takin a kikhen vanh khaina sia zuukin taak tu hi. Tua in a tungah a kikhai nate theampo ii bona hi tu hi,” ci hi. Topa pau zo hi.